Eze 4 | BxrBBL2024 | STEP | Эзэн Бурхан иигэжэ айладхаба: – Хүнэй үри Эзэкээл, хирпиисэ абажа, урдаа табяад, Иерусалим хотын дүрсэ дээрэнь зура.

‏ Ezekiel 4

Иерусалим хотын ерээдүй бүһэлэлтэ тухай

1 Эзэн Бурхан иигэжэ айладхаба:

– Хүнэй үри Эзэкээл, хирпиисэ абажа, урдаа табяад, Иерусалим хотын дүрсэ дээрэнь зура. 2 Тэрэниие тойроһон бүһэлэлтэ, ханануудые, тойроод обоолһон шорой, хотон хүреэнүүдые, хэрэм эбдэдэг түхеэрэлгэнүүдые зураарай. 3 Удаань түмэр хайруулга абажа, шинии болон хотын хоорондохи хана мэтээр табяарай. Тиигээд тэрэ хотодо добтолон оро. Тэрэ хото бүһэлжэ, добтолоорой. Энэ болбол Израилиин арад түмэндэ дүлгэ тэмдэг болохо юм.

4 Тиигээд ши зүүн таладаа хэбтэжэ, Израилиин арад зоной гэм зэмые өөр дээрээ даажа хэбтэхэш. 5 Хэдэн олон жэлнүүдтэ, түхэреэн жэлдээ, гурбан зуун ерэн хоногой туршада ши хажуулдин хэбтэжэ, тэдэнэй гэм зэмые амасан байхаш. 6 Энээнэй дүүрэһэнэй удаа баруун таладаа эрьелдэжэ, жэлһээ жэлдэ, жэлдээ дүшэн үдэрэй туршада, гэм зэмэйнь түлөө хэһээлтэ амасан байхаш.

7 Бүһэлэгдэһэн Иерусалим руу эрьежэ, гараа тэрээн руу һунган, Иерусалим тушаа уридшалан айладхаарай. 8 Хараарай, аргамжаар Би шамайе хүлихэб, тиихэдэмни, ши бүһэлэлтын дүүрэтэр нэгэ хажууһаа нүгөө хажуу тээшээ эрьелдэжэ шадахагүй байхаш.

9 Шэниисэ, ешмээн, горох, зарма, шара будаа болон хара будаа абажа, хамта худхаад, хилээмэ баряарай. Тэрэ гурбан зуун ерэн үдэрэй туршада зүүн таладаа хэбтэхэ үедөө ши энээнииел эдихэ ёһотойш. 10 Үдэртөө шамда хорин шээкэлэй хоол үгтэхэ. Энэ хадаа үглөөдэр болотор шамда хүрэдэг байха. 11 Хоёр аяга уһан шамда үгтэдэг байха. Үглөөдэр болотор энэ шамда хүрэхэ ёһотой. 12 Хүнэй хатаһан бааһаар гал түлижэ, тэрэ гал дээрээ хилээмэ шаран болгожо, зоной хараһаар байтар эдидэг байха ёһотойш.

13 Эзэн Бурхан үргэлжэлүүлэн иигэжэ айладхаба:

– Хариин арад зон руу Минии сүлэн эльгээхэдэ, Израилиин арад түмэн иигэжэ гажа буруу юумэ хэжэ, сээртэй бузартай эдеэ хоол тэндээ иигэжэ барижа байхал.

14 Гэбэшье би иигэжэ харюусабаб:

– Хайрлыт, Эзэн Бурхан! Би өөрыгөө хэзээдэшье бузарлаагүй бэлэйб. Бага наһанһаа хойшо би үхэһэн малай һэе гү, али арьяатанда барюулһан амитанай хүүр хэзээдэшье эдижэ үзөөгүйлби. Сээртэй ямаршье эдеэ хоол баряагүйлби.

15 Тиихэдэмни Эзэн Бурхан:

– Зай, тиигэбэл, хүнэй бааһанай орондо шамда үхэрэй аргал үгэнэб. Тэрэниие шатаажа, гал дээрэнь хилээмэ болгоходошни болохо, – гэжэ айладхаба.

16 Тиигээд Тэрэ иигэжэ нэмэбэ:

– Хүнэй үри Эзэкээл! Иерусалимда эдеэ хоол хомор болгохо гэжэ байнаб. Эдихэ хоолоо, ууха уһаяа хэмжэжэ эхилхэдээ, зон ехэ уйдан һанаагаа зобохо. 17 Эдеэ хоолынь, уһаниинь дуталдажа, зон аргагүйдэжэ, гэм зэмэйнгээ түлөө хосорхо.