Ezr 5 | BxrBBL2024 | STEP | Лүндэншэ Хаггай ба Иддоогой хүбүүн лүндэншэ Захарияа гэгшэд Израилиин Бурханай нэрэһээ Иудын нютагта, Иерусалимда байһан иудейнүүдтэ абарал, лундэн дуулгажа эхилбэ.

‏ Ezra 5

Хаггай болон Захарияагай үедэ Һүмэ барилга

1 Лүндэншэ Хаггай ба Иддоогой хүбүүн лүндэншэ Захарияа гэгшэд Израилиин Бурханай нэрэһээ Иудын нютагта, Иерусалимда байһан иудейнүүдтэ абарал, лундэн дуулгажа эхилбэ. 2 Тиихэдэнь Шалтиээлэй хүбүүн Зэрубабээл, Ёцадаагай хүбүүн Иисүүс гэгшэд Иерусалимдахи Бурханай гэрэй барилга шэнээр эхилбэ, тэдэнтэй хамта Бурханай лүндэншэд, тэдэниие дэмжэгшэд булта хүдэлөө.

Хорон һанаатай мүрдэлгэ

3 Евфрадай баруун хажуудахи можын ноён Таттэнай, Шэтаар-Бозэнай болон тэдэнэй нүхэд барилгашадта ерэжэ, иигэжэ асууба:

– Энэ Һүмэ бариха, хана бодхоохо зүбшөөл хэн үгөөб?

4 Тиихэдэнь барилга хэжэ байһан хүнүүдэй нэрэнүүдыень бидэ хэлэжэ үгөөбди.

5 Харин иудейн аха заханарые Бурхан хаража байһан тула тэдэнэр хорижо шадабагүй. Ушар тиимэһээ Даарий хаанда бэшэг эльгээжэ, тэрэнэйнь харюугай ерэтэр тэрэ Һүмын барилга зогсоогдоогүй.

Дайсад Даарий хаанда хоб эльгээбэ

6 Евфратһаа баруулжаа газарнуудай ноён Таттэнай Шэтаар-Бозэнай хоёрой Даарий хаанда бэшэһэн бэшэгэй удха иимэ:

7 – Даарий хаан, сайн байна! 8 Иудын можодо баригдажа байһан Бурханай гэртэ ошообди гэжэ тандаа мэдээсэнэбди. Тэрэ Һүмэ томо шулуунуудаар баригдана, ханадань гасуу модон хабшуулагдажа хэгдэнэ. Тэдэнэй оролдолгоор Һүмын барилга угаа түргэн бүтэнэ.

9 – Энэ Һүмэ бариха, хана бодхоохо зүбшөөл хэн танда үгөөб? – гэжэ бидэ тэдэнэй аха заханарһаа асуугаабди. 10 Тэрэнһээ гадна танда мэдээсэхын тула гол эдэбхитэдэйнь нэрэнүүдые элирүүлжэ абаабди.

11 Тэдэ манда иигэжэ харюусаба: «Бидэ тэнгэри болон газар бүтээһэн Эзэнэй богоолнууд һэн тула энэ Һүмэ һэргээн бодхоожо байнабди. Олон жэлэй урда тээ Израилиин агууехэ хаан энэ Һүмые барижа, арюудхаа юм. 12 Эсэгэнэрэймнай Огторгойн Бурханиие уурлуулхада, Тэрэ Вавилооной хаан, халдей угтай Навуходоносорой шэрүүн гарта тэдэниие оруулжа, энэ Һүмэ һандаргагдаһан, зониинь Вавилоон нүүлгэгдэһэн байгаа юм. 13 Хожомынь Вавилооной Киир хаан хан шэрээдэ һууһан нэгэдэхи жэлдээ Бурханай энэ гэр һэргээн бодхоохо зүбшөөл манда үгөө. 14 Иерусалимдахи Һүмэһөө Вавилоондохи һүмэдэ Навуходоносорой абаашаһан алтан, мүнгэн амһартануудыень Вавилооной хаан Киир тэндэхи һүмэһөө гаргажа, Шэшбаццаарта тушаажа үгэхэдөө, тэрэниие Иуда можын ноён болгоод, 15 иигэжэ хэлээ юм: „Эдэ амһартануудые Иерусалимдахи Һүмэдэнь бусаа. Тэрэ Бурханай һүмэ өөрынгөө һуури дээрэ баригдаг“.

16 Шэшбаццаар ошожо, Иерусалимдахи Бурханай гэрэй һуури табилгые эмхидхээ. Тэрэ сагһаа мүнөө болотор энэ барилга үргэлжэлһөөр, үшөө дүүргэгдээгүй».

17 Танда таатай байбалнь, эсэгэ хаануудайнгаа дараан соогуур тэмдэглэл, бэшэгүүдыень Вавилоондоо бэдэрүүлыт. Иерусалимда Бурханай гэр барюулха гэһэн Киир хаанай захиралта үнэн байгаа гү? Мэдэһэнэйнгээ удаа, энэ асуудалаар хаанай шиидхэбэри манда дуулгагдана бэзэ.