‏ Ezekiel 36

Израилиин хада уулануудта айладхал дамжуулагдаба

1Эзэн намда иигэжэ айладхаба:

– Хүнэй үри Эзэкээл, Израилиин хада уулануудта Минии иимэ үгэ хүүр дамжуула: 2Дайсад таанадые баһажа, «тэрэ эртэ урдын хаданууд мүнөө манай болоо» гэжэ хүхилдэнэ. 3Тэдэ бүхы талаһаа таанадые һандаргажа, үгы хэжэ байна. Хариин эзэрхэг зон таанадые наада барина. 4Тойроод байгааша арадуудай олзо, наадалха зүйлынь бологшо хада ууланууд, гүбээнүүд, урасхалнууд, гол нюруунууд, һандарһан газарнууд, хооһорһон хотонууд, Минии, Эзэн Бурханай, айладхал шагнагты. 5Угаа ехээр уурлан, тэдэ арадуудай, илангаяа Эдоомой арад түмэнэй, урдаһаа тулахаб гэжэ айладханаб! Таанадые баһан, тэдэ бусадһаа шангаар энеэгээ бэлэй, газар бэлшээрииетнай эзэмдээ. 6Таанад бусад арадуудай наадалха зүйл боложо, ехэ зобоот. Тиимэһээ Би, Эзэн Бурхан, угаа сухалдаад байнаб. 7Тойроод байгааша арадуудтнай өөһэдөө наада энеэдэнэй зүйл болохо гэжэ Би, Эзэн Бурхан, шахаа тангаригаа үгэнэб. 8Израилиин хаданууд, таанад дээгүүр модод ургажа, Минии арад түмэндэ үрэ жэмэс бэлэглэхэ. Минии зон гэртээ һаяар бусаха юм. 9Би таанад тушаа һанаагаа табихаб. Тиихэдэм газартнай хахалагдажа, ургаса таригдаха. 10Израилиин улад зон таанад руу бусажа, хотонуудые һэргээн бодхоожо, ажамидардаг болохо. 11Улад зон, адууһа мал олошорхо, үнэржэн үдэн байха. Иигэжэ таанад хаясаанай бэшэ, олон зоной орон нютаг болохот. Би таанадые урданһаа үшөө ехээр үршөөхэб. Тиихэдэм Намайе Эзэн гээд мэдэдэг болохот. 12Израилиин арад түмэнөө Би гэртэнь һөөргэнь асархаб. Хада ууланууд, тэдэ зомни таанадые эзэлэн ажаһууха, таанад – Минии арадай угай газар гээшэт, хододоо баян ургаса үгэжэ, үхи хүүгэдые үдхэн байха эрхэ нүхэсэл тэдээндэ олгуулхат. 13Ургаса һайн таанад дээгүүр урганагүй, улад зон туража үхэн алдана гэжэ таанад тушаа хэлэдэгынь зүб. 14Харин мүнөө сагһаа эхилжэ хододоо баян ургасатай байхат, зон туража үхэхэеэ болихо, үнэр олон болохо. 15Ондоо арадууд таанадые шоо үзэхэеэ, наадалхаяа болихо. Арад зондоо баян ургаса үршөөн байхат.

16Эзэн намда иигэжэ айладхаба:

17– Хүнэй үри Эзэкээл! Израилиин арад түмэн өөрын газар дээрэ ажаһуухадаа муу хэрэгүүдые үйлэдэжэ, һарынхияа үзэжэ байһан эхэнэртэл газарые бузарлаа бэлэй. 18Тэдэ алалсаа хюдалсаа үйлэдөө, онгонуудта мүргөө, иигэжэ газар бузарлаа болоно. Тиимэһээ Би тэдээндэ угаа ехээр уурлажа, 19арадуудай дундуур тараагааб. Өөһэдынь хэһэн хэрэгүүдэй хэмээр хэһээгээб. 20Туугдан ошоһон газар нютаг бүхэндөө тэдэ Минии нангин нэрэ бузарлаа: «Эзэн Бурханай арад аад, орон нютагһаа гаран ошохо баатай болоо гэжэ хариин зон хэлсэнэ». 21Тиимэһээ нэрэ хүндэеэ хараха баатай болооб. 22Израилиин улад зондо иигэжэ дуулга: таанадай түлөө бэшэ, ошоһон арад бүхэнэйнгөө урда танай бузарлагша Өөрынгөө нэрэ хүндын түлөө Би нэгэ хэрэг үйлэдэхэм. 23Өөрынгөө нангин байһые хариин арадуудта гэршэлхэдэм, тэдэ Намайе Эзэн Бурхан гээд ойлгохо. Энэ болбол Би, Эзэн Бурхан, айладхана мүн! 24Арадуудай дундаһаа таанадые суглуулан, өөрынтнай газар руу асархаб. 25Сэбэр уһаар таанадые сүршэхэб, онгонуудые зайсуулхаб, иигэжэ муу муухай бузарһаа һалахат. 26Үсэд зүрхыетнай үгэ дууламгай шэнэ зүрхөөр һэлгэхэб. Шэнэ һанаа бодолтой болохот. 27Өөрын һүнэһэ таанад руу оруулжа, таанадые Өөрын хуули, зарлигуудые сахигшад болгохоб. 28Танай үбгэ эсэгэнэртэ үгэгшэ газартам дахин ажаһуудаг болохот. Таанад – Минии арад түмэн, Би танай Бурхан болохоб. 29Бузарлагша зүйлһөө таанадые аршалхаб, баян ургаса үршөөхэдэм, үлэсхэлэн байдал оройдоошье үзэхэгүйт. 30Элбэг-дэлбэг үрэ жэмэс модод үгэг, баян ургаса таряалангууд хэшээг гэжэ Би үршөөхэб. Үлэн хооһон байһандаа арадуудта шоо үзүүлхэгүйт бэшэ. 31Хэһэн муу муухай хэрэгүүдээ һанажа, өөһэдһөө жэрхэжэ эхилхэт. 32Израилиин улад зон, мэдэгты, таанадай түлөө эдэ бүгэдые хэнэ бэшэб. Хэһэн хэрэгһээ эшэжэ зобон байгты. Энэ хадаа Би, Эзэн Бурхан, айладхана мүн! 33Таанадые нүгэлһөөтнай арюудхаһанай удаа хотонуудаа һэргээн бодхоожо, тэндээ байрлахыетнай таанадта зүбшөөхэб. 34Танай газараар үнгэрһэн хүн бүхэн зэлүүд хооһон байһыень хараһан байха. Харин мүнөө тэрэ газар дахин хахалагданхай, таригданхай байдаг болохо. 35Ханха зайдан, хооһон байһан газар мүнөө Эдээмэй сэсэг мэтэ болоо, һандарһан, хооһорһон, тонуулһан хотонууд бүхэлэгдөө, ажаһуугшадтай болоо гэжэ зон хэлсэхэ. 36Хүршэ арадуудтнай Минии, Эзэнэй, һандарһан хотонуудые һэргээн бодхоодогые, хооһорһон, үгырһэн газарнуудые ургаса тарин ногооруулдагые мэдэдэг болохо. Би, Эзэн, найдуулһанаа дүүргэдэг мүн! 37Намһаа дахин туһа гуйхыетнай, хонин һүрэг мэтээр олошорхыетнай Би зүбшөөхэб. 38Мүнөө һандараад байгааша хотонууд Иерусалимдахи һайндэрнүүдэй үедэ үргэлэй хонидой олон байдагтал, улад зоноор дүүрэн болохо. Тиихэдэ таанад Намайе Эзэн гээд ойлгохот.