‏ Galatians 3

Этигэл һүзэгтэй байха гү, али Хуули сахиха гү?

1Ай, мунхаг тэнэг галаадууд! Хэн таниие эльбэдэбэ гээшэб? Минии номноходо хэрээһэндэ саазалагдаһан Христоосые таанад нюдөөрөө хаража байһандал байгаа бэшэ һэн гүт? 2Таанад Хуули сахижа байһан дээрэһээ гү, али Христоосто этигэһэн дээрэһээ Арюун Һүлдэдэ хүртэбэ гүт гэжэ би таанадһаа һураха һанаатайб. 3Арюун Һүлдөөр дахуулжа ябаһан аад, мүнөө махабад бэедээ татуулаа гүт? Тиихэдээ таанад иимэ балар мунхаг хүнүүд гээшэ гүт? 4Али таанадтай ушарһан бүхы юумэн дэмы үнгэрөө гү? Дэмы үнгэрөөгүйл байгаа даа! 5Хуули сахиһандатнай бэшэ, харин Христоосто этигэһэндэтнай Бурхан таанадта Арюун Һүлдые хайрлажа, гайхамшагта үйлэ хэрэгүүдые бүтээгээ юм.

6Энээндэл адляар Абраһаамай Бурханда этигэхэдэ, Бурхан тэрэниие үнэн сэдьхэлтэн гэжэ тоолобо. 7Абраһаамдал адли Бурханда һүзэглэдэг зон Абраһаамай үри һадаһад гэжэ таанар мэдэжэ байгты. 8Арадуудые этигэлээрнь Бурхан аршалан сүлөөлхэ гэжэ Нангин Бэшэг соо үни гэһээр тунхаглагдаа. Тэндэ Абраһаамда: «Бурхан шамаар дамжуулан, бүхы арадуудые абарха», – гэжэ хэлэгдээ. 9Тиимэһээ Бурханда һүзэглэһэн зон Абраһаамтай хамта үршөөгдэхэ.

10Харин Хуули сахижа аршалагдахаб гэжэ һанаһан хүн бүхэн хэһээгдэхэ. Юундэб гэхэдэ, «Хуулиин зүйл бүхэниие үргэлжэ гүйсэдхэжэ байгаагүй хүн бүхэн хэһээгдэхэ», – гэжэ Нангин Бэшэг соо хэлээтэй байдаг. 11Хуули сахижа байһанаараа хэншье Бурханай абарал үршөөлдэ хүртэхэгүй, юундэб гэхэдэ, Нангин Бэшэгтэ: «Үнэн сэдьхэлтэн этигэл һүзэгэйнгөөл ашаар амидарха», – гэжэ бэшэгдэнхэй. 12Хуули гээшэмнай һүгэдэлгэ бэшэ, тиимэһээ тэндэ: «Хуулиин зүйл бүхэнииел сахижа ябаһан хүн амиды ябаха», – гэжэ хэлэгдэнэ.

13Дээрэмнай бууха ёһотой байһан Хуулиин хэһээлтэһээ бидэниие Христоос аршалжа, тэрэ хэһээлтые Өөр дээрээ даажа абаа. Тиимэһээ Хуули соо баһа иигэжэ бэшэгдээтэй: «Модондо үлгөөтэй хүн хараалда хүртөө». 14Иисүүс Христоосоор дамжан найдуулагдаһан Арюун Һүлдые этигэлээрээ тогтоожо абахынь тула Абраһаамай үршөөл хайра мүнөө бүхы арадуудта үгтөө.

Бурханай найдуулга ба Хуули

15Аха дүүнэрни! Юрэ хэлэбэл, хүнэйшье бэшээд орхиһон һүүлшын захяае хэншье хубилгажа шадахагүй юм. 16Харин Абраһаамда, тэрэнэй үридэ Бурхан найдуулга үгөө. Үри хүүгэдтэш гэжэ хэлэгдээгүй, харин үридэшни гэжэ нэгэл хүн тухай хэлэгдээ, тиин тэрэ нэгэнь – Христоос гээшэ. 17Христоос тухай хэлсээе Бурханай баталһан сагһаа дүрбэн зуун гушан жэл үнгэрһэн хойно бии болоһон Хуули энэ хэлсээе болюулха аргагүй, тиимэһээ Бурханай найдуулгань хүсэндөө үлэбэ гэжэ би хэлэнэб. 18Юундэб гэхэдэ, хэрбээ уг залгамжалга Хуулиин ёһоор үгтэдэг һаа, найдалга хэрэггүй байгаа. Гэбэшье Бурхан Абраһаамые найдуулһан ёһоороо шагналдаа хүртөөгөө юм.

19Юундэ Хуули үгтэһэн байгааб? Абраһаамай үри һадаһан ерэхэ гэжэ Бурханай найдуулһан саг хүрэтэр гэмтэ ябадал юун бэ гэжэ ойлгожо байхын тула энэ Хуули үгтөө. Энэ Хуули хүнүүдтэ Эльгээмэлээр болон зууршалагшаар дамжуулан үгтөө. 20Теэд Бурхан ори ганса! Тэрэ зууршалагшые хэрэглэдэггүй.

21Иихэдээ Хуули Бурханай найдуулга буруушаана гү? Үгы даа! Хэрбээ Хуули хүниие абарха аргатай байбал, Хуули гүйсэд сахидаг хүн бүхэн үнэн сэдьхэлтэн болохо һэн. 22Гэбэшье хүн бүхэн нүгэл шэбэлдэ унаад байна гэжэ Нангин Бэшэг соо хэлэгдэнэ. Энэ бэшэгдэһэн бүхэнэй ушарынь гэхэдэ, Иисүүс Христоосто һүзэглэһэн бүхы зон этигэлээрээ Бурханай найдуулһые хүлеэжэ абаха.

23Этигэлэй сагай ерээдүйдэ, этигэл һүзэгэй бидэндэ нээгдэтэр бидэ Хуулиин эрхэ мэдэлдэ байгаабди. 24Иихэдээ Хуули гээшэмнай этигэл һүзэгөөрнай абардаг Христоосто этигэхыемнай бидэниие бэлдэһэн шэрүүн һургагша байгаа. 25Тиимэһээ этигэлэй сагай ерэхэдэ, бидэ энэ шэрүүн һургагшын мэдэлһээ мултаран гараабди.

26Мүнөө таанад булта Иисүүс Христоосто һүзэглэһэн этигэлээрээ Бурханай үхибүүд гээшэт. 27Иисүүс Христоосой нэрэ алдараар уһаар арюудхуулһан зон, таанад булта Иисүүс Христоостой нэгэдэбэт. 28Тиимэһээ мүнөө еврейнүүд, бусад арадуудшье илгаагүй, барлагууд, сүлөөтэйшүүлшье илгаагүй, эрэшүүл, эхэнэрнүүдшье илгаагүй. Таанад булта мүнөө нэгэн адли боложо, Иисүүс Христоостой нэгэдэбэт. 29Хэрбээ Христоостой нэгэдэбэл, таанад Абраһаамай үри һадаһад гээшэт, тиигээд Абраһаамда найдуулһан бүхэниие залгамжалан абахат.