‏ Ezekiel 40

Ерээдүй сагай нангин үргөө тушаа

1Энэ хадаа Вавилоон руу сүлэлгэдэ туугдан ошоһоноймнай һүүлээр хорин табадахи жэлэй, мүн тиихэдэ Иерусалим хотын һандарһанай удаа арбан дүрбэдэхи жэлэй ябажа байхада бэлэй. Жэлэй түрүүшын һарын арбадахи үдэр Эзэнэй нүлөөн намда хүсэтэйгөөр хүрэжэ, нэгэ тээшээ намайе абаашаба. 2Израилиин орон нютаг руу Тэрэ намайе абаашажа, угаа үндэр хада уула дээрэ табина хэбэртэй. Бурханай иимэ үзэгдэлнүүдые хараа бэлэйб. Урда зүг руу харахадам, олон байра байшантай хото мэтэ юумэн харагдаба. 3Тэрэ намайе тиишэнь абаашажа, би тэндэ гуулин мэтэ яларжа байгааша хүниие хараа һэм. Хэмжэдэг улһан аргамжа, хэмжүүрэй модо гартаа баринхай тэрэ хотын хаалгануудай дэргэдэ зогсожо байгаа бэлэй. 4Тэрэ хүн намда иигэжэ хэлэбэ:

– Хүнэй үри Эзэкээл! Минии харуулһан юумэ ехэ анхаралтайгаар харан хадуужа абаарай. Энээнэйл түлөө ши иишээ асарагдаа ха юмши. Хараһан юумэеэ бултыень Израилиин улад зондо дуулгахаш.

Зүүн зүгэй хаалганууд тухай

5Минии хараһан юумэн гэхэдэ, Эзэнэй нангин үргөөе тойроод хананууд. Намайе хүтэлэгшын гарта зургаан тохойн (тохой альгантайгаа хамта) утатай хэмжэлгын модон байба. Тиигээд тэрэ хэмжэлгын модоор ханын үндэрые хэмжэхэдэнь, нэгэ хэмжэлгын модоной утатай гээд элирбэ. Ханын зузааниие хэмжэхэдэнь, мүн лэ нэгэ хэмжэлгын модоной утатай байба. 6Удаань тэрэ зүүн зүгтэхи хаалганууд руу шэглэжэ, табсангуудаарнь гэшхэн оробо. Хаалгануудай хоёр талаар алишье талаһаа тэгшэ нэгэ хэмжүүрэй модоной утатай тэбхэлжэн багахан таһалганууд байгаа. 7Таһалгануудай хоорондохи ханын үргэн табан тохой хэмжээтэй байба. Хаалгануудһаа таһалганууд хүрэтэр мүн лэ нэгэ хэмжэлгын модоной зайтай байба. 8Үүдэнһээ нүгөөдэ хана хүрэтэр хэмжэлгын нэгэ модоной зай байгаа. 9Үүдэнһээ нүгөөдэ хана хүрэтэр найман тохой, үүдэнэй хоёр хажуугаар хананууд тус тустаа хоёр тохой гээд элирбэ. 10Хаалгануудай хоёр талаар гурба-гурбан таһалганууд байгаа. Тэдэ мүн лэ тиимэ хэмжүүртэй, хоорондохи ханануудайнь зузаан мүн лэ тиимэ бэлэй. 11Хаалгануудай хоорондохи зай тэрэнэй хэмжэхэдэ, арбан гурбан тохой үргэнтэй байба, харин хоёр хаалгануудай үргэн арбан тохой һэн. 12Таһалга бүхэнэй урда тээ хажуу таһалгые илгаһан нэгэ тохой үндэртэй, нэгэ тохой үргэнтэй хана байгаа. Таһалганууд өөһэдөө тэб тэбхэгэр, тус тустаа зургаан тохой үргэнтэй байгаа. 13Хүтэлэгшын нэгэ таһалгын хойто ханаһаа эхилээд, урдаһаань хараад байгааша нүгөөдэ таһалгын саада хана хүрэтэр бүхы байрын үргэниие хэмжэхэдэ, хорин табан тохой бүридүүлбэ. 14Дотоо хашаагай таһалга тэрэнэй хэмжэхэдэ, хорин тохой үргэнтэй байба. 15Хаалгануудай дотоодо талаһаа эхилэн, эгээл һүүлшын таһалгын хана хүрэтэр хэмжэхэдэ, табин тохой бүридүүлбэ. 16Таһалгануудай бүхы ханануудаар багахан сонхонууд байгаа. Хажуу тээшээ хараһан хананууд дээрэ пальма модоной дүрсэнүүд һиилээтэй байба.

17Тэрэ хүтэлэгшэ намайе гадаа хорёо руу абаашаба. Тэндэ хорёо соогуур тойроод шулуун табсан баряатай, тэрэ табсан дээрэ гушан таһалга байгаа. 18Табсан гэбэл хаалгын хажуу ханада няалдаад, үргэнөөрөө хаалгын үргэнтэй адли һэн. Энэнь доодо табсан бэлэй. 19Нангин үргөөгэй дотор хорёогой хаалгануудые харахада, гадаа хорёогой хаалгануудһаа үндэр бэлэй. Гадаа болон дотоо хорёонуудай хаалгануудай хоорондохи зайе хүтэлэгшэ хэмжэбэ. Зуун тохой тэрэнь бүридүүлбэ.

Хойто зүгэй хаалганууд

20Удаань тэрэ хүн гадаа хорёогой хойто хаалгануудые хэмжэбэ. 21Эдэ хаалгануудай хоёр хажуугаар гурба-гурбан таһалганууд, тэдэ таһалгануудай хэмжүүр, хоорондохи ханынь зузаан зүүн хаалгануудта тон адли байба. Иигэжэ хойто зүгэй хаалганууд табин тохой утатай, хорин табан тохой үргэнтэй байгаа. 22Сонхонуудынь, табсангуудынь, һиилэһэн пальма мододынь зүүн зүгэй хаалгануудта тон адли. Хаалганууд хүрэтэр – долоон алхам. Нангин үргөөгэй дотор хашаада няалдаһан таһалга бии һэн. 23Дотор хорёогой хаалганууд гадаа хорёогой хаалгануудай урдаһаа хараһан бэлэй. Тэрэ хүн гадаа болон дотор хорёонуудай хаалгануудай хоорондохи зайе хэмжэбэ. Энэнь зуун тохой бүридүүлбэ.

Урда зүгэй хаалганууд

24Удаань тэрэ хүтэлэгшэ намайе урда хаалганууд руу абаашаба. Тэдэ мүн лэ тиимэ хэмжүүртэй байба. 25Таһалгануудайнь сонхонууд бусад сонхонуудтал адли, хаалганууд мүн лэ табин тохой ута, хорин табан тохой үргэн байгаа бэлэй. 26Тэрэ хаалганууд хүрэтэр долоо алхам, нангин үргөөгэй дотор хорёодо няалдаһан таһалга бии һэн. Пальма модо һиилэһэн гоёолтонууд ханануудаарнь бии һэн. 27Дотор хорёо мүн лэ хаалгануудтай. Дотор болон гадаа хорёонуудай хаалгануудай хоорондохи зайе тэрэ хүтэлэгшэ хэмжэбэ, зуун тохой энэнь бүрилдүүлээ һэн. 28Тэрэ намайе урда хаалгануудаар дотор хорёо руу абаашаба. Хаалгын хэмжүүр бусад хаалгануудта адли бэлэй. 29– 30Таһалганууд, хоорондохи ханануудынь, урда таһалгань, сонхонуудынь тон лэ тиимэ хэмжүүртэй байгаа. Хаалга бусад хаалгануудтал адли табин тохой утатай, хорин табан тохой үргэнтэй байба. 31Эдэ хаалгануудай багахан таһалга нүгөөдэ дотор хорёодо няалдаатай, һиилээтэй пальма модоной дүрсэнүүд ханануудые шэмэглэнэ. Энэ хаалга хүрэтэр – найман алхам. 32Удаань тэрэ намайе зүүн хаалгануудаар дотор хорёо руу абаашаба. Хүтэлэгшэ хаалга хэмжэбэ, бусад хаалгануудтал адли хэмжүүртэй гээд элирбэ. 33Хажуу таһалганууд, хоорондохи ханануудынь урдань байгааша таһалга бусад хаалгануудтал адли хэмжүүртэй. Хажуу таһалганууд болон орохын урда тээ байдаг таһалга сонхонуудтай, хаалганууд мүн лэ табин тохой утатай, хорин табан тохой үргэнтэй һэн. 34Орохын урда тээ байдаг таһалга нүгөөдэ дотор хорёодо няалданхай, ханануудаарнь пальма модон һиилэээтэй һэн. Хаалганууд хүрэтэр – найман алхам. 35Удаань хүтэлэгшэ намайе хойто хаалганууд руу абаашаба. Тэрэниие хэмжэхэдэнь, бусадтал адли хэмжүүртэй байгаа. 36Хажуу таһалгануудынь, хоорондохи ханануудынь, орохын урда тээ байдаг таһалга мүн лэ тиимэ, бүхыдөө табин тохой утатай, хорин табан тохой үргэнтэй байба. 37Орохын урда тээ байдаг таһалга ондоо дотор хорёодо няалданхай, ханаар пальма модон һиилээтэй һэн. Хаалганууд хүрэтэр – найман алхам.

Үргэлэй мал үүсэлхэ таһалганууд

38– 39Хойто хаалгануудай урдуур байһан таһалга соо дүрбэн шэрээ харагдаа һэн: хоёр шэрээ нэгэ талада, нүгөө хоёр шэрээ – нүгөөдэ талада бэлэй. Тэдэ шэрээнүүд дээрэ түгэс шатаалта, нүгэл сагааруулгын болон гарза харюулгын үргэлэй мал үүсэлэгдэхэ ёһотой. Энэ таһалгаһаа гадуур нэгэ багахан таһалга байгаа. Тэндэ үргэлэй мал угаагдадаг бэлэй. 40Энэ таһалгаһаа гадуур үшөө дүрбэн шэрээ, хойто хаалгануудай хажуугаар хоёр хоёроор табяатай байгаа. 41Үргэлэй мал үүсэлхэ шэрээ бүхыдөө найма байгаа: дүрбэн шэрээ таһалга соо, дүрбэниинь хорёо соо бэлэй. 42– 43Үшөө дүрбэн шулуун шэрээ байгаа. Тэдэ нэгэ тохой үндэртэй, тохой хахад утатай, үргэнтэй бэлэй. Тэдээн дээрэ түгэс шатаалта үргэлэй мал үүсэлхэ зэбсэгүүд табигдадаг һэн. Хана тойрон нэгэ альганай хэмжээтэй үлгүүрнүүд ханада хадаатай байгаа.

Санаартадай таһалганууд

44Тэрэ хүн намайе дотор хорёо руу асарба. Тэндэ хоёр таһалга: нэгэнь хойто таһалгануудай дэргэдэ, нүгөөдэнь урда хаалгануудай дэргэдэ байгаа. 45Хүтэлэгшэ намда иигэжэ хэлэбэ:

– Урда хаалгануудай хажуудахи таһалга нангин үргөө соо алба ябуулдаг санаартадай, 46хойто хаалгануудай дэргэдэхи таһалга үргэлэй шэрээгэй дэргэдэ алба ябуулдаг санаартанай. Тэдэ болбол бултадаа Цадоогой үри һадаһад, ганса тэдэл Левиин обогһоо Эзэндэ алба ябуулхаар нангин үргөө руу орохо зүбшөөлтэй.

47Хүтэлэгшэ дотор хорёо хэмжэбэ. Ута, үргэниинь аб адли – зуун тохой, тэб тэбхэрхэн байгаа. Нангин үргөөгэй урда үргэлэй шэрээ байгаа һэн. 48Нангин үргөө руу орохын урда тээ байдаг таһалга руу тэрэ намайе абаашаба. Тиигээд нангин үргөөгэй үүдэнэй тотого тэрэ хэмжэбэ: утань арбан дүрбэн тохой, үргэниинь табан тохой, үүдэнһээ хана хүрэтэр хоёр хажуугаар тус тустаа гурбан тохой байгаа бэлэй. 49Үүдэн үргэнөөрөө хорин тохой, дотогшоо хэмжэбэл, арбан хоёр тохой байба. Арбан табсантай шата тэрэ үүдэндэ хүргэнэ, хоёр хажууһаань бахананууд байгаа бэлэй.