‏ Hebrews 1

Хүбүүгээрээ дамжуулһан Бурханай Үгэ

1Урдандаа Бурхан лүндэншэдөөр дамжуулжа элдэб аргаар, олон удаа манай үбгэ эсэгэнэртэ үгэ хэлэдэг байгаа. 2Харин һүүлшын эдэ үдэрнүүдтэ Тэрэ Хүбүүгээрээ дамжуулан бидэндэ хэлэнэ. Бурхан Хүбүүнэйнгээ ашаар замбуулин дэлхэйе бүтээжэ, бүхы юумые залгамжалхаар Тэрэнээл һунгаа. 3Бурханай алдарай туяа сасаруулан,
Бурханай шанар шэнжэтэй байжа,
Тэрэ бүхы замбуулин дэлхэйе
Өөрын үгын хүсөөр баридаг.
Бидэниие нүгэлнүүдһээмнай арилгаад,
огторгой дээрэ һүр жабхаланта Бурханай
баруун талада һуугаа.
 4Бурханай Хүбүүнэй нэрэ түрэ
Эльгээмэлнүүдэй нэрэ түрэһөө аргагүй шухала,
тиин Хүбүүн Өөрөөшье Эльгээмэлнүүдһээ холо дээгүүр юм.

Бурханай Хүбүүн Эльгээмэлнүүдһээ дээгүүр

5«Ши Минии Хүбүүмниш. Мүнөөдэр Би Шинии Эсэгэшни болооб», – гэжэ Бурхан Өөрынгөө Эльгээмэлнүүдэй нэгэндэньшье хэлээ аал? «Би Тэрэнэй Эсэгэнь болохоб, Тэрэ Минии Хүбүүн болохо», – гэжэ Бурхан нэгэшье Эльгээмэл тухай хэлээ аал? 6Тиихэдэ Бурхан Өөрынгөө ууган Хүбүүе дэлхэй руу эльгээхэдээ: «Бурханай бүхы Эльгээмэлнүүд Тэрээндэ мүргэхэнь болтогой», – гэжэ хэлээ. 7Харин Эльгээмэлнүүд тухай: «Ши һалхиие Өөрын Эльгээмэл, галай дүлэ Өөрын зараса болгонош», – гэжэ Бурхан хэлээ. 8Гэхэдэ Хүбүүн тухайгаа Бурхан: «Хан шэрээшни Бурханай шэрээ мэтэ, хэтэ мүнхэдөө оршохо. Хаанта баягшни – зүб шударга ёһын баяг. 9Ши үнэн зүбтэ дуратайш, муу юумэ үзэн яданаш. Энээнэй түлөө Бурхан, Шинии Бурхан, хажуудашни байһан хэнииешье баярай тоһоор тоһодоогүй, харин гансал Шамайе тоһодон ёһолоол!», – гэжэ айладаа.

10Тэрэ үшөө иигэжэ айладхаа: «Ши, Эзэн, анха түрүүн газар дэлхэйе бүтээгээш, Өөрын гараар огторгойе байгуулааш. 11Тэдэ һүнэхэ, харин Ши үлэхэш. Тэдэ юумэнүүдшни хубсаһан мэтэ үмхирхэ. 12Ши тэдэниие хубсаһандал адли эбхэхэш, хубсаһандал мэтэ һэлгэхэш. Харин Ши Өөрөө хододоо хэбээрээ байхаш, тиин үдэрнүүдшни дууһахагүй».

13Бурхан Өөрынгөө Эльгээмэлнүүдэй нэгэндэньшье: «Бузар дайсадыеш хүл дорош дэбһүүлэн табитарни баруун гар таладам һуугаарай», – гэжэ хэлээгүй. 14Тиихэдээ Эльгээмэлнүүд хэд гээшэб? Тэдэ Бурханда алба хэжэ, абарагдаха ёһотой хүнүүдтэ туһалхаар Бурханай эльгээһэн һүлдэнүүд гээшэ.
Copyright information for BxrBBL2024