‏ Ezra 7

Эзраагай бусалга ба тэрэнэй хэһэн хубилалтанууд

1Эдэ үйлэ хэрэгүүдэй үнгэрһэнэй удаа, хан шэрээдэ Персиин хаан Артагсээрэгсэй һууха үедэ Эзраа Вавилоонһоо Иерусалим тээшэ зорибо. Эзраа Сэраяагай хүбүүн, Сэраяа Азаарияагай, Азаарияа Хилкияагай, 2Хилкияа Шаллуумай, Шаллуум Цадоогой, Цадоок Ахитуубай, 3Ахитууб Амарияагай, Амарияа Азаарияагай, Азаарияа Мэрайһоодой, 4Мэрайһоот Зэраахияагай, Зэраахияа Үззиин, Үззии Буккиин, 5Буккии Абишууагай, Абишууа Пинэһаасай, Пинэһаас Эльазаарай, Эльазаар ахамад санаартан Аһарооной хүбүүн. 6Эзраа Эзэнһээ, Израилиин Бурханһаа, заяатай, Моисейн хуулинуудые һайн сахидаг, Хуули заадаг багша байгаа. Эзэнэй Эзраае харгалзажа байдаг тула тэрэнэй һанаһан юумэнүүдые хаан бултыень хүсөөдэг байгаа.

7Артагсээрэгс хаанай хан шэрээдэ һууһаар долоодохи жэлдэ зарим израильшууд, санаартад, левидүүд, үүдэ һахигшад болон һүмын албатан гэхэшэлэн олон хүн Эзраатай суг Иерусалим ерэлсээ. 8Хаанай хан шэрээдэ һууһаар долоодохи жэлэй табадахи һарада ▼

▼ Ав һарада – июль-август.

тэдэ Иерусалим хүрэжэ ерээ. 9Нэгэдэхи һарын нэгэнэй үдэр Вавилоонһоо гараад, табадахи һарын нэгэнэй үдэр Иерусалим хото хүрэхэдөө, тэдэнэр Түгэс Хүсэтэ Бурханайнгаа харууһан доро ябаа. 10Юуб гэхэдэ, Эзэнэй хуулинуудые үзэжэ, наринаар өөрөө сахихаһаа гадна тэрэнээ израильшуудта заажа, үнэн зүб ябадалда һургахын тула Эзраа үнэн сэдьхэлһээ оролдожо ябаа.

Артагсээрэгс хаанай Эзраада үгэһэн бэшэгэй удха

11Эзэнэй хуули заабаринуудые Израилиин зондо заадаг багша, номшон, санаартан Эзраада Артагсээрэгс хаанай эльгээһэн бэшэгэй удха иимэ:

12«Огторгойн Бурханай хуули заабаринуудые гүйсэд мэдэдэг санаартан Эзраада хаануудай хаан Артагсээрэгсһээ» гэхэ мэтэ.

13«Минии хан түрэ дотор байһан Израилиин арад, левидүүд, санаартад шамтай Иерусалим ошохоёо һанабал, ошог гэжэ намһаа захиралта үгтэнхэй. 14Ши бол хаанһаа, тэрэнэй долоон түшэмэлнүүдһээ эльгээгдэжэ, шинии абажа ябаһан Бурханай хуулиин хэр зэргэ Иуда болон Иерусалимда гүйсэдхэгдэнэб гэжэ шэнжэлхэ даабаритайш. 15Иерусалимда байдаг Израилиин Бурханда хаан болон зүблэгшэнэрэй үргэл алта, мүнгэ, 16тэрээнһээ гадна Вавилооной можодо шинии суглуулха бүхы алта, мүнгэ, арад зоной болон санаартанай һайн дураараа Иерусалимдахи Бурханай гэртэ үргэхэ үргэл асархын тула ши эльгээгдэнэш; 17энэ алта мүнгөөрөө үтэр түргэн буха, хуса, хурьга ба эдеэн үргэл болон сүршэхэ ундан үргэл худалдажа абаад, Иерусалимдахи Бурханай гэрэй үргэлэй шэрээдэ асара. 18Үлэһэн алта мүнгөөрөө Бурханайнгаа дура хүсэлөөр таанар аха дүүнэртэеэ юу хэхэ дуратайбта, хээрэйгты. 19Шамда үгтэһэн Бурханай гэртэ хэрэглэгдэхэ амһартануудые Иерусалимай Бурханай урда таби. 20Бурханайтнай гэртэ үшөө юун хэрэгтэй гэжэ һананабши, тэдэниие хаанай баялигуудые хадагалдаг газарһаа абаарай.

21Евфрадһаа баруулжаа можодохи баялигуудые хадагалдаг зондо би, Артагсээрэгс хаан, иимэ зарлиг үгэнэб: огторгойн Бурханай хуули һургаал заадаг багша, санаартан Эзраа танһаа юу эринэб, эриһэн юумыень бултынь түргэн үгэгты: 22зуун талаант хүрэтэр сагаан мүнгэ, зуун кооро шэниисэ, зуун баата үзэмэй дараһан архи, зуун баата оливын тоһо, тиихэдэ дабһа хэмжүүргүйгөөр. 23Хан түрэдэмни, намда, хан тайжанартамни огторгойн Бурханай уур сухалай хүрэхэгүйн тула Бурханай захирһан юумэнүүдые, Тэрэнэй гэртэ хабаатай юумэнүүдые оролдосотой наринаар бүтөөгты. 24Бурханай гэртэ хабаатай албатадһаа: санаартадһаа, левидүүдһээ, дуушадһаа, үүдэ һахигшадһаа, бүхы Һүмын албатанһаа алба татабари абтахагүй гэжэ мэдүүлнэбди.

25Ши, Эзраа, Бурханайнгаа хайрлаһан оюун ухаагаар бодомжолжо, Бурханай болон засаг түрын хуули мэдэхэ бэрхэ ноёдые, заргашадые томило. Хэд мэдэнэгүйб, тэдэниие һургагты. 26Хэн шинии Бурханай болон хаанай хуули бэелүүлнэгүйб, тэрэниие дары түргэн шүүбэрилжэ, толгойн саазаар, сүлэлгөөр, мүнгэнэй ялаар гү, али шорондо хаажа, хэһэн гэмэйнь зэргээр хэһээгты».

Эзраагай магтаал дуун

27– 28Иерусалимай Эзэнэй гэр шэмэглэхые хаанай сэдьхэл зоригжуулһан Эзэн Бурханаймнай хүсэл һайхан, үбгэ эсэгэнэрэймнай Бурхан һайн. Хаан болон түшэмэлнүүд, хан тайжанар намайе энхэрнэ. Огторгойн Бурханай намайе орой дээрэһээм харгалзахада, омог сэдьхэлһээ израильшуудаа ороноо бусахыень хамтаруулнаб.