‏ Hebrews 11

Һүзэг этигэл

1Һүзэг этигэлтэй байхань найдажа байһан юумэндээ бата һаналтай байха, нюдөөрөө харадаггүй юумэнүүдтэ найдажа байха гээшэ. 2Һүзэг этигэлээрээ манай үбгэ эсэгэнэр Бурханай һайшаалда хүртөө.

3Һүзэг этигэлээрээ бидэ Бурханай үгөөр замбуулин зохёон бүтээгдээ гэжэ мэдэрнэбди, тиимэһээл нюдэндэмнай харагдадаг юумэнүүд харагдадаггүй юумэнүүдһээ бии болоо юм.

4Һүзэг этигэлээрээ Аабэл Хаяанһаа үлүү һайн үргэл Бурханда асараа. Бурхан Өөрөө тэрэнэй үргэлые һайшаажа, һүзэг этигэлээрнь Аабэлые үнэн сэдьхэлтэн гэжэ һайшаагаа. Аабэлэй үхэһэншье һаа, этигэл һүзэгынь мүнөө хүрэтэр маанадые һургана.

5Һүзэг этигэлэйнгээ ашаар Эноох үхэлтэй уулзаагүй. Үнэндөө Бурхан тэрэниие дээшэнь Өөртөө дэгдээгээ, хэншье Эноохые оложо шадаагүй. Дэгдүүлхынгээ урда тээ Эноох Бурханай һайшаалда хүртөө гэжэ Нангин Бэшэг соо бэшээтэй байдаг. 6Һүзэг этигэлгүй хүнүүдэй хэнииньшье Бурханай һайшаалда хүртэжэ шадахагүй: Бурханда ерэжэ байһан хүн Бурхан бии, Тэрэниие бэдэржэ байһан хүнүүдэй ашыень тэрэ харюулха гэжэ һүзэглэжэ байха ёһотой.

7Ерээдүйдэ тохёолдохо уһан галаб тухай хэнэйшье уридшалан мэдээгүй байхада Ной этигэл һүзэгөөрөө Бурханһаа һэргылэмжэ абаад, Бурханай үгөөр байжа, өөрыгөө болон өөрынгөө гэр бүлые абарха корабль баряа. Эсэстэнь, газар дэлхэйнхид гэмнэгдээд, Ной этигэл һүзэгөөрөө Бурханһаа үнэн сэдьхэлтэнэй залгаламша болобо.

8Бурханай үгэхэб гэжэ найдуулһан нютаг руу ошо гэжэ Бурханай уряалхада Абраһаам этигэл һүзэгөөрөө үгыень дуулаа. Хайшаашье ошохо байһанаа мэдэнгүй, тэрэ өөрынгөө орон нютагые орхижо ошоо. 9Бурханай үгэхэб гэжэ найдуулһан орон нютагта тэрэ баһал Бурханай найдуулгада хүртэһэн Исаак Яков хоёртойгоо этигэл һүзэгөөрөө хариин хүндэл майханууд соо амидардаг һэн. 10Бурханай зохёон бодхооһон бата һууритай хотые Абраһаам хүлеэжэ байгаа.

11Абраһаамай ехэ наһатай болоод, Саррын үхибүү түрэдэггүй байһаншье хада, тэдэнэр этигэл һүзэгөөрөө үхибүүтэй болоо. Бурхан найдуулһанаа бэелүүлхэ гэжэ Абраһаам ехэ этигэжэ байгаа. 12Үхэхын наана болоод байһан ганса Абраһаамһаа огторгойн мүшэдтэл адли, далайн эрьеын элһэндэл адли тоогүй олон үри һадаһад түрөө.

13Тэдэ булта этигэл һүзэгтэйгөөр наһа бараа. Тэдэнэр Бурханай найдуулһан юумэндэ хүртэнгүй үхэһэншье һаа, тэрэ найдуулгыень холоһоо хаража баясадаг, өөһэд тухайгаа бидэ газар дэлхэй дээрэ хариин хүнүүд, ерүүл хүнүүд гээшэбди гэжэ хэлэдэг бэлэй. 14Тиигэжэ хэлэдэг хүнүүд өөрынгөө орон нютагые бэдэржэ байнабди гэжэ элеэр харуулна. 15Өөһэдынгөө орхижо ошоһон орон нютаг тухай тэдэнэр һанадаг байбал, һөөргөө бусажа ошохо аргатай байха һэн. 16Харин тэдэнэр үлүү һайн, тэнгэриин орон нютагта зорижо байба. Тиимэһээ Бурхан тэдэнэй Бурханби гэхэдээ тэдэнһээ эшэдэггүй: Бурхан тэдэ зондо хото бэлдээд байна.

17Бурханай Абраһаамые туршахадань, этигэл һүзэгөөрөө тэрэ Исаак хүбүүгээ тахил болгон үргөө. Бурхан Абраһаамда найдуулга үгөө, тиимэһээ Абраһаам ганса хүбүүгээ тахил болгон үргэхэдэ бэлэн байгаа. 18«Исаагаар дамжан, ши Минии үгэхэб гэһэн үри хүүгэдтэй болохош», – гэжэ Бурхан тэрээндэ хэлэбэ. 19Исаагай үхэбэлнь, Бурхан тэрэниие амидыруулха аргатай гэжэ Абраһаам һанаа, тиин Абраһаам Исаагые үхэлһөө бусаажа абаа гэжэ хэлэхэдэ болохо.

20Исаак ерээдүйдэ этигэн, Яков Эсаав хоёрые буян хэшэгтээ хүртөөгөө.

21Яков наһа барахынгаа урда тээ этигэл һүзэгтэйгөөр Иосифой хүбүүдые бултыень буян хэшэгтээ хүртөөгөөд, таягаа тулан, Бурханда мүргөө.

22Иосиф наһа барахадаа, этигэл һүзэгэйнгөө ашаар Израилиин арад Египедые орхижо ошохо гэжэ айладаба, ябахадаа, яһыень абаад ябаха тухай захидал орхибо.

23Этигэл һүзэгтэйгөөр Моисейн аба эжынь хүбүүгээ түрэхэһөөнь эхилжэ гурбан һара хоргодуулжа байба. Бурханай тэдэндэ гайхалтай үхибүү хайрлаһыень хараад, тэдэ хаанай захиралтатай зүрилдэхэеэ айгаагүй. 24Моисей наһаяа хүсэхэдөө, этигэл һүзэгөөрөө фараоной басаганай хүбүүн гэжэ нэрлүүлхэеэ арсаба. 25Тэрэ богони хугасаанда нүгэлтэй амидаралтай байжа аяшаахын орондо Бурханай арадтай зобохонь дээрэ гэжэ тоолобо. 26Христоосой түлөө зобохо гээшэ бүхы Египедэй баялигһаа үлүү ехэ баялиг гэжэ Моисей бодожо байгаа, ушарынь гэхэдэ, тэрэ ерээдүйдэ үгтэхэ шагналаа хаража байгаа. 27Тэрэ этигэл һүзэгөөрөө хаанай уур сухалһаа айнгүй, Египедые орхёо һэн. Нюдэндэ харагдадаггүй Бурханиие хаража байһандал тэрэ бата хатуу байгаа. 28Этигэл һүзэгөөрөө тэрэ Паасхын баярые тогтоогоод, үхэлэй Эльгээмэлэй израильшуудай ууган хүбүүдтэнь хүрэнгүй үнгэрхын тула шуһаар үүдээ сасахыень арад зондоо захираа.

29Этигэл һүзэгөөрөө израильшууд Улаан далайе хуурай газар мэтэл гаталба, харин египедэй сэрэгшэдэй тон тиимээр гаталхаяа һэдэхэдэнь, уһан хана тэдэниие хушаба.

30Израильшууд долоон үдэрэй туршада Ерихоониие тойрожо ябаад, этигэл һүзэгөөрөө ханануудыень унагаагаа. 31Янхан эмэ Рахааб этигэл һүзэгөөрөө израилиин тагнуулшадые һайнаар угтан абаһандаал Бурханай үгые дуулаагүй хүнүүдтэй хамта хосороогүй.

32Үшөө юун тухай хэлэхэбиб? Гидоон, Бараак, Самсоон, Иптаа, Давид, Самуил, бусадшье лүндэншэд тухай хөөрэхэдэмни саг хүрэхэгүй. 33Тэдэнэр этигэл һүзэгөөрөө хаан оронуудые дайлан диилэдэг, үнэн зүб юумэ хэдэг, Бурханай найдуулһан юумэндэ хүртэдэг, арсалангуудай амыень хаадаг, 34галзуу гал унтараадаг, жадын эриһээ зайсадаг, һулахан бирагүй байгаад, шадалтай болодог, байлдаанда бүхэ байдаг, хариин сэрэгүүдые дарадаг бэлэй. 35Эхэнэрнүүдэй этигэл һүзэгэйнь ашаар үхэһэн түрэлхидыень амидыруулдаг байгаа.

Нүгөө зариман бүри һайн амидаралда хүртэхын тулада сүлөөлэлгэһөө арсан, тамалуулагдан үхөө. 36Зарим хүнүүд доромжолуулаад, сохюулаад, баһа гэнжэндэ хүлюулээд, түрмэдэ һуугаа. 37Нүгөөдүүлынь шулуугаар шэдэдэг, хюрөөгөөр хоёр болгон таһалдаг, жадаар хадхан аладаг бэлэй. Тэдэнэр хониной гү, али ямаанай арһаар бэеэ орёогоод, дуталдан, мүрдүүлэн, гомдохуулан тэнэдэг байгаа. 38Бүхы газар дэлхэйн хүнүүд тэдэнэй хаананьшье хүрэхэгүй! Гэхэдэ тэдэнэр сүл губяар болон хада уулаар тэнэжэ ябаа, агы нүхэнүүдтэ болон жалгануудта амидаржа байгаа.

39Этигэл һүзэгөөрөө тэдэнэр булта Бурханай һайшаалда хүртэһэншье һаа, Бурханай найдуулһан юумэндэ хүртөөгүй юм. 40Ушарынь юун бэ гэхэдэ, Бурхан бидэндэ үлүү һайн юумэ бэлдээд байна. Бидэнтэйл хамта тэдэниие эрхим түгэс болгохонь Бурханай зорилго мүн.