Ezr 10 | BxrBBL2024 | STEP | Бурханай гэрэй урда Эзраагай гуйжа, мүргэжэ, һүгэдэжэ, бархиржа байхада израильшууд – эрэшүүл, эхэнэрнүүд, үхибүүд гэхэшэлэн олон зон суглараад, ехээр бархиралдаа.

‏ Ezra 10

Буса түрэлтэ һамгад тухай асуудал шиидхэлгэ

1 Бурханай гэрэй урда Эзраагай гуйжа, мүргэжэ, һүгэдэжэ, бархиржа байхада израильшууд – эрэшүүл, эхэнэрнүүд, үхибүүд гэхэшэлэн олон зон суглараад, ехээр бархиралдаа. 2 Элаамай угай Ехиһээлэй хүбүүн Шэханьяа Эзраада хэлэбэ:

– Буса түрэлхитэдэй басагадаар һамга хэһэндээ бидэ Бурханай урда гэмтэйбди, гэбэшье Израильда найдал бии. 3 Бидэ Бурхантайгаа хэлсээ баталая. Бурханайгаа хуули заршамые һайхашаан хүндэлдэг танай заабари даган, бидэ бултадаа һамгадаа түрэһэн үхибүүдтэйнь түрхэмүүдтэнь ябуулаябди. Тиихэдэ булта хуулита ёһоороо болохол! 4 Эзраа, энэ шинии шиидхэхэ хэрэг, бидэ шинии үгөөр ябахабди. Бодожо, зоригтойгоор хэлэ!

5 – Мүнөө «хэлэһэн үгэдөө хүрэхэбди» гэжэ тангариг үргэгты, – гэжэ Эзраа санаартадай толгойлогшонорто болон левидүүдтэ, бүхы израильшуудта захирба. Булта тангариг үргэбэд. 6 Бурханай гэрэй хажууһаа Эзраа бодожо, Элиашиибай хүбүүн Ёханаанай гэртэ ерэбэ. Тэрэ хилээмэшье эдеэгүй, уһашье уугаагүй, юундэб гэхэдэ, нүүжэ ерэгшэдэй гэм зэмэтэ ябадалнуудһаа гашуудажа, бархиржа ябаа.

7 Бүхы Иуда болон Иерусалимаар иимэ зар тунхаглагдаба: «Баряанһаа бусагшад Иерусалимда суглараг. 8 Гурбан хоногой туршада хэн тэндэ ерэнэгүйб, ноёдой болон аха заханарай шиидхэбэреэр, гэр бүлэдэнь үзэн ядама хараал шэнгээхэ, харин өөрыень нүүжэ ерэгшэ ниитэ зонһоо холодуулха». 9 Иуда болон Бэньямиинтэнэй газарай зон гурбан хоногой туршада Иерусалимда булта сугларба. Энэ юһэдэхи һарын ^{▼▼ Хислээб һара – ноябрь-декабрь.} хориной үдэр һэн. Бурханай гэрэй урдахи талмай дээрэ бүхы зон хүйтэн борооһоо ба боложо байгаа үйлэ хэрэгһээ шэшэрэлдэн һуугаа һэн.

10 Санаартан Эзраа бодожо, тэдэндэ хэлэбэ:

– Таанар буса түрэлтэнэй басагадаар һамга хэһэндээ гэмдэ оробо гээшэт, тиигэжэ бүхы Израилиин гэм зэмые арьбадхабат. 11 Мүнөө Эзэнэйнгээ урда, эсэгэнэрэйнгээ Бурханай урда, гэмээ наманшалагты, Тэрэнэй хүсэл бэелүүлэгты, ондоо газарай зонһоо, буса түрэлтэ һамгадһаа өөрыгөө холодуулагты!

12 Тэндэ сугларһан зон булта шанга дуугаар харюусаба:

– Шинии хэлэһэн юумые гүйсэд бүтээхэбди. 13 Зүгөөр газаа бороотой, удаан байхын аргагүй, олон хүнэймнай гэмдэ ороһон тула нэгэ-хоёр үдэрөөр бүтэхэ хэрэг бэшэл. 14 Тиимэһээ зонойнгоо орондо ноёднай оролдог лэ. Энэ хэрэгэй түлөө Эзэнэймнай уур сухалай салгидаа үдыдэ буса түрэлтэ һамга абаһан хүнүүд ноёнтоёо, заргашадтаяа өөр өөрынгөө хотоһоо эндэ ерэжэ, хэрэгээ шиидхүүлэг лэ.

15 Тиихэдэнь Асаһээлэй хүбүүн Ёнатаан, Тикваагай хүбүүн Яхзэйя гэгшэд энэ хэрэгые буруушааба, Мэшуллаам ба левит Шэббэтай тэдэниие дэмжэбэ.

16 Баряанһаа нүүжэ ерэгшэд дээрэ хэлэгдэһэн ёһоор болобо. Санаартан Эзраа уг бүхэнһөө гулбаанарые нэрээрнь дуудан, энэ хэрэг хүтэлхөөр томилбо. Эдэ хэрэг шиидхэхэ түрүүшынгээ суглаа арбадахи һарын ^{▼▼ Тэбээт һара – декабрь-январь.} нэгэн шэнэдэ нээбэ. 17 Буса түрэлтэ һамга абаһан бүхы хүнүүдэй хэрэгүүд нэгэдэхи һарын түрүүшын үдэр харагдажа дүүрэбэ.

Буса түрэлтэ һамга абаһан санаартадай нэрэнүүд

18 Буса түрэлтэдэй басагаар һамга хэһэн хүбүүд санаартадайшье дунда олдоо – Ёцадаагай хүбүүн Иисүүсэй болон аха дүүнэрэйнь хүбүүд: Маашэяа, Элиээзэр, Ярииб, Гэдаалияа. 19 Тэдэ гараа табижа, һамгадаа ябуулхабди гэжэ найдуулба, хэһэн гэмэйнгээ түлөө үргэл хэхэ хони асарха болобо. 20 Иммээрэй хүбүүдһээ: Ханаани, Зэбаадьяа. 21 Хариимай хүбүүдһээ: Маашэяа, Элияа, Шэмаяа, Ехиһээл, Уззияа. 22 Пашхуурай хүбүүдһээ: Эльйоэнай, Маашэяа, Ишмаһээл, Нэтанээл, Ёзабаад, Элэасаа. 23 Левидүүдһээ: Ёзабаад, Шимэй, Кэлайяа, тэрэ үшөө Кэлитаа гэжэ нэрэтэй, Пэтаахияа, Иуда, Элиээзэр. 24 Дуушадһаа: Элиашииб. Үүдэ һахигшадһаа: Шаллуум, Тээлэм, Үрии.

25 Бусад израильшуудһаа: Пароошой хүбүүдһээ Рамияа, Иззияа, Малхияа, Миямиин, Эльазаар, Малкийя, Бэнайяа; 26 Элаамай хүбүүдһээ Маттаанияа, Захарияа, Ехиһээл, Абдии, Ерэмоот, Элияа. 27 Заттуугай хүбүүдһээ Эльйоэнай, Элиашииб, Маттаанияа, Ерэмоот, Забаад, Азизаа. 28 Бэбэйн хүбүүдһээ Ёханаан, Ханаанияа, Заббай, Атлай. 29 Баниин хүбүүдһээ Мэшуллаам, Маллуух, Адаяа, Яшууб, Шэһаал, Рамоот. 30 Паһаат-Моһаабай хүбүүдһээ Аднаа, Хэлаал, Бэнайяа, Маашэяа, Маттаанияа, Бэцалээл, Биннуй, Мэнашшээ. 31 Хариимай хүбүүдһээ Элиээзэр, Ишшияа, Малхияа, Шэмаяа, Симеон, 32 Бэньямиин, Маллуух, Шэмаарияа. 33 Хашуумай хүбүүдһээ Маттэнай, Маттаттаа, Забаад, Элипээлэт, Ерэмай, Мэнашшээ, Шимэй. 34 Баниин хүбүүдһээ Маадай, Амраам, Уээл, 35 Бэнайяа, Бэдияа, Хэлүһүү, 36 Бании, Мэрэмоот, Элиашииб, 37 Маттаанияа, Маттэнай, Яасуу. 38 Биннуйн хүбүүдһээ Шимэй, 39 Шэлээмияа, Натаан, Адаяа, 40 Махнадбай, Шашай, Шарай, 41 Азарээл, Шэлээмияа, Шэмаарияа, 42 Шаллуум, Амарияа, Иосиф. 43 Нэбоогой хүбүүдһээ Еиһээл, Маттиитияа, Забаад, Зэбинаа, Яддай, Ёһээл, Бэнайяа.

44 Эдэ бүгэдэ буса түрэлтэдэй басагадаар һамга хэһэн, зариманайнь һамгад тэдэндэ үхибүү түрэжэ үгэһэн байгаа.