Ezr 6 | BxrBBL2024 | STEP | Даарий хаан захиралта үгэжэ, Вавилооной хаашуулай үнэтэ дараагаа хадагалдаг газарнуудаар, номой сангууд соогуур бэдэрэлгэ хүүлэхэдэнь,

‏ Ezra 6

Мүрдэн шэнжэлгэ ба Даарий хаанай харюу

1 Даарий хаан захиралта үгэжэ, Вавилооной хаашуулай үнэтэ дараагаа хадагалдаг газарнуудаар, номой сангууд соогуур бэдэрэлгэ хүүлэхэдэнь, 2 Мидия можын Экбатаана хотын ордон соо нэгэ хуйламал бэшэг олдобо.

Тэрээн соонь иигэжэ бэшээтэй байгаа: «Һанахын тулада. 3 Хан шэрээдэ һууһан жэлдээ Киир хаанай Иерусалимдахи Һүмэ тухай үгэһэн захиралта: үргэл үргэхын тула Һүмэеэ һэргээг, найдамтай һуури табюулаг, үндэрынь жаран тохой, үргэниинь баһа жаран тохой байха. 4 Ханань гурбан зэргэлээ томо шулуунуудаар, нэгэ зэргэлээ модоор бодхоогдохо ёһотой. Хүдэлмэриин гаргаша хаанай һан жасаһаа түлэгдэхэ. 5 Иерусалимай Һүмэһөө Навуходоносор хаанай Вавилоон абаашаһан алтан, мүнгэн амһартанууд Иерусалимайнгаа Һүмэдэ һөөргөө бусаагдажа, анхан һууһан һууринуудтаа табигдаха ёһотой.

6 Евфратһаа баруулжаа можын ноён Таттэнай Шэтаар-Бозэнай хоёр, таанар уһанай саана таанарай нүхэд болохо зонтой зайлагты тэндэһээ. 7 Бурханай гэрэй ажалые бү зогсоогты. Анхан байра дээрэнь Бурханай энэ гэрые Иуда можын ноён, иудейн аха заханар барюулаг.

8 Намһаа танда захиралта: тэрэ Бурханай гэрэй барилгада хүдэлжэ байһан иудейн аха заханарта таанар туһалха ёһотойт. Танай можоһоо хаанай жасада орохо татабари суглуулжа, тэрэ барилгын зогсоогдохогүйн тула тэдэндэ түргэн үгэжэ байгты. 9 Огторгойн Бурханда түгэс шатаалта үргэл үргэхэ хурьга хусануудые, тугал буруунуудые, тэрэшэлэн шэниисэ, дабһа, үзэмэй дараһан архи, тоһо гэхэшэлэн Иерусалимай санаарта нэрлэһэн бүхы юумэнүүдые, хэды хэрэгтэй гэнэб, тэдые үдэрһөө үдэртэ удааруулангүй үгэгты. 10 Эзэн хаанайнгаа болон тэрэнэй хүбүүдэйнь түлөө Огторгойн Бурханда таатай түгэс шатаалта үргэл үргэхыень, мүргэхыень бү һаатуулагты!

11 Иигэжэ захирнаб: хэн энэ захиралтыемни дүүргэнэгүйб, тэрэнэй гэрэйнь модон һугалагдажа абтаха, өөрөө тэрэ модондоо һуулгагдан алуулагдаха, гэр байрань һандаргагдаха.

12 Энэ зарлигыемни эбдэхэеэ һанаһан ямаршье хаан, ямаршье арад байг, Иерусалимдахи Бурханай һүмэдэ сүйд хээ һаань, Өөрынгөө нэрые тэндэ оршохо гэжэ тодорхойлһон Бурхан тэдэниие илгаагүй һүнөөг. Би, Даарий хаан, энэ зарлиг табибаб. Энэ зарлигни тон наринаар бэелүүлэгдэхэ болтогой».

Һүмын барилгые дүүргэлгэ

13 Евфратһаа баруулжаа можын ноён Таттэнай, Шэтаар-Бозэнай болон тэдэнэй нүхэд бултадаа Даарий хаанай зарлиг тон наринаар дүүргэбэ. 14 Лүндэншэд Хаггай болон Иддоогой хүбүүн Захарияагай зүгнэн хэлэһээр, иудейн аха захатан барилгаяа урагшатай түргэн ябуулжал байгаа. Тиигэжэ Израилиин Бурханай хүсэлөөр, Персиин хаашуул Киир, Даарий, Артагсээрэгс гэгшэдэй дэмжэлгээр 15 Даарий хаанай хан шэрээдэ һууһаар зургаадахи жэлэй адаар һарын гурбан шэнэдэ энэ Һүмын барилга дүүрэбэ.

Һүмые арюудхалга

16 Израильшууд – санаартад, левидүүд болон баряанһаа бусаһан зон Бурханай гэрэй арюудхалда угаа баяртайгаар хабаадаба. 17 Зуун буха, хоёр зуун хони, дүрбэн зуун хурьга Бурханай гэр сагааруулгын үргэлдэ асарба, үшөө израильшуудай уг эсэгэнэрэй тоогоор, бүхы Израилиин нүгэл арилгахын тула арбан хоёр ямаа асаржа үргэбэ. 18 Моисейн ном соо бэшэгдэһэнэй ёһоор, Иерусалимай Һүмэдэ алба хэхэ санаартадые зэргэ зэргээрнь, левидүүдые зиндаа зиндаагаарнь томилбод.

19 Баряанһаа бусаһан зон нэгэдэхи һарын ^{▼▼ Нэгэдэхи һара – март-апрель.} арбан дүрбэндэ Паасха хэбэ. 20 Санаартад, левидүүд бэеэ арюудхажа, булта арюун сэбэр болоод, баряанһаа бусаһан зоной түлөө, аха дүү санаартадайнгаа түлөө, өөр өөрынгөө түлөө гэхэшэлэн бултанай түлөө Паасхада үргэһэн малые үүсэлбэ. 21 Нүүжэ ерээд, хари газарай буса зоной бузарһаа бэеэ арюудхаһан израильшууд Эзэндээ, Израилиингаа Бурханда, дүтэлхын тула булта Паасхаяа эдибэ.

22 Эһээлтэгүй хилээмэнэй һайндэрые долоон хоногой туршада ехэ баяртайгаар һайндэрлэбэ, юундэб гэхэдэ, Эзэнэй, Израилиин Бурханай, һүмэ барихадань туһалхын тула Ассириин хаанай зүрхэ зөөлэрүүлһэн Эзэн тэдэниие баярлуулаа бшуу.