‏ Galatians 5

Эрхэ сүлөөдэ ажамидарагты

1Христоосой үршөөһэн эрхэ сүлөөдэ ажамидарагты, дахин барлагууд бү бологты.

2Хэрбээ бэлгээ отолуулбалтнай, Христоос таанадта ямаршье аша туһа хүргэхэгүй гэжэ би Павел таанадта хэлэнэб. 3Харин бэлгээ отолуулһан хүн бүхэн Хуулиин бүхы зүйлнүүдые гүйсэдхэхэ ёһотой болоно гэжэ баталан гэршэлнэб. 4Хуули сахин өөһэдыгөө абарха һанаатайшуул Христоосһоо хулжаржа, Бурханай үршөөл хайраһаа арсана гээшэ. 5Харин бидэ Бурханай үршөөл хайрада хүртэжэ, өөһэдынгөө этигэлээр абарагдахабди гэжэ найданабди. 6Иисүүс Христоосой ашаар абарагдаха һанаатай байбал, бэлгээ отолуулаа гүбди, али отолуулаагүй гүбди – ямаршье илгаагүй юм, гансал хайра дура үгэдэг этигэл шухала юм.

7Таанад һайнаар эхилээ бэлэйт, теэд саашадаашье үнэн зүбые баримталхадатнай хэн таанадта һаалта хэбэб? 8Иимэ буруу һанал бодолнуудые урдань таанадые дуудаһан Бурхан таанадта идхуулаа бэшэ. 9Багахан эһээбэри бүхы эдьхүүрые эһээдэг. 10Гэхэтэй сасуу таанад зүбөөр бодомжолжо байхат гэһэн найдалга Бурхан намда үгэнэ. Харин таанадые зүб харгыһаа хадууруулһан хүн, хэншье байг, илгаагүй зэмэлэгдэхэ.

11Аха дүүнэрни, хэрбээ бэлгээ отолуулга аша туһатай гэжэ минии айладабал, намайе хашан мүрдэхэгүй байгаа. Тиигэбэл Иисүүс Христоосой хэрээһэн тухай һургаал би номнохогүй һэм, зонойшье дунда үймөөн болохогүй һэн. 12Танай дунда үймөө татадаг зон таанадһаа холодобол һайн байгаа.

13Аха дүүнэрни, Бурхан таанадые эрхэ сүлөөдэ дуудаа. Энэ эрхэ сүлөөтнай хүсэлэнгүүдээ хангахын тулада муу юумэ үйлэдэхэ харгыда таанадые гансал бү түлхиг. Таанад бэе бэедээ дуратай байгты, бэе бэедээ туһалжа байгты. 14Юундэб гэхэдэ, Хуулиин бүхы зүйлнүүд: «Дүтынгөө хүндэ өөртөөл адли дуратай бай», – гэһэн энэ захяа заабари соо тобшологдоно. 15Харин бэе бэеэ таһара удара таталсажа, эдилсэжэ байһаар таанар өөһэдыгөө сүм хюдажа бү һалгаажархигты.

Арюун Һүлдын үрэ дүн, мүн бэеын хүсэлэнгүүд

16Һүлдын һургаһан ёһоор ажамидарагты, тиигэбэл муу муухай ябадал гаргахагүйт гэжэ би хэлэнэб. 17Юуб гэхэдэ, бэеымнай һанаашалһан юумэн Һүлдынхиһөө тад ондоо, тиин Һүлдын һанаашалһан юумэн бэеынхиһээ тад илгаатай. Тиимэһээ таанад һанаһан юумэеэ олон ушарта хэдэггүй бшуут. 18Хэрбээ таанадые Һүлдэ хүтэлжэ ябабал, Хуули таанадта хэрэггүй.

19Бэеын хүсэлэнгүүд иимэ: эрэдээ гү, али эхэнэртээ урбаха, забхай зальхай, һамуу һэбхи ябадал гаргаха, 20онгонуудта мүргэхэ, эльбэ жадха хэхэ, зэбүүрхэхэ, хэрүүл ама гаргаха, атаархаха, уурлаха, дээрэлхүү зантай байха, арсалдаха ба хэрэлдэхэ, буруу үзэл номнохо, 21жүтөөрхэхэ, архидаха ба аашалха гэхэ мэтын буруу ябадалнууд. Иимэ муу юумэ үйлэдэжэ байгаа хүнүүд Бурханай хаан орондо уг залгамжалан орожо шадахагүй гэжэ урда хэлэһэнээ би дахин дабтанаб.

22Арюун Һүлдын үрэ дүн болбол иимэ: хайра дуран, баяр, энхэ тайбан, тэсэбэри, һайн һанаан, ниигүүлэсхы сэдьхэл, үнэн сэхэ ябадал, 23номгон даруу зан. Иимэ зондо Хуули хэрэггүй. 24Өөһэдыгөө Христоос Иисүүстэ зорюулһан хүнүүд махабад бэеэ хорхойтолготойнь, хурисал ташаяантайнь хэрээһэндэ хадаа. 25Хэрбээ бидэ Арюун Һүлдөөр ажамидаржа байбал, Һүлдын һургаһан ёһоор лэ ябаял. 26Ехээрхүү дээрэлхүү зан гаргангүй, бэе бэедээ өөдэрхэн хэрүүлхэнгүй, атаархангүй ябаял даа.