Ezr 3 | BxrBBL2024 | STEP | Долоодохи һара гараба. Израильшууд өөһэд өөһэдынгөө хотонуудта ажаһуужа байгаа. Тиихэдээл нэгэн хүн шэнги эбтэйгээр булта Иерусалим хотодо сугларбад.

‏ Ezra 3

Үргэлэй шэрээ бүтээлгэ

1 Долоодохи һара ^{▼▼ Тишри һара – сентябрь-октябрь.} гараба. Израильшууд өөһэд өөһэдынгөө хотонуудта ажаһуужа байгаа. Тиихэдээл нэгэн хүн шэнги эбтэйгээр булта Иерусалим хотодо сугларбад. 2 Ёцадаагай хүбүүн Иисүүс санаарта аха дүүнэртэеэ, мүн Шалтиээлэй хүбүүн Зэрубабээл аха дүүнэртэеэ хамһажа, Израилиин Бурханда түгэс шатаалта үргэл үргэхын тула Моисейн хуулида бэшэгдэһэнэй ёһоор үргэлэй шэрээ дархалбад. 3 Буса газарай зонһоо айжа байбашье, үргэлэйнгөө шэрээ анханай һууридань табижа, үдэшэ, үглөө бүхэндэ Эзэндээ түгэс шатаалта үргэлөө үргэжэ эхилбэд. 4 Тэдэ үдэр бүхэндэ түгэс шатаалта үргэл үйлэдэжэ, үдэр үдэртэнь бүтээдэг ёһо гуримаарнь Майханай һайндэрые үнгэргэбэд. 5 Энээнһээ удаалан түгэс шатаалта үргэл бүтээлгэ болобо, һарын шэнэдэшье, Эзэндэ зорюулагдаһан һайндэрнүүдтэшье, али хэн нэгэнэй Эзэндээ һайн дураараа үргэл үргэхэдэшье, түгэс шатаалта үргэл үргэжэл байба. 6 Долоодохи һарын нэгэн шэнын үдэр Эзэндээ түгэс шатаалта үргэл үргэжэ эхилээ һэн. Тиихэдэ Эзэнэй һүмын һуури үшөө табигдаадүй байгаа.

7 Тиигээд шулуу хайгшадта болон модошо дархашуулда сагаан мүнгэн үгтэбэ, Персиин хаан Киирэй зүбшөөлөөр Ливаанһаа далайгаар Яафа хүрэтэр үнэтэ хуша модо асаруулхын тула Сидооной болон Тиирэй зондо эдихэ ууха юумэ, оливын тоһо үгэдэг болобо.

Һүмын һуури табилга

8 Бусагшадай Иерусалимдахи Бурханай гэртэ хүрэһэн сагһаа хойшо, удаадахи жэлэйнь хоёрдохи һарада ^{▼▼ Ияр һара – апрель-май.} Шалтиээлэй хүбүүн Зэрубабээл, Ёцадаагай хүбүүн Иисүүс, тэдэнэй бүхы аха дүүнэрынь, санаартад болон левидүүд гэхэшэлэн баряанһаа бусаһан зон булта Һүмэ барилгын эхи табиба. Эзэнэй һүмэ барилгын хүдэлмэри хинан шалгахаар хоринһоо дээшэ наһатай левидүүдые томилбо. 9 Иисүүс өөрынгөө хүбүүдтэй, мүн аха дүүнэртэеэ, Кадмиһээл хүбүүдтэеэ, Иудын үринэр Бурханай гэрэй барилга хэгшэдэй ажал хамта хинан шалгажа эхилбэ. Тэдэнтэй суг Хэнадаадай үринэр, түрэл гаралынь, левидүүд хүдэлөө. 10 Эзэнэй һүмын һуури барилгашадай табижа дүүргэхэдэ, санаартад санаартанайнгаа хубсаһа үмдэжэ, Эзэнэйнгээ алдар солые Израилиин хаан Давидай табиһан хуули ёһоор дуудахын тула, санаартад бэшхүүрнүүдээ, левидүүд, Асаапай хүбүүд, дэмшэнүүдээ бариба. 11 «Магтагты!», «Эзэн Бурханаа алдаршуулагты!», «Энэрхы хадаа Тэрэ Израилиие хододоо үмэгшэлхэ!» гэхэшэлэн олон магтаал дуунуудые дуулабад. Эзэнэй һүмын һууриин табигдаһантай дашарамдуулан бүхы зон Эзэндээ соло магтан хашхаралдаба.

12 Түрүүшын Һүмын һайханиие хараһан үндэр наһатай санаартад, левидүүд, удамай түрүү аха заха үбгэд шэнэ Һүмын һуури харахадаа, эзэлүүдгүй шангаар бархиралдаба, олонхинь баяраа багтаажа ядан шангаар хашхаралдаба. 13 Хэнэй баярлаһые, хэнэй бархирһые илгаруулхын огто аргагүй, бүгэдын бар хашхараанһаа холо саагуур сууряатан газар доһолжо байгаа һэн.