Ezr 4 | BxrBBL2024 | STEP | Сүлэлгэ баряанһаа бусагшад Эзэндээ, Израилиин Бурханда, Һүмэ барижа байна гэжэ Иудатанай, Бэньямиинтэнэй дайсад дуулаба.

‏ Ezra 4

Дайсадай туһалха гэһэн мэдүүлгэ

1 Сүлэлгэ баряанһаа бусагшад Эзэндээ, Израилиин Бурханда, Һүмэ барижа байна гэжэ Иудатанай, Бэньямиинтэнэй дайсад дуулаба. 2 Тиигээд Зэрубабээл болон угуудай гулбаануудта тэдэ ерэжэ:

– Энэ Һүмыетнай бидэ тантай хамта барилсаябди. Тантай адли бидэ танай Бурханда мүргэнэбди. Маниие иишэ асарһан Ассириин хаан Эсархаддооной үеһөө тооложо, үргэл Тэрээндэ үргэнэбди, – гэбэ.

3 – Манай Бурханда мантай хамта таанар Һүмэ барилсахагүйт. Персиин хаан Киирэй захирһанай ёһоор, Израилиин Бурханда бидэ өөһэдөө Һүмэ барихабди, – гэжэ Зэрубабээл, Иисүүс болон Израилиин угуудай гулбаанар арсалта хэбэ.

4 Тиихэдэнь тэрэ газарай зон Һүмэ барилгада али болохоор һаалта хэдэг, Иудын зоной хүсэ шадалыень бууруулха гэжэ оролдодог болобо. 5 Персиин ноёд, түшэмэлнүүдтэ эдилгэ үгэжэ, хаан Киирэй байхаһаа эхилээд, Персиин Даарий хаанай хан шэрээдээ һууха хүрэтэр тэрэ барилга урагшань ябуулаагүй юм.

Хаанда хоб орожо, барилга зогсоогдобо

6 Хаан түрэеэ Ахашвероошой һая эзэлээд байхада Иудын газарта, Иерусалимда ажаһуугшадые гэмнэжэ, дайсалагша зон гомдол бэшэһэн юм. 7 Артагсээрэгс хаанай хан шэрээдэ һууха үедэ Бишлаам, Митрэдаат, Табээл гэгшэд бусад нүхэдтэеэ Персиин хаан Артагсээрэгстэ гомдол эльгээһэн байгаа. Тэрэ бэшэгынь араам хэлээр, араам үзэгөөр бэшэгдэнхэй һэн.

8 Тиихэдэ захирагша Рэхүүм бэшээшэ Шимшай хоёр Иерусалимайхидта эсэргүү үшөө нэгэ бэшэг Артагсээрэгс хаанда эльгээбэ: 9 «Динайнуудай, афарсатхайнуудай, тарпэлайнуудай, апарсуудай, аркевайнуудай, вавилоонойхидой, сүүзынхидэй, дэһайнуудай, элаамайхидай удамаршад болон 10 агууехэ хаан Аснаппаарай Самариин хотонуудаар, Евфрат мүрэнһөө баруулжаа нютагуудаар нүүлгэһэн бусадшье арадуудай түлөөлэгшэдэй зүгһөө захирагша Рэхүүм, бэшээшэ Шимшай гэгшэд бусад нүхэдтэеэ бэшэнэбди». 11 Тэдэнэй эльгээһэн бэшэгэйнь буулгабаринь иимэ: «Евфрат мүрэнһөө баруулжаа нютагуудаар ажаһуудаг танай албата зонһоо эзэн хаан Артагсээрэгсдэ. 12 Эзэн хаамнай мэдэжэ абыт. Танһаа гараад, наашаа нүүжэ, манда Иерусалим ерэһэн энэ буһалгаата иудейнүүд барилга хэжэ, хүреэлһэн хана бодхоожо байнал. Һуурииень табижа дүүргээ. 13 Эзэн хаамнай оюун ухаандаа ойлгожо абыт. Хэрбээ энэ муу зонтой хотынхид хотоёо барижа, хотын хана бодхоожо дүүргэбэл, алба татабаринуудаа түлэхэеэ арсажа, эзэн хаанаймнай жасада горитой хохидол оруулхал. 14 Хаанай ордонһоо ажамидаржа байдаг бидэ эзэн хаанайнгаа һан жасын үригдэхэ ушарые тэсэхэ аргамнай үгы. Ушар тиимэһээ энэ бэшэг эльгээбэбди. 15 Танай эсэгэнэрэй бэшэһэн дэбтэрнүүдые бэдэрүүлжэ, тэмдэглэлнүүдыень шэнжэлхэдээ, үнинһөө хойшо хаануудай урдаһаа буһалгаалдаг муу зонтой хото байгаа гэжэ мэдэхэлта. Тиимэл хадаа һандаргагдаһан байгаа гэбэ. 16 Ушар тиимэһээ, энэ хотын һэргээн баригдажа, хүреэлһэн ханаяа бодхооболнь, Евфратһаа баруулжанхи газартнай танай мэдэлһээ гараха байха гэжэ мэдүүлнэбди».

17 Захирагша Рэхүүмдэ, бэшээшэ Шимшайда, Самари болон Евфратһаа баруулжанхи хотонуудта ажаһуудаг бусад нүхэдтэ хаан харюу эльгээбэ: «Амар сайн! 18 Эльгээһэн бэшэгтнай оршуулагдажа, минии урда тодо һонороор уншагдаа. 19 Намһаа захиралта үгтэжэ, бэдэрэгдэжэ, энэ хото эртэ сагһаа урда тээхи хаашуулай урдаһаа бододог, буһалгаа үйдхэдэг байһаниинь мэдэгдээ. 20 Евфратһаа баруулжанхи газарнуудые эзэмдэжэ, алба, татабари абажа байһан хүсэтэй хаашуул Иерусалимда байһан гэжэ элирээ. 21 Барилга хэхэеэ болигты гэжэ эдэ зондо захиралта үгэгты. Минии зүбшөөл үгөөгүй сагта энэ хото баригдаха ёһогүй. 22 Харин жэншэдгүй энээниие гүйсэдхэгты, үгы бол, ехэ хохидол гаража, хаан түрэдэ муу юумэн ушарха».

23 Захирагша Рэхүүм, бэшээшэ Шимшай болон тэдэнэй бусад нүхэд Артагсээрэгс хаанай бэшэг уншаһан дары тэдэ Иерусалим хотын иудейнүүдтэ ошожо, сэрэгэй хүсөөр тэдэнэй ажал тогтообо. 24 Тиигэжэ Иерусалимдахи Бурханай һүмын барилга зогсошоо. Персиин Даарий хаанай хан шэрээдэ һууһаар хоёрдохи жэл болотор иимэ байдал үргэлжэлөө юм.