‏ Ezekiel 22

Иерусалим хэһээгдэхэ

1Эзэн намтай дахин хөөрэлдэбэ:

2– Хүнэй үри Эзэкээл, алууршадаар дүүрэһэн хотые ши шүүхэеэ һанана гүш? Хэһэн бүхы жэгшүүрилтэ муухай хэрэгүүдынь тэрээндэ һануулаарай. 3Иерусалим, өөрын зониие алаһанайнгаа, онгонуудта мүргэжэ, бэеэ бузарлаһанайнгаа түлөө хэһээлтэ амасаха сагшни ерэжэ байна. 4Шуһа урдахуулжа гэмтэн болоош, онгонуудта мүргэжэ, өөрыгөө бузарлааш. Хэһээлтэ амасаха сагаа иигэжэ дүтэлүүлбэш. Тиимэһээ Би шамайе бусад үндэһэ яһатадай энеэдэ наадан, бусад орон нютагуудай шоо үзэхэ зүйл болгооб. 5Шамһаа ойро, холо оршогшо орон нютагуудай зон нэрээ хухарһан, хүлгөөтэй үймөөтэй шамайе шоо үзэхэ. 6Израилиин удамаршад өөрынгөө хүсэ шадал алалсаа хэхын лэ түлөө хэрэглэнэ. 7Эхэ, эсэгэеэ хүндэлнэгүйт, ерүүл зониие дарланат, үншэн хэнзые, бэлбэһэн эхэнэрнүүдые харшалнат. 8Нангин газарнуудыем хүндэлнэгүйт, субботын үдэрые сахинагүйт. 9Хүниие алуулха зорилготойгоор худалаар хардагшад таанадай дунда бии, обоонуудые тахин үргэл хээд, онгонуудта үргэһэн үргэлэй мяха эдигшэд, забхай һальхай ябадал үйлэдэгшэд олдохо. 10Абынгаа һамгантай унтаха, һарынхияа үзэжэ байгааша эхэнэртэй хурисалдаха ябадал танай дунда гарана. 11Нэгэнь хүршынгөө һамгантай жэгшүүритэй хэрэг үйлэдэжэ, унтана, нүгөөдынь забхайран, бэреэ бузарлан, унтана, гурбадахинь эгэшэ, дүүгээ хүсөөрөө эдлэнэ. 12Хэнииешьеб алахын тула эдилгэ абагшад, нэгэ угсаатан болохо Израилиин хүндэ мүнгэ зээлеэр үгэжэ, түрэсынь ашаар баяжагшад таанадай дунда бии. Таанад Намайе, Эзэн Бурханиие, мартаат. 13Үнэн зүб бэшэ аргаар олоһон олзо ашаг, алаха ушар тухайтнай дуулахадаа, уур хилэнтэжэ, нюдаргаа үбдэтэрнь сохиноб. 14Таанадай урдаһаа тулахадам, зоригтнай мохожо, гараа үргэхэ хүсэ шадалгүй болоод байхат. Би, Эзэн, айладхаа бол заабол бэелүүлхэб! 15Таанадые үндэһэ яһатадай дундуур сасан тараахаб, ондоо газар нютагуудаар хиидхүүлэн байхаб. Тиигээд бузарлаха ябадалнуудыетнай болюулхаб. 16Үндэһэ яһатанай урда таанад өөһэдыгөө бузарлахат. Тиихэдээ Намайе, Эзэниие, энээниие үйлэдөө гэжэ мэдэхэт.

17Эзэн намда иигэжэ айладхаба:

18– Хүнэй үри Эзэкээл! Израилиин арад түмэн Намда хаягдаса, холисо мэтэ болоо. Зууха соо хайлуулжа, мүнгэ сэбэрлэн илгахада зэд, хүнгэн сагаан, түмэр, туулган амяарлаад үлэдэг гээшэ ааб даа. Тэдээн шэнги хэндэшье хэрэггүй зүйл болоол Израилиин зон! 19Тиигээ хадань Би, Дээдэ Эзэн, тэдэниие бултыень Иерусалим соо суглуулхаб. 20Тэрэ мүнгэ, зэд, түмэр, туулга, хүнгэн сагаае хайлуулхаяа зууха руу хэдэгтэл, Би уур хилэн дундаа тэдэниие суглуулжа, хамта болгоод, хайлуулхаб. 21Тиимэ даа, хамта суглуулаад, уур хилэнгэй галаар тэдээн руу сорьёходом, тэдэ хайлан һалаха. 22Зууха соо мүнгэнэй хайладагтал, тэдэ хайлажа, Минии, Эзэнэй, уур хилэн дундаа өөһэдыень хэһээһые ойлгохо.

23Эзэн намда иигэжэ айладхаба:

24– Хүнэй үри Эзэкээл! Израилиин улад зондо газартнай муу муухай, тиимэһээ Минии, Эзэнэй, тэрэниие хэһээһэн тушаа дуулга. 25Олзоёо зулгаажа, архиржа байһан арсаланда адлил удамаршадынь! Тэдэ зониие алана, үнэтэ сэнтэй юумэ бултыень өөрын болгоно, эрэшүүлые алажа, бэлбэһэн эхэнэрнүүдэй тоо олошоруулна. 26Санаартадынь Минии хуули хазагайруулна, нангин, мүн бэшэ, сэбэр болон сээртэй зүйлнүүдые илгаруулнагүй, иигэжэ нангин зүйлнүүдыем бузарлана. Тэдэ субботые сахинагүй, Намайе хүндэлнэгүй. 27Ноёдынь олзоо зулгаажа байһан шононууд мэтэ. Тэдэ хүниие алажа, баяжана. 28Тиихэдэнь лүндэншэдынь тэрэ нүгэлыень бүглэжэ, худал үзэгдэл хаража, уридшалан хэлэхэдээ, хуурмаг юумэ дуулгана. Дээдэ Эзэн иигэжэ айладхаа гээд тэдэ хэлэнэ, харин Би тэрэ юумыень оройдоошье айладхаагүй бэлэйб. 29Баяшуул арад зониие мүлжэнэ, үгытэйшүүлые, ядуу байдалтай зониие дарлана, ерүүл хүниие худалаар харшална. 30Намда усадхуулхагүйн тула хотые аршалжа, хана бодхоон, һүмэ сохюулһан нүхэндэнь зогсожо, халхалжа байха хүниие тэдэнэй дунда бэдэрээб, гэбэшье олобогүйб. 31Тиимэһээ угаа ехээр уурлажа, Би тэдэниие хэһээхэб, үйлэ хэрэгүүдынь өөһэдынь толгой дээрэ буулгахаб. Энэ болбол Би, Эзэн Бурхан, айладхаа мүн!