‏ Ezekiel 32

Египедэй фараон тушаа гашуудалай дуун

1Вавилоон руу туугдан ошоһоноймнай удаа арбан хоёрдохи жэлэй ябажа байхада арбан хоёрдохи һарын нэгэндэ Эзэн намда иигэжэ айладхаба:

2– Хүнэй үри Эзэкээл! Египедэй хаан фараон тушаа халаглан, Минии иимэ үгэнүүдые тэрээндэ дамжуула: Залуу арсаландал дэлхэй дээгүүр хаа-хаанагүй хэсэн ябанаш,
теэд арсаланшье бэшэ, хүлөөрөө уһа булангиртуулжа байһан
голой крокодил гээшэ аабзаш!
3Би, Эзэн Бурхан, гүльмэ тор шам дээрэ хаян барихаб.
Тиигээд олон ондоо үндэһэ яһатанаар
шамайе эрье тээшэнь татуулан гаргахаб.
4Би шамайе хээрэ тала руу хаяхаб,
тиихэдэм шубуу шонхор, ан арьяатан
үхэһэн бэеыш эдихэ.
5Хада уулаар, гол нюруугаар
һэеыш тараан хаяхаб.
6Шинии шуһан хада уула хүрэтэр газар дүүргэжэ,
гол горход болон урдаха.
7Нара, һарын ялархаяа болиторынь
огторгой болон мүшэдые халхалхаб.
8Орон нютагыетнай шэб харанхы
байдалда оруулан,
огторгой хаб хара болохо.
Энэ болбол Би, Эзэн Бурхан,
айладхана мүн!

9Танай оройдоо мэдэхэгүй хариин улад зондо таанарые һалгааһан тушаа дуулгахадамни тэдэ айн һүрдэхэл. 10Олон үндэһэ яһатад айжа эхилхэ. Шамайе диилэжэ, илалта туйлаһандаа һэлмээ үргэн ялагануулхадам, тэдэ арадуудай хаашуул угаа айжа, шэшэрэн һалганан байха.

11Египедэй фараон, Вавилооной хаан шамда добтолхоёо байна. 12Орон дэлхэйн эгээл хэрзэгы шэрүүн сэрэгшэдэй гарһаа улад зонтнай хосорхо, омогорходог бүхы зүйлтнай һалан һандарха. 13Уһанай хажуугаар бүхы үхэр малыетнай һалгаахаб. Тиихэдэм хүншье, малшье уһа булангиртуулжа байхаяа болихо. 14Уһан номгоржо, гол горход намдуу урдаха. Энэ болбол Би, Эзэн Бурхан, айладхана мүн! 15Египедые хооһон элһэн сүл губи болгон, нэгэшье амиды амитаниие тэндэ үлөөнгүй байхадам, таанад Намайе Эзэн гээд мэдэдэг болохот. 16Энэ болбол таанадта һэргылэлтэ мүн. Хариин улас түрэнүүдэй эхэнэрнүүд Египедэй улад зоной хосорһондо гашуудан, дуун болгон тэрэнээ дуулаха. Энэ хадаа Би, Эзэн Бурхан, айладхана мүн!

17Тэрэл һарын арбан табанда Эзэн намда иигэжэ айладхаба:

18– Хүнэй үри Эзэкээл! Египедэй улад зон тушаа гашуудан уйла. Удаань үхэлэй орон руу тэдэниие эльгээ, тэндэ тэдэ хүсэтэй шанга арадуудай улад зонтой хамта хэбтэхэл. 19Тэдээндэ иигэжэ дуулгаарай: «Бусадһаа үлүү һайхамби гэжэ һанаа гүт? Үхэхэдөө, доодо замбида ошоод, Бурхангүй зонтой хамта хэбтэхэт.

20Байлдаануудта алуулһан зонтой хамта таанад мүн алуулан унахат. Һэлмэ болбол бүгэдые сабшахаар бэлэн. 21Эгээл ехэ баатарнууд болон танай тала барин дайлалдагша зон үхэлэй орон руу таанадые урин байна».

22Тэндэ Ассириин сэрэгшэдэй хүүрнүүд бии юм. Тэдэ хадаа дайн дажарта алуулаа. 23Амиды мэндэ байхадаа тэдэ дэлхэйн арадуудые угаа һүрдөөдэг бэлэй. Мүнөө хуурсагуудынь үхэлэй ороной эгээл доодо газарта табяатай, тэдэ бүгэдэ дайн дажарта алдалан унаа бэлэйл. 24Элаамай сэрэгшэдэй хүүрнүүд мүн лэ тэндэ байна. Тэдэ бултадаа дайн дажарта алуулаа, бурхангүй үхэлэй орон руу доошолон буугаа. Амиды мэндэ байхадаа тэдэ зониие ехэ айлгадаг бэлэй, харин мүнөө үхэнхэй, бузарлагданхай хэбтэнэ. 25Дайн дажарта алуулһан зоной дунда тэдэ хэбтэнэ, хуурсагуудынь дүхэриглэн табяатай. Буян бурхангүй зоной дунда хэбтэжэ, эшхэбтэр байра байдалаа тэдэ дүүрэн амасаа. 26Мээшэх болон Тубаалай сэрэгшэдэй хүүрнүүд мүн лэ тэндэ юм. Буян бурхангүй тэдэнэр бусад зониие ехэ айлган һүрдөөн байгаа, удаань булта дайн дажарта алуулаа. 27Дайн дажарай зэр зэбсэгтэйнь хамта, тэрэ тоодо һэлмыень толгой доронь хэжэ, хүдөөлүүлһэн баатарнуудтал адляар тэдэниие хүдөөлүүлөө бэшэ. Харин тэдэ баатарнууд дайсадаа угаа ехээр һүрдөөгшэ бэлэйл. 28Египедэй зон, таанад диилдэжэ, дайнда алуулһан, буян бурхангүй сэрэгшэдтэй хамта хүдөөлүүлэгдэхэт. 29Эдоомой хаашуулай болон хамаг ноёдойнь хүүрнүүд мүн лэ тэндэ байна. Тэдэ шадалтай зон байгаа. Гэбэшье мүнөө үхэлэй орон соо бурхангүй, дайн дажарта алуулһан сэрэгшэдтэй хамта хүдөөлүүлэгдөө. 30Хойто зүгэй зонхилогшодой, мүн Сидоонойшье зоной хүүрнүүд бултадаа тэндэ юм. Хэзээ нэгэтэ шадалтай ехэ сэрэгынь дайсадаа угаа һүрдөөгшэ бэлэй. Мүнөө тэдэ үхэлэй орондо хүдөөлүүлэгдэн, дайн дажарта унаһан бусад сэрэгшэдтэл адли нэрээ хухаранхай юм.

31Эзэн Бурхан иигэжэ айладхана:

– Танай фараон эдэ хүүрнүүдые харахадаа, ганса Египедэй сэрэгэй бэшэ, ондоошье арадуудай иимэ байдалда ороһондо сэдьхэлээ заһан байха. 32Би тэрэниие амиды зондо сүйд хэжэ байхыень баадхаа һэм, харин мүнөө фараон өөрөө сэрэгтэеэ хамта алуулжа, дайнда алдалан унаһан, бурхангүй сэрэгшэдэй дунда хүдөөлүүлэгдэхэ. Энэ хадаа Би, Эзэн Бурхан, айладхана мүн!