‏ Ezekiel 39

Гоог диилдэхэ

1– Хүнэй үри Эзэкээл! Гоогые шүүмжэлжэ, иигэжэ тэрээндэ дуулга: Мээшэх болон Тубаалай ноёншье һэн гэлэйш, харин Би, Эзэн, шинии урдаһаа тулахаб! 2Ондоо зүг шэг руу шамайе хотируулжа, холын хойто зүгһөө Израилиин хада ууланууд руу хүтэлэн абаашахаб. 3Зүүн гарһааш һурша номыеш, баруун гарһааш годлинуудыеш ходолон хаяхаб! 4Ши сэрэгтэеэ, мүн шинии түлөө хүлһөөр дайлалдажа байгааша хариин сэрэгшэдтэеэ хамта тэрэ хада ууланууд дээрэ үхэлөө олохош. Иигэжэ ан арьяатанай, шубуу шонхорой хүнэһэн болохош. 5Хээрэ талада алдалан унахат. Энэ хадаа Би, Эзэн Бурхан, айладхана мүн! 6Магоог орон нютагые галдахаб, далайн эрьеэр хашалгүй ажаһуугша арад зон руу түймэр табихаб. Тиихэдэм тэдэ Намайе Эзэн гээд мэдэхэ. 7Минии арад түмэн Израиль Намайе мэдэдэг болохо, тиигээд нангин нэрыем бэшэ бузарлахаа болихо. Дэлхэйн арадууд Намайе Израилиин нангин Эзэн Бурхан гээд ойлгохо. 8Минии, Эзэн Бурханай, иимэ юумэн болохо гэжэ айладхаһан тэрэ үдэр дүтэлөө. 9Тэрэ үдэрэй мандахада, Израилиин хотонуудаар улад зон үхэһэн дайсадайнгаа дайнай зэбсэг суглуулжа, түлеэн мэтээр шатааха. Бамбай ба хуяг, һурша ном ба годли, мунса ба жада долоон жэлэй туршада шатахаар олон байха. 10Модо отолжо, түлеэ суглуулжа байхын орондо тэдэ энэ зэбсэгүүдые шатааха. Дээрмэдэгшэдээ дээрмэдэхэ, тоногшодоо тэдэ тонохо. Энэ болбол Би, Эзэн Бурхан, айладхана мүн!

Гоогые хүдөөлүүлхэ

11Эдэ бүгэдын тохёолдоһоной удаа Гоогые сэрэгтэйнь хамта Израильда, Дабһата далайһаа зүүлжээ, Аяншадай набтар нюруу газараар хүдөөлүүлхэб. Угаа үргэн газарые хүүрнүүдэй эзэлһэн ушар тэрээгүүр гарааша зондо һаад түбэг болохо, тэрэ газар «Гоогой сэрэгэй набтар нюруу» гээд нэршэхэ. 12Израилиин улад зон долоон һарын туршада үхэһэн зониие хүдөөлүүлжэ, газараа сэбэрлэжэ байха. 13Дэлхэйн бүхы зон тэдэниие хүдөөлүүлхэдэ туһалха, Минии, Эзэн Бурханай, алдар солын мандаһан тэрэ илалтын үдэр тэдэ шагнал хайрада хүртэхэ. 14Газар дээрэ хүдөөлүүлэгдөөгүй хэбтээшэ хүнэй һэе бэдэрхэ үүргэтэй зон долоон һарын һүүлээр томилогдохо. Газар сэбэрлэхын тула энэ хэгдэхэ. 15Тэдэ зон хүнэй яһа олобол, хажуудань тэмдэг табидаг байха. Тиихэдэнь хүдөөлүүлэгшэд тэрэниие «Гоогой сэрэгэй набтар нюрууда» хүдөөлүүлхэ. 16Тэрэ газар «Гоогой сэрэг» гээдшье мүн лэ нэршэхэ. Ииһээр газар дахин сэбэр болохо.

17Хүнэй үри Эзэкээл, Минии таанадта гаргажа бэлдэһэн тахилда бүхы оршон тойронһоо ерэхыень ан арьяатаниие, шубуу шонхорые дууда. Энэ хадаа Израилиин хада ууланууд дээрэ аргагүй ехэ зоог болохо, тэндэ тэдэ мяха эдихэ, шуһа уухал. 18Сэрэгшэдэй болон дэлхэйн удамаршадай мяха шуһаар зоог болохо. Хони хурьгаар, ямаагаар, тарган буруун бухануудаар үргэл хэдэгтэл, Би тэдэнээр үргэл хэхэб. 19Шубуу шонхор, ан арьяатан садатараа Минии үргэһэн тахилай өөхэ эдихэ, һогтотороо шуһа ууха. 20Минии шэрээгэй саана тэдэ моридоор, тэдэниие унажа ябааша сэрэгшэдээр, бусадшье сэрэгшэдээр садатараа зооглохо. Энэ болбол Би, Эзэн Бурхан, айладхана мүн!

Израиль һэргээгдэхэ

21Минии хэһээлтые дэлхэйн арадууд хаража, алдар солымни һаргама хурсые мэдэрхэ. 22Тэрэ гэһэнһээ хойшо Израилиин арад түмэн өөһэдэйнь Эзэн Бурхан Минии байһые мэдэдэг болохо. 23Минии урда нүгэлтэй байһандаа израильшууд сүлэгдөө гэжэ хариин зон ойлгохо. Би тэдээнһээ буруу хаража, дайсадай добтолон орон хюдахыень зүбшөөгөө һэм. 24Муу муухай хэрэгүүдэйнь, хуули ёһонуудые хазагайруулһанайнь түлөө Би тэдээнһээ буруу хаража, эдэ бүгэдые ушаруулааб.

25Харин мүнөө Израилиин арад түмэндэ нигүүлэсхыгээр хандажа, таран сасагдаһан арадуудайнь дундаһаа бусаахаб. Яковай үри һадаһадые үреэжэ, нангин байһанаа гэршэлхэб. 26Тэдэ аюулгүй амгалан орон нютагтаа ажаһуужа эхилхэдээ муу муухай хэрэгүүдээ, Намда урбадаг байһанаа һанажа, эшэхэ. 27Бусад арадуудай дундаһаа, дайсадуудай орон нютагуудһаа тэдэниие суглуулан асаржа байһыем дэлхэйн арадууд хаража, Минии нангин байһые ойлгохо. 28Хариин арадуудай дундуур Өөрын арад зониие тараажа, удаань дахин суглуулаад, нэгыеньшье үлөөнгүй гэртэнь бусаахадам, Минии арад түмэн өөһэдынь Эзэн Бурхан байһыем мэдэрхэ. 29Израилиин улад зон руу Өөрын Һүлдэ шэнгээн оруулхаб, бэшэ буруу харахаяа болихоб. Энэ болбол Би, Эзэн Бурхан, айладхана мүн!