Eze 5 | BxrBBL2024 | STEP | Эзэн Бурхан иигэжэ айладхаба: – Хүнэй үри Эзэкээл, хурса һэлмэ абажа, һахалаа болон бүхы үһэеэ хюһа. Тиигээд үһэеэ шэгнэжэ, гурбан хуби болгон хубаа.

‏ Ezekiel 5

Иерусалим хото һандарха

1 Эзэн Бурхан иигэжэ айладхаба:

– Хүнэй үри Эзэкээл, хурса һэлмэ абажа, һахалаа болон бүхы үһэеэ хюһа. Тиигээд үһэеэ шэгнэжэ, гурбан хуби болгон хубаа. 2 Шинии зураглажа харуулһан бүһэлэлтын дууһахада хотын дунда нэгэ хуби үһые шатаа. Нүгөө хубииень хотые тойруулан ябажа, һэлмээр сабша. Үлөөшэ хубиие һалхинда хиидхүүлэ, Би һэлмэ һугалан, Иерусалим хотынхидые дахан мүрдэхэб. 3 Тэрэл хубиһаа нэгэ хэды үһэ абажа, хормойдоо уя. 4 Тиигээд энэ уяашаһаа мүн лэ нэгэ хэдые абажа, гал руу хаяжа, шатаа. Тэрэ гал бүхы Израилиин арад түмэнөөр дэлгэрхэ.

5 Эзэн Бурхан иигэжэ үргэлжэлүүлээ:

– Энэ болбол Иерусалим тухай уридшалан буулгагдаһан абарал мүн. Би тэрэниие бүхы дэлхэйн дунда табижа, бусад оронуудые хажуугаарнь жэрылгээ бэлэйб. 6 Теэд Иерусалим Минии зарлигуудые буруушаан эсэргүүсэжэ, бусад үндэһэ яһатанһаа үлүүгээр аашалба, тойроод байгааша орон түрэнүүдһээ муугаар тэрээндэм хандаба. Иерусалим Минии зарлигуудые, хуули ёһонуудые дүүргэхэеэ арсаба. 7 Тиимэһээ таанадта Би, Эзэн Бурхан, иигэжэ дуулганаб: Минии хуули гурим, зарлигуудые сахин бэелүүлэнгүй, таанад тойроод байгааша үндэһэ яһатадһаа үлүү ехэ гэм зэмэ хээт. Тойроошо арадуудай ёһо гуримые мүн лэ сахинагүйт.

8 Би, Эзэн Бурхан, таанадта иигэжэ дуулганаб: Би таанадай дайсан болооб. Үндэһэ яһатадай хараһаар байтар Би таанадые шүүбэрилэн хэһээхэб. 9 Бүхы жэгшүүритэй үйлэ хэрэгүүдэйтнай түлөө Би энэ болотор хээгүй, дахин бэшэ хэхэшьегүй муу юумэ таанадта хэхэб. 10 Тиигэжэ Иерусалим соо эсэгэнэр хүүгэдээ эдихэ, хүүгэдынь гэртэхинээ эдихэ. Би таанадые хэһээжэ, амиды үлөөшэ зонииетнай найман зүгөөр тараан сасахаб.

11 Би амиды Бурхан мүн, тиимэһээ Минии ордон онгонуудаараа, муу муухай хэрэгүүдээрээ бузарлаһанайтнай түлөө Би таанадые хайра гамгүй үсөөрүүлхэб. 12 Таанадай гурбанай нэгэ хуби үбшэ хабшанһаа гү, али туража үхэхэ, нүгөөдэ хуби хотын оршон тойрондо һэлмээр сабшуулан хосорхо, үлөөшэ хуби зонииетнай дэлхэйн найман зүгөөр сасан тараажа, һэлмэ далайн, хойноһоонь мүрдэхэб. 13 Иигэжэ уурайнгаа таратар тэдэниие хэһээхэб. Тиихэдэм Минии, Эзэн Бурханай, таанадтай хөөрэлдэһые ойлгохот. 14 Хажуугаартнай гараһан бусад арадууд таанадые шоо үзэхэ, холуур тойрон гарахые оролдохо. 15 Минии шамайе шүүбэрилжэ, уурлан, сухалдан, хэһээн байхада, тойроод шамайе байгааша бусад арадууд һүрдэхэ. Тэдэ ехэ бузартай юумэ хараһандал шам руу хаража, шоо үзэн наадалха. Энэ болбол Би, Эзэн, айладхаа мүн! 16 Би эдеэ хоол таһалдуулжа, гэдэһыетнай ехэ үлдэхөөхэб. Үлэсхэлэн хооһон байдалай хорото годлинуудые таанад руу харбахадамни, туража үхэхэ туйлдаа хүрэжэ, хадхаһан мэтэ үбшэ мэдэрэн байхат. 17 Үхи хүүгэдыетнай үгы хэхыень Би үлэсхэлэн хооһон байдал, ан арьяатаниие таанад руу эльгээхэб. Таанадые хосороохын тула үбшэ хабша, дайн дажар эльгэхэб. Энэ болбол Би, Эзэн, тунхаглана мүн!