‏ Galatians 4

Таанар зарасанар бэшэ, харин Бурханай үхибүүд гээшэт

1Уг залгамжалагша балшар үхибүүн ябахадаа бүхы юумэнэй эзэн байбашье, зарасаһаа юугээрээшье илгардаггүй. 2Тиимэһээ Эсэгын тогтооһон саг болзор хүрэтэр тэрэ үхибүүн даалгагдаһан хүнүүдэй болон гэрэй захирагшын харууһа доро байдаг. 3Бидэшье бага балшар наһандаа энэ дэлхэйн эмхи гуримгүй хүсэнүүдэй мэдэлдэ байгаабди. 4– 5Харин саг болзорой ерэхэдэ, эхэнэрһээ түрэһэн Хүбүүгээ Бурхан эльгээбэ. Хуулиин эрхэ мэдэлдэ байһан хүнүүдые абархын тула, Бурханай найдуулһан юумэнэй уг залгамжалагшад болгохын тула түлөөһэ үгэжэ, эльгээһэн Тэрэ Хүбүүниинь Хуулиин ёһоор ажамидаржа байгаа. 6Таанадай Бурханай уг залгамжалагшад болоһон хадатнай, Бурхан таанадта: «Аба, Эсэгэ», – гэжэ ооглоһон Хүбүүнэйнгээ Һүлдые эльгээгээ. 7Иихэдээ ши зараса бэшэ, харин Христоосоор дамжан, Бурханай хүбүүниинь, уг залгамжалагшань болобош.

Павел галаадуудта һанаагаа зобоно

8Урдань таанад Бурханиие мэдэхэгүй ушарһаа үнэн дээрээ бурхад бэшэ «бурхадуудта» алба хэжэ байгаат. 9Мүнөө таанад Бурханиие мэдэһэн аад лэ, тодорхойлон хэлэбэл, Бурханай таанадые мэдэһэн хойно таанад яагаад һүр хүсэгүй, ахир тулюур хүсэнүүдтэ дахин бусабат, тиигээд тэдэндэ алба хэхэеэ һанабат? 10Таанад шажанай тусхай һайндэрнүүдые тэмдэглэн үнгэргэнэт. 11Таанадые дэмы һурган номножо ябаа гүб гэжэ би һанаагаа зобоноб.

12Аха дүүнэрни, намдал адли Хуулиин мэдэлһээ мултаран гарыт гэжэ би гуйнаб, юундэб гэхэдэ, би Хуулиин мэдэлһээ гаран, таанадтал адли хүн болоо һэнби. Таанад намайе огто гомдоогоогүйт. 13Үбшэн ядуу байхадаа анха түрүүшынхиеэ таанадта һургаал номноһыемни таанад һанана ёһотойт. 14Үбшэн ядуу байхадамни таанад һэжэглэнгүй, намайе өөһэдһөө түлхингүй, Бурханай Эльгээмэл мэтэ, Иисүүс Христоостол адляар угтажа абаа бэлэйт. 15Урматнай хосороо гээшэ гү? Тэрэ үедэ таанар нюдөөшье хайрлангүй, таһа татажа гаргаад, намда үгэхөөр бэлэн байгаа һэнта гэжэ би гэршэлнэб. 16Таанадта үнэн зүбые номноһон хэрэгээрээ дайсантнай болобо гүб?

17Тэдэ хүнүүд таанарта муу һанана, таанад тухай һанаагаа зобоһон хэбэр үзүүлхэ гэһэн хара һанаатай байна. Тэдэнэр бидэнэй эб таһалаад, анхаралыетнай өөһэдтөө хандуулха һанаатай. 18Гансашье минии таанадтай суг байха сагта бэшэ, мүн бусадшье үедэ нам тухай һонирхожо байбалтнай ехэ һайн байгаа. 19Үхибүүдни, амидаралтнай Христоосоор халин дүүрэхын тула би түрэжэ байһан эхэнэртэл адли зобоноб. 20Мүнөө таанадай дунда байбал, таанадтай ондоохоноор хөөрэлдэхэ байгааб, харин эндэһээ таанадтай юу хэхэеэ ойлгохоёо болёод байнаб.

Һагаар Сарра хоёр болбол хоёр хэлсээнүүдтэл адли

21Хуули сахихые һанаһан таанар мүнөө намда хэлэгты, таанад Хуулиин юу гэһые дуулаагүй гүт? 22Абраһаам хоёр хүбүүтэй байгаа: нэгыень зараса эхэнэр түрөө, нүгөөдыень сүлөөтэй эхэнэр түрөө гэжэ тэрэ Хуули соо бэшээтэй. 23Зараса эхэнэрһээ гараһан хүбүүниинь хүнүүдэй шиидхэбэреэр түрөө, харин сүлөөтэй эхэнэрһээ гараһан хүбүүниинь Бурханай найдуулһан ёһоор түрөө. 24Энэ ушар гүнзэгы удхатай юм: эдэ хоёр эхэнэрнүүд хоёр хэлсээнүүдтэл адли бшуу. Синай хада дээрэ үгтэһэн нэгэдэхи хэлсээниинь Хуули дээрэ үндэһэлнэ. Энэ хэлсээн зараса Һагаардал адли, барлагуудай хэлсээн юм. 25Һагаар гэжэ Аравида оршодог Синай хада нэрлэдэг. Энэнь дарлалта доро байһан мүнөө үеын Иерусалим хотые бүхы хүн амитантайнь тэмдэглэдэг. 26Харин тэнгэриин Иерусалим эрхэ сүлөөтэй юм. Тэрэ Иерусалим бидэнэй эхэ гээшэ. 27Тэрээн тухай Нангин Бэшэг соо иигэжэ хэлэгдэнэ: «Үхибүү түрөөгүй, үри хүүгэдгүй эхэнэр,
хүхин баясыш!
Үхибүү түрэхын зоболон мэдэрээгүй эхэнэр,
хүхииш, баярлыш!
Юуб гэхэдэ, хадамда гараагүй эхэнэр
хадамтай эхэнэртэ орходоо
тоогүй олон үхибүүтэй байха».

28Аха дүүнэрни, таанад баһа Исаагтал адли Бурханай найдуулһан ёһоор түрөөт. 29Тиихэдэ хүнүүдэй хэлсээгээр түрэһэн хүбүүн Бурханай найдуулгаар түрэһэн хүбүүе яажа хашан мүрдөө һэм, тиигэжэл мүнөө таанадыешье мүрдэнэ. 30Нангин Бэшэг соо энээн тухай: «Барлаг эхэнэрые хүбүүнтэйнь хамта намна! Барлагай хүбүүн сүлөөтэй эхэнэрэй хүбүүнтэй хамта уг залгамжалхагүй», – гэжэ бэшэгдэнхэй. 31Тиимэһээ, аха дүүнэрни, бидэ зараса эхэнэрэй бэшэ, харин сүлөөтэй эхэнэрэй үхибүүд гээшэбди.