‏ Ezekiel 38

Гоог Израильда добтолно

1Эзэн намда иигэжэ айладхаба:

2– Хүнэй үри Эзэкээл! Магоог гэдэг газар дайдада оршогшо Мээшэх болон Тубаал хан түрэнүүдэй зонхилогшо Гоогые шүүмжэлэ. Тэрээндэ Минии иимэ үгэнүүдые дуулга: 3Мээшэх болон Тубаал хан түрэнүүдэй зонхилогшо Гоог! Би, Эзэн Бурхан, урдаһаашни тулахаб! 4Шамайе эрьелдүүлжэ, үрүүндэш дэгээ зоогоод, сэрэгтэйш хамта холын холо руу татан гаргахаб. Халхабша хүндэ хубсаһа үмдэнхэй, һэлмэ, бамбай баринхай олон гэгшын морин сэрэгые ши зонхилнош. 5Персиин, Эфиопиин болон Ливиин сэрэгшэд бамбай баринхай, дуулга үмдэнхэй юумэд танай сэрэгтэй нэгэдэн ябана. 6Гоомэрһээ, хойто зүгэй Бэйт-Тогармааһаашье сэрэгшэд таанадтай хамта. Юрэдөө, угаа олон сэрэгтэйт. 7Бэлдэхэ тухай сэрэгтээ захира, өөрөө тэдэнэй зонхилогшо боло. 8Хэдэн жэлэй үнгэрөөд байхада һандарһан Израилиин газар дайда руу добтолон орохыетнай Би захирхаб. Удаан сагта тэрэ газар хооһон байгаа, харин мүнөө ажаһуугшадынь хариин оронһоо һөөргөө бусаа. Мүнөө Израилиин арад зон амгалан тайбан өөрын хада уулаар ажаһууна. 9Ши һалхи шуурган мэтэ сэрэгтэеэ хамта тэдээндэ добтолхош. Бар хара үүлэн мэтэ тэдэниие хүреэлхэш. 10Тэрэ үдэрэй ерэхэдэ, муу муухай түсэб зохёожо эхилхэш. 11Хашалан зоболонгүй, һанаа амар, хотоёо хэрэм ханаар халхалангүй, ямаршье суургагүй, үүдэ, ханагүй ажаһуужа байгааша орон нютагта добтолон орохоёо ши түсэблэхэш. 12Хэзээ нэгэтэ һандаранхай байгааша хотонуудаар улад зониие дээрмэшэлхэш. Хариин гүрэнүүдээр ажаһуужа байһанаа дэлхэйн эгээл шухала уулзуур болохо Израиль руу тэдэ бусажа, малтай, эд зөөритэй болонхой. 13Шэбаа болон Дэдаанай, мүн тиихэдэ Таршиишэй наймаашад шинии тала бариха. Израильһаа сэрэгэйтнай дээрмэшэлһэн алта мүнгэ, мал, эд зөөриин хуби тэдэ абахаяа һанаха. 14Хүнэй үри Эзэкээл, абарал буулгажа, Гоогто айладха: «Би, Эзэн Бурхан, мэдэнэб. Амгалан тайбан ажаһуугша Минии арад түмэн Израилиие харахадаа, 15хойто зүгһөө хүсэтэ морин сэрэгээ эльгээхэш. 16Шуургата үүлэн мэтэ хушан, Минии улад зондо добтолхош. Минии орон нютаг болохо Израиль руу нэбтэрэн орохыеш Би зүбшөөхэб. Юуб гэхэдэ, Намайе, Эзэниие, арюун нангин гэжэ дэлхэйн арад бүхэнэй мэдэдэг болохын тула иимэ юумэ эрхилхэб».

Гоог тушаа лүндэн табина

17Эзэн Гоогто айладхаба: «Үни урда сагта лүндэншэдөө эльгээжэ, добтолхоо зэһээд байһан дайсад тушаа Израилиин арад түмэниие һэргылхыень даагша һэм. Гоог, ши хадаа тэрэ дайсан гээшэш. 18Израиль руу добтолон ороходош, Минии уур сухал бушаганаха. 19Сухал дундаа угаа ехээр Израилиин газар дайда доһолуулхаб. 20Дэлхэйн амитан бүхэн – загаһа жараахай, шубуу шонхор, ан арьяатан, мүлхидэг амитад, хүншье Намһаа айха. Хаданууд хамхаран унаха, хабсагайнууд нураха, хотонууд һандарха. 21Израилиин хада уулануудые шинии урдаһаа эсэргүүсүүлхэб. Сэрэгшни бэе бэетэеэ дайлалдаха. 22Үбшэ тахал, үхэл хатал эльгээн, шамайе хэһээхэб. Бороо хура, мүндэр, хүхэр шам дээрэ болон сэрэг дээрэш адхарха. 23Би, Эзэн, нангин гээшэб гэжэ дэлхэйн бүхы арадуудта Өөрыгөө харуулхын тула эдэ бүгэдые эрхилхэб».
Copyright information for BxrBBL2024