‏ Ezekiel 34

Израилиин бирагүй хонишодто гай гасалан тудаха

1Эзэн намда иигэжэ айладхаба:

2– Хүнэй үри Эзэкээл! Израилиин ноёд болбол муу хонишод байна. Тэдэ ноёдые шүүмжэлэн, Минии, Эзэн Бурханай, иигэжэ айладхаһые ши дуулга: Израилиин хонишод, таанадта гай гасалан тудаха! Хонид тушаа бэшэ, гансал өөһэд тушаа һанаагаа таанад табинат. 3Һү, тоһыень эдеэд, нооһоорнь хубсалаад байнат. Эгээл тарган хонидые гарганат! Харин хонин һүрэг тэжээхэ, хооллуулха тушаа һанаагаа табинагүйт. 4Һуларһан хонидто тэнхээ оруулаагүйт, үбшэн үлбэрыень эмшэлээгүйт, гэмтэһэниие боожо байгаагүйт. Таанад тэдээндэ хайра гамгүйгөөр хандаат. 5Хонишонгүй байхадаа тэдэ бутаржа, хээрын ан арьяатанай хүнэһэн болон тараа. 6Минии хонид бүхы дэлхэйгээр таран төөреэ. Хада уулаар, гүбээнүүдээр тэдэ төөрин ябаа, хэншье тэдэниие бэдэрээгүй.

7Хонишод, таанад мүнөө Минии, Эзэнэй, айладхал шагнагты. 8Би, Эзэн Бурхан, Өөрөөрөө тангариглан тунхагланаб: Минии хонид харууһагүй орхигдожо, ан арьяатанай хүнэһэн болобо. Хонишод тэдэниием бэдэрээгүй, гансал өөһэд тушаа һанаагаа табяа. 9– 10Тиимэһээ Би, Эзэн Бурхан, таанадые хэһээхэб! Хонидоо таанадһаа холодуулхаб, адуулхыетнай дахин тэдэнээ үгэхэгүйб! Эдишэ болгон гаргахыетнай зүбшөөхэгүйб!

11Эзэн Бурхан иигэжэ айладхана:

– Би Өөрөө хонидоо бэдэрхэб, харууһалхаб. 12Тараад байһанайнь удаа хамтадхан суглуулхадаа хонишоной һүрэгөө шалган байдагтал Би тэдэнээ шалгахаб. Хонидни бүрхэг харанхы үдэр арадуудай дундуур таран төөреэ бэлэй. Би мүнөө тэдэниие абархаб! 13Хариин зоной дундаһаа тэдэниие суглуулан гаргахаб, түрэл орон нютаг Израиль руунь асаржа, хада уулаар, гол нюруугаар, һайн бэлшээринүүдээр адуулхаб. 14Тунга ногоон бэлшээридэ Израилиин хада уулаар тэдэ бэлшэхэ, аюулгүй амгалан тиирэхэ. 15Би Өөрөө хонидоо адуулхаб, аюулгүй тайбан газарта амаруулхаб. Энэ болбол Би, Эзэн Бурхан, айладхана мүн! 16Үгы болоһыень оложо, тараһыень бусаажа, гэмтэһыень боожо, үбшэн үлбэрыень эмшэлжэ байхаб. Харин таргыень, эрьюу болоһыень үүсэлхэб, юуб гэхэдэ, хони яажа зүбөөр харууһалхые Би мэдэнэб.

17Эзэн Бурхан хонидынь болохо Израилиин арад түмэндэ иигэжэ айладхана:

– Таанад Минии һүрэг гээшэт. Би Өөрөө һүрэгэйнгөө хонидой дунда, хонидой ба тэхэ ямаануудай дунда зарга шүүбэри шиидхэхэб. Алинтнай тэнхээ тамир һайтайб гэжэ мэдэхын тула ехэ наринаар хойноһоотнай адаглан байхаб. 18Эгээл һайн тунга ногоондо бэлшэжэ байһан аад, заримашуултнай дашууржа, эдижэ бараагүй ногоогоо хүлөөрөө гэшхэн дэбһэн байна. Нүгөөдүүл сэбэр тунгалаг уһанһаа уужа байтараа хүлөөрөө уһа булангиртуулна. 19Харин үлөөшэ хонид таанадай гэшхэһэн ногоо, булангиртуулһан уһа ууха юм аал?! 20Мүнөө хадаа Би, Эзэн Бурхан, тэнхээ тамиргүй хони хүсэ шадалтай хонидһоо илгахаб. 21Хүсэ шадалтай хонид, таанад эбэрээрээ мүргэн, тэнхээгүй хонидые үлдэнэт. 22Харин Би тэдэниие абархаб, хулгайда орожо, түлхюулжэ байхыень болюулхаб. Тиигээд һайень мууһаа илгахаб. 23Таанадые адуулдаг хонишоноор Өөрынгөө албатан Давидые томилхоб. Тэрэ таанад тушаа һанаагаа табидаг болохо. 24Минии албатан Давид ударидагшатнай, харин Би, Эзэн, танай Бурхан болохоб. Энэ болбол Би, Эзэн, айладхана мүн! 25Амгалан тайбан байдал үршөөһэн тухай хэлсээ таанадтай баталхаб. Тиигэжэ ан арьяатаниие тала дайдаһаа, ой модонһоо үлдэхэб, тиихэдэм таанад аюулгүй амгалан ажамидархат. 26Минии нангин хада уулые тойрон ажаһуухат. Хэрэгтэй сагтатнай хура бороо эльгээжэ, таанадые үршөөн үреэн байхаб. 27Талын модод үрэ жэмэс үгэн байха, газар баян ургаса бэлэглэхэ. Би таанадые богоол байдалһаа сүлөөлжэ, өөрын газар дээрэ амгалан ажаһуухыетнай зүбшөөхэб. Тиихэдэм Намайе Эзэн гээд мэдэхэт. 28Хариин зон таанадые бэшэ тонохогүй, ан арьяатан өөрын хүнэһэн болгохогүй. Амгалан тайбан, аюулгүй тэнюун ажаһуухат. 29Баян хэшэг үгэхыень газарые баадхахаб, тиихэдэм тэдэ үлэсхэлэн хооһон байдалһаа боложо туража үхэжэ байхаяа болихо. Үндэһэ яһатад таанадые шоо үзэхэеэ болихо. 30Минии, Эзэн Бурханай, Өөрын арад түмэн болохо Израилиие аршалан байһые хүн бүхэн ойлгохо. Энэ Би, Эзэн Бурхан, айладхана мүн! 31Таанад хонидни, Би танай Бурхамби, таанад тушаа хододоо һанаагаа зобоноб.