Ezr 1 | BxrBBL2024 | STEP | Персиин хаан Киирэй түрүүшын жэлээ хааншалжа байхада Ерэмияагаар дамжуулһан үгэнүүдэйнгөө бэелүүлэгдэхын тула Эзэн Кииртэ нүлөө үзүүлжэ, тэрэ бүхы хаан түрөөрөө бэшэмэл аргаар болон үгэнүүдээр иигэжэ тунхаглахые захирба:

‏ Ezra 1

Киир хаанай захиралта

(2 Уг 36:22-23)

1 Персиин хаан Киирэй түрүүшын жэлээ хааншалжа байхада Ерэмияагаар дамжуулһан үгэнүүдэйнгөө ^{▼▼ Хара Ер 29:10.} бэелүүлэгдэхын тула Эзэн Кииртэ нүлөө үзүүлжэ, тэрэ бүхы хаан түрөөрөө бэшэмэл аргаар болон үгэнүүдээр иигэжэ тунхаглахые захирба:

2 «Персиин хаан Киир иимэ зарлиг буулгана: Огторгойн Эзэн Бурхан газар дэлхэйн бүхы хаан түрэнүүдые минии мэдэлдэ үгөө. Иудын Иерусалимда Тэрээндэ шүтэн мүргэдэг Һүмэ барихыемни Тэрэ захираа. 3 Эзэн Бурханай арад зонһоо хэн байнаб, тэдэ Иудын газарта, Иерусалим хото ошожо, Израилиин Эзэн Бурханай һүмын барилгада хабаадалсаг. Бурханиинь тэдээнтэй хамта байхань болтогой! 4 Харин арадһаа үлэгшэдтэ бултандань, хаанашье байгаа һаань, нютагай зон алта мүнгөөр, үхэр малаар, мүн ондоошье зөөри зөөшөөр, Иерусалимдахи Бурханай һүмын барилгада ехэ үргэл хэжэ туһалалсаг».

Бусаха замдаа бэлэдхэл

5 Иудын, Бэньямиинэй уг гарбалай аха заханар, санаартад болон левидүүд, мүн Бурханай зүрхэ сэдьхэлынь зоригжуулһан бусадшье хүнүүд Эзэнэй һүмэ барилсахаяа Иерусалим тээшэ түхеэрбэд. 6 Нютаг зон һүмын үргэлдэ нэмэри оруулһанһаа гадна мүнгэн амһартануудые, алтан болон бусад үнэтэ хэрэгсэлнүүдые, үхэр мал үгэбэ.

7 Персиин хаан Киир Иерусалимһаа өөрынгөө бурханай һүмэдэ Навуходоносорой абаашажа табиһан Эзэнэй һүмэдэ хабаатай бүхы амһартанууд болон эд хэрэгсэлнүүдые 8 үнэтэ хэрэгсэлнүүдэйнгээ сан баригша Митрэдаадаар гаргуулжа, тэрэнь Иудын тайжа Шэшбаццаарта бүрин тоогоорнь тушаажа үгэбэ. 9 Тэдэнииень тоолон нэрлэбэл: гушан алтан табаг, нэгэ мянга хори юһэн мүнгэн табаг, 10 гушан алтан аяга, дүрбэн зуун арбан мүнгэн аяга ба мянган бусад амһартанууд.

11 Бүхы алтан, мүнгэн амһартануудынь табан мянга дүрбэн зуу байба. Вавилоонһоо Иерусалим тээшэ нүүлгэнэй болоходо, эдэ бүгэдые Шэшбаццаар абажа ерэһэн юм.