Eze 45 | BxrBBL2024 | STEP | Жээрэб хаян, Израилиин газар уһа обогуудаар хубаахадаа, Намда, Эзэндэ үргэл болгон зорюулжа, нэгэ хуби үгэхэ ёһотойт. Тэрэ нангин газар хорин табан мянган тохой утатай, хорин мянган тохой үргэнтэй байха. Тэрэ газар алишье һууриндаа арюун нангин байха.

‏ Ezekiel 45

Эзэнэй нангин газар

1 Жээрэб хаян, Израилиин газар уһа обогуудаар хубаахадаа, Намда, Эзэндэ үргэл болгон зорюулжа, нэгэ хуби үгэхэ ёһотойт. Тэрэ нангин газар хорин табан мянган тохой утатай, хорин мянган тохой үргэнтэй байха. Тэрэ газар алишье һууриндаа арюун нангин байха. 2 Нангин үргөө хадаа алишье талаһаа табан зуун тохой утатай тэб тэбхэрхэн дүрбэлжэн газар тэндэ эзэлхэ, тойроод табин тохой үргэн бэлшээри газар байха ёһотой. 3 – 4 Энэ нангин газарай хахад хубинь – хорин табан мянган тохой ута, арбан мянган тохой үргэн газар нангин үргөө соо алба хэдэг санаартадай болохо. Тэдэнэй гэр байрань, мүн хамагай нангин газар – нангин үргөө тэрэ газар дээрэ оршохо. 5 Газарай нүгөөдэ хахадынь нангин үргөө соо хара ажал хэдэг левидүүдтэ хүртэхэ. Левидүүдэй гэрнүүд тэндэ оршохо юм. 6 Минии нангин газарай хажууда хорин табан мянган тохой ута, табан мянган тохой үргэн газар Израилиин бүхы зондо гаргажа үгэгты. Тэндэ Хото оршохо.

Зонхилогшодо гаргагдажа үгтэһэн газар

7 Израилиин зонхилогшодо газар уһан мүн лэ үгтэхэ ёһотой. Нангин газар дээрэ оршогшо Хотоһоо баруулжаа болон зүүлжээ газарнууд тэрээндэ үгтэхэ. Нэгэ обогой зондо үгтэһэн газартал адли хэмжүүртэй газар хаанай болохо юм. 8 Иигэжэ Израилиин удамаршад өөрын хуби газартай боложо, Минии арад түмэниие харшалхагүй, арбан хоёр обогуудаар хубаагдаһан газарта обтохогүй.

Израилиин удамаршад үнэн зүбые үйлэдэхэ зэргэтэй

9 Эзэн Бурхан иигэжэ айладхана:

– Израилиин удамаршад, нүгэл үйлэдэхэтнай хүрөө! Харшалха, дээрмэшэлхэеэ болижо, үнэн зүбые үйлэдэн байгты. Өөрын газар дээрэһээнь арад зониием үлдэжэ, гаргажа байхаяа болигты. Энэ болбол Би, Эзэн Бурхан, айладхана мүн! 10 Зүб хэмжүүр, зүб эфаа, мүн зүб баата хэрэглэгты. 11 Хуурай зүйл хэмжэхэдэ эфаа хэрэглэгдэхэ, шэнгэн зүйл хэмжэбэл, баат хэрэгтэй. Тэдэнэй хэмжүүр хоомэрһээ дулдыдаха. Хоомэр хадаа арбан эфаатай, үгышье һаа, арбан баат гээшэтэй жэшээтэй. 12 Шэгнэхэ гэбэл, шээкэл хэрэглэгдэхэ. Нэгэ шээкэл хорин геэрэтэй, жаран шээкэл нэгэ миинэтэй жэшээтэй. 13 Израилиин удамаршад, ургасынгаа жаранай нэгэ хубиие зон таанадта үргэдэг байха. 14 Оливын тоһонһоо тэдэ зуунай нэгэ хубииень асарха ёһотой. Баата хэмжүүрээр тэрэ хэмжэгдэхэ. Арбан баата хадаа нэгэ хоомэр гү, али нэгэ кооро бүридүүлхэ. 15 Хоёр зуун хонин һүрэгһөө нэгэ хони тэдэ мүн лэ асарха. Талханай үргэл, түгэс шатаалта үргэл болон амгалан байдалай түлөө үргэл иигэжэ хэгдэхэ болоно. Тиихэдэнь Би, Эзэн Бурхан, тэдэ зоной нүгэл арюудхахаб. 16 Албата бүхы арад түмэн эдэ бүгэдэ үргэлнүүдые Израилиин зонхилогшодо асархал. 17 Гэбэшье шэнэ һарын, субботын үдэрэй, мүн шажанай бусад һайндэрнүүдэй үедэ Намда үргэхэ мал, таряа талханай, үзэмэй дараһан архиин түлөө зонхилогшо харюусалгатай байхал. Нүгэл сагааруулгын, талханай үргэл, түгэс шатаалта үргэл, мүн амгалан байдалай түлөө үргэл иигэжэ бүтээгдэжэ, Би Өөрын арад түмэн Израилиие хүлисэн, нүгэлыень арюудхахаб.

Үргэл хэхэ һайндэрнүүд

18 Эзэн Бурхан иигэжэ айладхана:

– Һарын шэнэдэ ямаршье эрэмдэггүй буруу абажа, үргэл хээд, нангин үргөөе арюудхаха болонот. 19 Нүгэл сагааруулгын энэ үргэлэй нэгэ тэды шуһа санаартан нангин үргөөгэй тотогонуудта, үргэлэй шэрээгэй дүрбэн углуу, дотор хорёогой үүдэнүүдэй тотогонууд дээрэ сүршэг. 20 Зорюута гү, али мэдэнгүй нүгэл хэһэн хүнэй түлөө иимэл үргэл һара бүхэнэй долоодохи үдэр хэхэ хэрэгтэй. Иигэжэ нангин үргөө арюудхагдаха. 21 Түрүүшэ һарын арбан дүрбэдэхи үдэрһөө эхилээд, саашадаа долоон хоногой туршада таанад Паасха гэжэ һайндэрые һайндэрлэхэ ёһотойт. Тэдэ долоон үдэр эһээбэригүй талхаар болгоһон хилээмэ эдигты. 22 Энэ һайндэрэй түрүүшын үдэр зонхилогшо Израилиин бүхы арад түмэнэй нүгэл сагааруулгын үргэл болгон буруу үргэхэ ёһотой. 23 Һайндэрэй долоон хоногой туршада үдэр бүри тэрэ долоон буруу, долоон хуса Намда зорюулан, түгэс шатаалта үргэл болгон үргэхэ юм. Нүгэл сагааруулгын үргэл болгон үдэр бүри долоон хоногой туршада тэрэ тэхэ үргэхэ ёһотой. Үргэлэй мал ямаршье эрэмдэггүй байха зэргэтэй. 24 Тэрэ мүн лэ нэгэ эфаа гурил, нэгэ гиинэ оливын тоһо, буруу, хуса бүхэнтэй хамта үргэдэг байха мүн. 25 Долоодохи һарын арбан табадахи үдэр Майхангуудай һайндэр эхилдэг. Долоон хоногой туршада тэрэ үргэлжэлхэ. Һайндэрэй үдэр бүхэндэ зонхилогшо Паасхын һайндэрэй үедэ хэһэндэл адляар тон лэ тиимэ үргэлнүүдээ: нүгэл сагааруулгын, түгэс шатаалта, мүн талха таряанай, оливын тоһоной үргэлнүүдые үргэхэ.