‏ Ezekiel 35

Сэһиир нютаг хооһорхо

1Эзэн намда иигэжэ айладхаба:

2– Хүнэй үри Эзэкээл, Сэһиирэй зониие шүүмжэлэ. 3Тэдээндэ Минии иигэжэ айладхаһые хэлэ: Би, Эзэн Бурхан, урдаһаатнай тулахаб! Орон нютагыетнай хубхай хооһон тала болгохоб! 4Хотонуудыетнай һандаргаахаб, газар дайдатнай хооһорхо, тиихэдэ Намайе Эзэн гээд мэдэхэт. 5Эдоомой улад зон, Израилиин арад түмэнтэй үни заяанһаа хойшо дайсад бэлэйт. Тэдээнтэй гай тодхорой тохёолдоходо юушье хээгүй, миин лэ хаража байгаат. 6Би, Эзэн Бурхан, Өөрөөрөө тангаригланаб: алахадаа бэрхэ хадаш өөрыешни үхэл хатал һалан һандангүй хойноһоош дахаха. 7Сэһиир оронииетнай зэлүүд хооһон болгожо, дээгүүрнь гарааша амитан бүхэниие алахаб. 8Үхэһэн зонойтнай бэенүүд хада уула, гол нюруу дүүрэн болохо. 9Газар уһантнай хэтэ мүнхэдөө хооһон байха, хотонуудаартнай хэншье дахин ажаһуухагүй. Эгээл тиихэдэ Намайе Эзэн гэжэ ойлгохот. 10Иудын хан түрэ болон Израиль манай болохо, газарыень эзэмдэн ажаһуухабди гээд хэлээ бэлэйт. Харин Би, Эзэн, тэдэнэй Бурхан байнаб. 11Өөрөөрөө тангаригланаб: Минии арад түмэниие үзэн ядадаг, атаархадаг байһанайтнай хэмээр Би өөһэдыетнай хэһээхэб! Таанадые хэһээжэ байһыемни Израилиин улад зон хараха. 12Израилиин орон нютагай һалажа хооһоржо байһан тушаа баһажа хэлэһыетнай Минии шагнаһые таанад ойлгохот. 13Нам тушаа ехэрхэжэ бардамлажа хэлэхыетнай Би шагнаһан байнаб. 14Таанадые һалгаажа байхадам, дэлхэйн бүхы зон баярлаха. 15Израилиин һалан һандаржа байхада баясажа байгаа бэлэйш. Тон тиимэ юумэн шамтай тохёолдохо: Сэһиирэй хадалиг улас, хамаг Эдоом орон нютаг хооһорон һандарха. Тиихэдэ хүн бүхэн Намайе Эзэн гээд ойлгохо.
Copyright information for BxrBBL2024