Eze 7 | BxrBBL2024 | STEP | Эзэн намда айладхал буулгаа бэлэй.

‏ Ezekiel 7

Гай тодхор ерэхэнь

1 Эзэн намда айладхал буулгаа бэлэй. 2 Тэрэ иигэбэ:

– Хүнэй үри Эзэкээл! Израилиин орон нютаг бүхыдөө хосорон һалахань гэжэ Эзэн Бурхан айладхана гээд ши тунхагла. 3 Израилиин арад түмэн, шинии хосорхо сагшни ерээ. Хэһэн хэрэгүүдыешни, жэгшүүрилтэ муу муухай ябадалайшни түлөө Би шамайе шүүхэб, тиихэдэм ши Минии уур хилэнгые мэдэрхэш. 4 Би шамайе хайрлахагүйб, энэрэл үзүүлхэгүйб, хэһэн хэрэгүүдэйшни хэмээр, жэгшүүрилтэ ябадалайшни түлөө шамайе хэһээхэб. Тиихэдэм таанад Намайе Эзэн гээд мэдэрхэт.

5 Эзэн Бурхан иигэжэ айладхана:

– Гай тодхор дээрэ дээрэһээ таанад руу буужа байна. 6 Эсэслэхэ, дүүрэхэ, һалаха саг ерээ! 7 Газар дэлхэй дээрэ ажаһуугааша бүхы зон, һалаха сагтнай тохёолдоо! Хада ууланууд дээрэ тахил үргэн сэнгэхэ саг дүүрэжэ, хүл үймөөн болохо саг дүтэлбэ. 8 Удахагүй таанад Минии уур хилэнгэй бүхы хүсэ өөр дээрээ мэдэрхэт. Хэһэн үйлэ хэрэгүүдэйтнай хэмээр таанадые хэһээхэб, жэгшүүритэй муухай ябадалайтнай түлөө гэм зэмые өөһэдтэтнай амасуулхаб. 9 Таанадые хайрлахагүйб, энэрэл үзүүлхэгүйб. Хэһэн хэрэгүүдэйтнай хэмээр хэһээхэб, жэгшүүрилтэ хэрэгүүдтнай эли болохо. Тиихэдэ Намайе Эзэн, хэһээлтэ амасуулдаг Эзэн гээд таанад ойлгохот.

10 Хилэнсэгтэ үдэр ерэхэнь! Хүсэрхэлгэ дэлгэрхэнь! Бардамлаха саг мандахань! 11 Хүсэрхэлгэ ехэ олон хорон муу юумэ үйлэдэхэ. Тэдэнэй баялигһаа, яла сала байдалһаа, суу солоһоонь юуншье үлэхэгүй. 12 Тэрэ саг ерэхэнь! Худалдажа абааша, худалдаашашье дэмы оролдолго гаргана, юуб гэхэдэ, Бурханай уур хилэн хүн бүхэн дээрэ бууха. 13 Наймааша ямаршье хүн гээһэн зөөриеэ бусааха саггүй байха, хосорхо, юуб гэхэдэ, Эзэн Бурханай уур хилэн хүн бүхэниие дайраха. Муу ябадалтай зон амиды мэндэ удаан ябахагүй. 14 Бүреэгэй абяан дуулдаха, хүн бүхэн бэеэ зэһэхэ. Харин хэншье дайн дажарта мордохогүй, юуб гэхэдэ, Бурханай уур хилэн хүн бүхэниие дайраха.

15 Байлдаан тулалдаан үйлсэ, талмайнуудаар дэлгэрхэ, үбшэ хабшан, үлэсхэлэн хооһон байдал гэр байранууд соо үзэгдэхэ. Хүдөө нютагуудаар байгааша хүн тулалдаанда алдалан унаха, хото соо байгаашад туража, үбшэлжэ үхэхэ. 16 Талын гулабхаа аад, айжа, хада уула руу ниидээшэ гулабхаа мэтэ зон хаданууд руу гүйлдэн ошохо. Тэдэ бултадаа өөр өөрынгөө гэм бурууе гэмшэн ёололдохо. 17 Бултанай гар һуларжа, үбдэгүүдынь шэшэрэлдэхэ. 18 Тэдэ өөһэдыгөө таараар орёон, айжа шэшэржэ байха. Толгойнуудынь хюһаатай, ехэ доромжолуулагданхай тэдэ байха. 19 Алта, мүнгэеэ тэдэ бог шорой мэтээр газаа хаяха, юуб гэхэдэ, Эзэн Бурханай хилэнсэгтэ үдэр алта, мүнгэниинь тэдэниие абархагүй. Баялигаар тэдэ хүсэлөө бэелүүлжэ шадахагүй, гэдэһээ садхааха бэшэ, алта, мүнгэнһөө боложо тэдэ нүгэл үйлэдөө бшуу. 20 Тэдэ алта, мүнгөөрөө ехэ омогорходог, бардамладаг бэлэй. Жэгшүүрилтэ онгонуудые тэрээгээр бүтээгээ. Тиимэһээ Эзэн баялигыень өөһэдтэнь таарамжагүй жэгшүүрилтэ муухай болгобо.

21 Эзэн Бурхан иигэжэ айладхана:

– Хариин зондо баялигыень үгэхэб. Гэмтэд баялигыень абажа, бузарлаха. 22 Минии үмэгшэлэн хамгаалдаг нангин үргөө руу дээрмэшэдэй орожо, бузарлажа байхада, Би һаалта хэхэгүйб, хамгаалхагүйб. 23 Газар дэлхэй алалсаан хюдалсаанаар дүүрэнхэй, хотонууд хүсэрхэлөөр халинхай, юрэдөө, бүхы юумэн эхи-эмхигүй болоо. 24 Эгээл муу муухай үндэһэ арадуудые иишэнь асархаб, гэр байрануудыетнай эзэмдүүлхэб. Мүргэдэг нангин газарнуудыетнай тэдэ арадууд бузарлаха, тиихэдэ эгээл шанга зонтнай бардамлахаяа болихо. 25 Зоболон ерэжэ байна. Таанад амгалан байдал бэдэрбэшье, олохогүйт. 26 Гай тодхор дээрэ дээрэһээ ерэжэ байха, муу һураг суу хойно хойноһоо дуулдаха. Лүндэншэдые үзэл үзэхыень гуйжа байхат. Санаартан зониие һургаха юушьегүй, аха захатан хэлэхэ нэгэшье зүбшэл заабаригүй байха. 27 Хаан гашуудан уйдан байха, тайжа айн һүрдэхэ, зон айн шэшэрэлдэхэ. Хэһэн үйлэ хэрэгүүдэйтнай хэмээр таанадые хэһээхэб, ондоо зониие яагаад шүүдэг һэмта, тон тиимээр таанадые шүүхэб. Тиигэжэ таанад Намайе Эзэн гээд ойлгохот.