‏ Ezekiel 3

1Эзэн Бурхан иигэжэ айладхаба:

– Хүнэй үри Эзэкээл, энэ хуйламал ном эдеэд, ошожо, Израилиин улад зондо айладхал дуулга.

2Тиихэдэнь би амаа ангайжа, Тэрэ намда хуйламал ном эдихыем үгэбэ. 3Эзэн намда иигэжэ айладхаба:

– Хүнэй үри Эзэкээл, зай, Минии үгэжэ байгааша хуйламал ном эди. Өөрынгөө гэдэһэ энээгээр дүүргэ.

Би тэрэнииень эдижэ, тэрэ аман соом зүгын бала мэтэ амтатай байгаа бэлэй. 4Тиигээд Эзэн Бурхан намда иигэжэ айладхал буулгаба:

– Хүнэй үри Эзэкээл, Израилиин улад зондо ошожо, Минии айладхаһан үгэнүүдые дуулга. 5Ойлгохоор бэшэ орёо хэлэтэй арад түмэндэ шамайе эльгээнэ бэшэб, Израилиин улад зондо эльгээнэб. 6Үгыень ойлгомоор бэшэ, хэсүү хэлэтэй, шинии мэдэхэгүй хэлэтэй арад түмэндэ эльгээгээшье һаам, тэдэ шамайе дуулаха бэлэйл. 7Харин Израилиин улад зон шамайе шагнаха хүсэлгүй байха. Юуб гэхэдэ, тэдэ Намайе шагнаха хүсэлгүй. Тэдэ бултадаа үсэд, үгэ дуулахагүй зон. 8Мүнөө хадаа Би шамайе тэдээндэл адли үсэд, хатуу болгохом. 9Хабсагай шулуун мэтэ, ошор шулуун мэтээр шамайе хатуу болгохоб. Тэдэ буһалгаата-хүлгөөтэ зонһоо бү ай.

10Эзэн Бурхан айладхалаа үргэлжэлүүлбэ:

– Хүнэй үри Эзэкээл, Минии шамда айладхаһан үгэнүүдтэ анхарал ехэтэ хандуулжа, бүхөөр хадуужа аба. 11Сүлэлгэдэ байгааша түрэл арадайнгаа хүн зондо ошожо, тэдэнэй дуулаа, үгышье һаа, Минии, Эзэн Бурханай, айладхал дамжуула.

12Удаань Бурханай Һүлдэ намайе өөдэнь үргэжэ, өөрын ара талада нэжэгэнэжэ байгааша иимэ абяа дуулаа һэм: «Тэнгэриһээ дээгүүр Эзэн Бурханай алдар соло үргэгдэхэнь болтогой!» 13Хоорондоо далинуудаараа шүргэсэлдэжэ байгааша амитадай абяа, хажуудань мөөр сахаригуудай ханхинаа, мүн тиихэдэ ехэ нижэгэнэһэн шанга абяа би дуулаа бэлэйб. 14Эзэн Бурханай асари ехэ һүр һүлдэ намайе өөдэнь үргэжэ, би энээндэнь дурагүйлхэн, досоогоо сухалдаа һэм.

15Тиигээд би Хэбаар голой дэргэдэ оршодог Тель-Авивта амидаржа байгааша сүлэгдэгшэд руу ошожо, тэндэ долоон хоногой туршада байжа, мэгдэжэ мэлзэжэ байгаа бэлэйб.

Эзэкээл Бурханай һэргылэлтэнүүдые дамжуулна

16Долоон хоногой үнгэрһэнэй удаа Эзэн Бурхан намда иимэ айладхал буулгаба:

17– Хүнэй үри Эзэкээл! Би шамайе Израилиин арад зониие харууһалха хүн болгон табибаб. Минии һэргылэлтэнүүдые ши тэдээндэ дамжуулжа байхаш. 18Муу ябадалтай хэн нэгэниие «хосорхош!» гэжэ һэргылхэдэмни, ши тэрэниие муу муухай ябадалһаань болюулха гэжэ оролдон һэргылээгүй һаашни, тэрэ нүгэл шэбэлтэеэ зандаа үхэхэ. Гэбэшье тэрэнэй үхэлэй түлөө ши харюусахаш. 19Харин иимэ муу ябадалтаниие шинии һэргылхэдэ, тэрэ муу ябадалһаа эрьеэгүй һаа, өөрөөл нүгэл шэбэлтэй зандаа үхэхэ, ши ямаршье гэм зэмэгүйш!

20Үнэн зүб хэрэгүүдые эрхилдэг хэн нэгэн гэм хэжэ, Минии тэрэниие хэһээхэдэм, хосорхо, урид үйлэдэһэн һайн хэрэгүүдыньшье хараада абтахагүй. Ши тэрэниие һэргылээгүй һаа, тэрэ үйлэдэһэн нүгэлэйнгөө түлөө үхэхэ, тиин үхэлэйнь түлөө шишье зэмэтэй болохош. 21Харин үнэн зүбые эрхилдэг хүниие нүгэл хэхэгүй тухайнь һэргылхэдэш, тэрэ нүгэл шэбэл үйлэдэнгүй байбал, амиды мэндэ үлэхэ, шишье абарагдахаш.

Эзэкээл дуугаржа шадахагүй

22Иигэжэ би тэндэ Эзэн Бурханай агууехэ хүсэ шадал мэдэржэ, иигэжэ айладхахыень дуулабаб:

– Бодоод, тала газар руу гара. Би айладхал тэндэ буулгахамни.

23Тиихэдэнь би тала газар руу ошожо, Хэбаар голой дэргэдэ Эзэн Бурханай алдар соло хараһандал адляар мүн лэ тиимэ алдар соло тэндэ харабаб. Би нюураараа газар шаан унаа һэм. 24Гэбэшье Бурханай Һүлдэ нам руу халин орожо, хүл дээрэм бодхообо. Эзэн Бурхан намда иигэжэ айладхаба:

– Гэртээ ошожо, хороод бай. 25Хүнэй үри Эзэкээл, шамайе аргамжаар хүлихэ. Ши арад зондо гараха аргагүй болохош. 26Энээнһээ гадна Би шинии хэлэ тангалайдаш няалдуулхаб. Ииигэжэ ши хэлэгүй боложо, эдэ буһалгааша улад зониие һэргылхэ аргагүй байхаш. 27Гэбэшье Би шамда айладхал буулгаха үедөө амыеш нээхэб, тиихэдэм ши «Эзэн Бурхан иигэжэ айладхажа байна» гэжэ үгүүлжэ байхаш. Шагнахань шагнаг, үгынь үгы, юрэдөө, тэдэ ехэл буһалгаа хүлгөөтэй арад түмэн гээшэл даа.