Gal 1 | BxrBBL2024 | STEP | Нэгэ хүнэй гү, али хэдэн хүнүүдэй эрхэ мэдэлээр бэшэ, харин Иисүүс Христоосой, Тэрэниие амидыруулһан Эсэгэ Бурханай мэдэлээр шэлэгдээд, элшэнгээр табигдаһан Павелһаа,

‏ Galatians 1

1 Нэгэ хүнэй гү, али хэдэн хүнүүдэй эрхэ мэдэлээр бэшэ, харин Иисүүс Христоосой, Тэрэниие амидыруулһан Эсэгэ Бурханай мэдэлээр шэлэгдээд, элшэнгээр табигдаһан Павелһаа, 2 тиин тэрээнтэй хамта байгааша һүзэглэгшэдһөө Галаат можын һүзэглэгшэдэй бүлгэмдэ 3 Эсэгэ Бурханһаа болон манай Эзэн Иисүүс Христоосһоо амар мэндые хүргэнэбди. 4 Христоос болбол манай Эсэгэ Бурханай эрхэ мэдэлээр бидэниие нүгэл шэбэлһээ, оршон үеын хорото муу байдалһаа аршалан сүлөөлхын түлөө ами бэеэ үргэл болгожо үгөө. 5 Эсэгэ Бурханда хэтын хэтэдэ алдар соло! Болтогой.

Гансал Һайн Мэдээсэлые баримталха ёһотойт

6 Агууехэ үршөөл хайраараа таанадые дуудаһан Христоосһоо иимэ түргөөр холодожо, ондоо һургаал номнолдо хулжан ороходотнай би ехэ шаналнаб. 7 Христоосой һургаалһаа ондоо үнэн зүб һургаал үгы юм! Харин таанадые үймүүлжэ, Христоосой һургаалые буруудхаха һанаатай хүнүүд лэ бии. 8 Таанадта урдань номногдоһон һургаалһаа ондоо һургаалые зааһан хүн бүхэн, бишье бай, али тэнгэриһээ бууһан Эльгээмэлшье бай, булта хатуу хэһээлтэдэ хүртэг лэ. 9 Таанадай хүлеэжэ абаһан һургаалда эсэргүүсэн зүршэһэн юумэндэ һургаһан хүн бүхэн хатуу хэһээлтэдэ хүртэг гэжэ би һаяхан хэлээ һэм, мүнөөшье дахин дабтанаб.

10 Иигэжэ хэлэхэдээ би хүнүүдэй һайшаалда хүртэхэеэ оролдоно гүб, али Бурханай һайшаалда гү? Иихэдээ хүнүүдэй һанаанда һайн болохоёо оролдоно гүб? Хэрбээ би хүнүүдэй урда хойгуур гүйдэг байгаа һаа, Христоосой зараса байхагүй һэм.

Павелай элшэн болоһон тухай

11 Аха дүүнэрни, минии таанадта номноһон Һайн Мэдээсэл хүнүүдээр дамжан ерээгүй юм гэжэ мэдэгты. 12 Би тэрэниие хүнүүдһээ дуулаагүйб, нэгэшье хүн намайе тэрээндэ һургаагүй, харин Иисүүс Христоос тэрэниие намда нээгээ.

13 Урдань иудейн ёһо гуримые бодотоор сахин ажамидаржа ябаһан тухаймни таанад дуулаа ёһотойт. Би Христоосто һүзэглэдэг зониие гайтайгаар хашан мүрдэдэг, һандарган хосороодог һэм. 14 Би үбгэ эсэгэнэрэйнгээ ёһо гуримуудые наринаар сахидаг, шажанайнгаа хуули ёһые өөрынгөө үетэнһөө үлүү һайнаар гүйсэдхэдэг бэлэйб. 15 Үшөө эхынгээ умайда байхадамни Бурхан агууехэ үршөөл хайраараа намайе шэлэжэ абаад, 16 Хүбүүн тухайгаа үнэн зүбые нээгээд, бусад арадуудта Христоос тухай номнохыемни захираа. Тиихэдэ би ямаршье хүнһөө зүблэл һураагүйб. 17 Намһаа урда элшэнэрээр табигдаһан зонтой уулзахаяашье би Иерусалим ошоогүй һэм. Харин Аравиин газар нютагаар ябаад, һүүлдэнь Дамааск хото бусажа ерээ һэнби.

18 Гурбан жэлэй үнгэрһэн хойно би Пётртой уулзахаяа Иерусалим ошооб. Тэндэ тэрээнтэй арбан дүрбэн үдэр байлсаа һэм. 19 Иисүүсэй дүү хүбүүн Яковһаа бэшэ ондоо элшэнэрые би хараагүйб. 20 Таанадта минии бэшэжэ байһан бүхы юумэн үнэн зүб юм гэжэ Бурхан мэдэнэ.

21 Һүүлдэнь би Сириин, Киликиин нютагуудаар ябааб. 22 Иудейн орон нютагта ажаһуудаг Христоосто һүзэглэгшэ бүлгэмүүд намайе нюураарни танихагүй байгаа. 23 Урдань тэдэниие хашан мүрдэдэг, һургаалыень һандарган һалгаадаг хүн байһан аад, мүнөө тэрэ һургаалые номнодог гэжэл тэдэ нам тухай соносоо. 24 Намтай ушарһан ябадалда баярлан, тэдэ һүзэглэгшэд Бурханиие алдаршуулаа.