Ezra 9
Эзраагай хэһэн хубилалтанууд
1Эдэ бүгэдын үнгэрһэнэй удаа Израилиин угуудай гулбаанар, аха захатан намда ерэжэ хэлэбэ: – Израильшууд, санаартад, левидүүд буса түрэлтэ арадуудһаа, тэдэнэй бузарһаа илгаржа гараагүй, ханаһаануудай, хээдүүдэй, пэриззиинүүдэй, евүүсүүдэй, аммоонуудай, моһаабуудай, египедшүүдэй болон эмооршуудай 2басагадаар һамга хэхэһээ гадна хүбүүдтээ һамга абхуулна, тиигэжэ нангин шуһамнай буса түрэлтэдтэй холисолдожо байна. Энэ хуули буса ябадалда аха захатан, нэрэтэй түрэтэйшүүл эхи табяа. 3Иимэ үгэ дуулахадаа, би дотор, гадар хубсаһаяа удара татажа хаяад, толгойнгоо үһэ, һахалаа ходоро зулгаагаад, аргагүй ехэ гашуудалда орон һуубаб. 4Тиихэдэмни нүүжэ ерэгшэдэй гэм зэмэтэ ябадалай түлөө Израилиин Бурханһаа айһан зон булта намда сугларба. Би гашуудалда баригданхай, үдэшын үргэл болотор һуубаб. 5Үдэшын үргэлэй болоходо, би гэмшэжэ һууһанаа бодожо, дотор гадаргүй хахархай хубсаһатай, үбдэг дээрээ һэхэржэ һуугаад, гарнуудаа өөдэнь һарбайжа, Эзэндээ, өөрынгөө Бурханда зальбарбаб, 6гуйбаб:Эзраагай мүргэл
– Бурхамни! Тан тээшэ нюураа үргэхэеэ айнаб, эшэнэб. Юуб гэхэдэ, хуули буса ябадалнай толгойһоомнай дээшэ, гэмэ зэмэмнай тэнгэри тулама болоо. 7Эсэгэнэрэйнгээ үеһөө мүнөө болотор гэмэ зэмэмнай таһарнагүй, хуули буса ябадалайнгаа түлөө бидэ, хаашуулнай, санаартаднай хари газарай хаашуулай гар доро, һэлмэ доронь орожо, туулгажа, тонуулжа, мүнөө болотор доромжолуулжа ябанабди. 8Гэбэшье Та, манай Бурхан, манаа орхёогүйт, Танай захиһан нангин газарта һуурижахымнай тула үсөөхэнөөршье һаа, зонииемнай амиды үлөөгөөт, нюдыемнай нээжэ ойлгуулаат, богоолшолго тэсэн гараха арга олгоот. 9Бидэ богоолнуудбди, харин богоолшолгыншье үедэ Та, манай Бурхан, бидэниие орхёогүйт. Персиин хаашуулые манда зөөлөөр хандуулжа, маниие һөөргөө өөдэлхэ, Иудадаа, Иерусалимдаа бусажа аршалагдаха, һандаралда ороһон Бурханайнгаа һүмэ дахинаа һэргээн бодхоохо арга манда олгоот. 10Мүнөө иимэ юумэнэй болоод байхада, Бурхамнай, юун гэжэ хэлэхэбибди?! Захяа заабариһаатнай нээрээ хадуураабди. 11Зараса лүндэншэдөөрөө дамжуулан мандаа захигша һэнта: «Эзэмдэхэеэ ошожо ябаһан газартнай буса зоной муу муухайһаа, нүгэлтэ ябадалнуудһаань захаһаа заха хүрэтэрөө бузарлагданхай. 12Тэрэ газарай шэмээр амидархаяа, тэндээ бүхэжэн ажаһуухаяа, хүбүүдтээ дамжуулан хэтэдэнь үгэхэеэ һанаа һаа, тэдэнтэй хэзээшье бү эбсэгты, зөөридэнь бү обтогты. Басагадаа тэдэнэй хүбүүдтэ бү үгэгты, хүбүүдтээ тэдэнэй басагаар һамга бү хүүлэгты». 13Эдэ бүгэдын удаа манай хэһэн хэмжэшэгүй ехэ гэм зэмымнай, хуули буса ябадалаймнай зэргээр хэһээнгүй хүлисөөт, тиигэжэ абарагдаха арга манда олгоот, Бурхамнай. 14Тииһэнэйтнай удаа бидэ дахин захяа заабариитнай эбдэжэ, эдэ жэрхэмшэгтэй арадтай түрэл түтим боложо ябаха аалди? Та уур сухалда абтажа, бидэниие үгы хэжэ болохо аалта? Амиды үлэһэншье, абарагдаһаншье үлэхэгүй гү? 15Израилиин Эзэн Бурхан! Энэрхыт даа манаа. Бидэ гэм зэмэтэ ябадалнуудһаа гүйсэд һалажа шадаашьегүй һаа, мүнөөдэр болотор амиды үлэһэн хадаа энээнһээ хойшо Танайнгаа урда зүб замаар ябаһайбди даа.
Copyright information for
BxrBBL2024