Eze 43 | BxrBBL2024 | STEP | Тэрэ хүн намайе нангин үргөөгэй зүүн үүдэнүүдтэ абаашаба.

‏ Ezekiel 43

Эзэн Бурханай алдар соло нангин үргөө руу бусаба

1 Тэрэ хүн намайе нангин үргөөгэй зүүн үүдэнүүдтэ абаашаба. 2 Зүүн зүгһөө мандан заларжа байһан Израилиин Бурханай һүр жабхаланай ялагар алдар соло тэндэ обёорбоб. Тэнгис далайн шааяандал адли һүрөөтэй шанга абяан дуулдажа, бүхы оршон дэлхэй Тэрэнэй һүр жабхалангаар яларжа толоржо байгаа һэн. 3 Энэ үзэгдэл хадаа Иерусалим хото усадхаха зорилготойгоор Эзэн Бурханай заларан ерэһые хараһандамни, мүн Хэбаар голой эрьедэ минии хараһан үзэгдэлнүүдтэ адлирхуу бэлэй. Би тэрэ дары газар руу һүгэдэн унаа һэм. 4 Эзэнэй алдар соло зүүн үүдэнүүдээр нангин үргөө руу шэнгэн оробо. 5 Эзэнэй Һүлдэ намайе бодхоожо, дотор хорёо руу оруулба. Нангин үргөө Эзэнэй һүр жабхалангаар дүүрэнхэй байна гэжэ тэндэ хараа һэм. 6 Үнөөхи хүтэлэгшэ хажуудамни зогсожо байгаа. Нангин үргөө сооһоо Эзэнэй иигэжэ айладхан байһые дуулабаб:

7 – Хүнэй үри Эзэкээл! Энэ үргөө болбол газар дэлхэй дээрэхи Минии хаан шэрээ мүн. Би эндэ Израилиин арад зоной дунда хэтэ мүнхэдөө оршохоб. Онгонуудта мүргэжэ гү, али үхэһэн хаашуулаа шүтэн байхаяа тэдэ болихо. Иигэжэ тэдэ болон хаашуулынь Минии нангин нэрэ гутаахаяа болихол. 8 Тэдэ хаашуул ордонгуудаа Минии нангин үргөөдэ няан шахуу барижа, гансал нэгэ хана тэдэниие Намһаа илган байдаг һэн. Жэгшүүрилтэй муухай хэрэгүүдые үйлэдэжэ, тэдэ Минии нангин нэрэ бузарлаа. Тиимэһээ Би уурлан сухалдан, тэдэниие һалгаагаа һэм. 9 Харин онгонуудта мүргэхэеэ, үхэһэн хаашуулдаа хүшөөнүүдые барихаяа болёо һаань, Би тэдэнэй дунда хэтэ мүнхэдөө оршохоб. 10 Хүнэй үри Эзэкээл! Израилиин арад түмэндэ нангин үргөө тушаа дуулга. Яажа зохёогдон баригдаһыень тэдэ шэнжэлэг. Нүгэл шэбэл хэһэндээ тэдэ эшэн байг лэ. 11 Хэһэн муу муухай хэрэгүүдһээ тэдэнэй үнэхөөрөө эшэжэ, халаглажа байбалнь, Һүмын түхэл дүрсэ, түсэбые, орохо гараха үүдэ үрхыень, янза маягыень, бүхы ёһо дүримүүдыень хөөрэжэ харуулжа тэдэндэ үгэ. Эдэ бүгэдые тэдэнэй нюдэн дээрэ бэшэжэ үгэ, тиин тэдэ энэ түхэл дүрсые, бүхы ёһо гуримуудые сахижа бэелүүлжэ байг лэ. 12 Нангин үргөө тушаа эгээл шухала ёһо дүрим гэбэл, иимэ: энэ хада уулын бүхы оршолон нангин, мүргэлтэй.

Үргэлэй шэрээгэй хэмжүүр

13 Үргэлэй шэрээгэй хэмжүүр тушаа хэлэбэл, тэрэ хадаа иимэ хэмжүүртэй байгаа: гүнзэгыгөөрөө нэгэ тохой ба үргэнөөрөө нэгэ тохой болохо хобоо үргэлэй шэрээгэй хажуугаар гарадаг һэн. Тэрэ хобоое газаа талаһаань хахад тохой үргэнтэй бүһэлүүр хүреэлбэ. 14 Үргэлэй шэрээгэй һууриһаа доодо хуби хүрэтэрынь хоёр тохой, доодо хубиин үргэн нэгэ тохой. Газарта байгааша һууриһаа эхилээд, дунда хуби хүрэтэрөө үргэлэй шэрээ хоёр тохой, үргэниинь тэндэ нэгэ тохой, дээдэ хубинь дүрбэн тохой, үргэниинь мүн лэ нэгэ тохой байгаа. 15 Үргэл үргэдэг дээдэ хубинь мүн лэ дүрбэн тохой үндэр, дүрбэн углуугаарнь бухын эбэртэл адли хушуунууд ербылдэн байгаа бэлэй. 16 Үргэлэй шэрээгэй оройнь тэб тэбхэр, алишье талаараа арбан хоёр тохой утатай һэн. 17 Гал аһаадаг амһарта бодхоогдоһон талбай алишье талаараа арбан дүрбэн тохой утатай ба үргэнтэй, тэрэниие тойроод хахад тохой үргэнтэй бэһэлүүр нэгэ тохой гүнзэгытэй хобоо бүридүүлнэ. Үргэлэй шэрээ руу ошоһон табсангууд зүүн талаһаань байгаа.

Үргэлэй шэрээ арюудхалга

18 Эзэн Бурхан иигэжэ айладхаба:

– Хүнэй үри Эзэкээл! Үргэлэй шэрээгэй баригдажа дүүрэхэдэ, түгэс шатаалта үргэл үргэжэ, үргэлэй малай шуһа сүршэжэ, арюудхаха хэрэгтэй. Иимэ юумэ хэгты: 19 Цадоок санаартанай үри һадаһад, Левиин обогой санаартад, Минии нангин үргөө соо алба хэхэ эрхэтэй. Нүгэл сагааруулгын үргэл хэхэдэнь, буруу тэдээндэ үгөөрэй. 20 Тэрэ буруугай шуһые үргэлэй шэрээгэй дүрбэн углуугаар сүршэ. Мүн дунда хубиинь углуунуудаар, бэһэлүүрээр баһал сүршөөрэй. Иигэжэ үргэлэй шэрээе сэбэрлэхэ, арюудхаха болонош. 21 Удаань буруунай бэе – нүгэл сагааруулгын үргэл нангин үргөөһөө гаргаад, тусхай газарта шатаагаарай. 22 Үглөөдэрынь ямаршье дутагдалгүй тэхэ абажа, нүгэл сагааруулгын үргэл болгон үргэхэ ёһотойш. Үргэлэй шэрээе буруунай шуһаар арюудхаһандал тэхын шуһаар арюудхаха хэрэгтэй. 23 Удаань ямаршье эрэмдэггүй үшөө нэгэ буруу, мүн хуса абажа, 24 нангин үргөөдэ асараарай. Санаартад тэдээн дээрэ дабһа адхажа, түгэс шатаалта үргэл Намда үргэхэ. 25 Долоон үдэрэй туршада үдэр бүри, тэхэ, буруу, хуса нүгэл сагааруулгын үргэл гэжэ үргэжэ байхаш. Эдэ амитад ямаршье эрэмдэггүй байха ёһотой. 26 Санаартад иигэжэ долоон хоногой туршада үргэлэй шэрээ иимэ аргаар арюудхан, бэлэн болгон байха. 27 Долоон үдэрэй түгэсэһэнэй удаа санаартад түгэс шатаалта, мүн амгалан байдалай түлөө үргэлнүүдые саашадаа энэ шэрээ дээрэ үргэжэ байха эрхэтэй болохо. Тиихэдэнь Би Израилиин арад түмэндэ талархалаа үзүүлэн байхаб. Энэ болбол Би, Эзэн Бурхан, айладхана мүн!