Heb 2 | BxrBBL2024 | STEP | Тиимэһээ урасхалда абтахагүйн тула бидэ дуулажа абаһан юумэеэ хатуугаар сахижа байха ёһотойбди.

‏ Hebrews 2

Абаралгын агуу һүр жабхалан

1 Тиимэһээ урасхалда абтахагүйн тула бидэ дуулажа абаһан юумэеэ хатуугаар сахижа байха ёһотойбди. 2 Манай үбгэ эсэгэнэртэ Эльгээмэлнүүдээр дамжуулан хэлэгдэһэн Бурханай үгэ үнэн зүб байгаа. Тиин тэрэ үгые баримталаагүй, али дуулаагүй хүн хүртэхэ ёһотойл хэһээлтэдэ хүртэдэг байгаа. 3 Тиимэ агууехэ абаралгые тоонгүй, бидэ хэһээлтэһээ яажа зугадаха гээшэбибди? Эзэн энэ абаралга тухай анхан Өөрөө айладхаа. Тэрэниие дуулаһан хүнүүд абаралга болбол үнэн гэжэ бидэндэ баталан хэлээ. 4 Бурхан тэрэ гэршэлгэдэ элдэб янзын гайхамшагта үзэгдэлнүүдые болон дүлгэ тэмдэгүүдые нэмэн харуулжа, Өөрынгөө һайн дураар Арюун Һүлдэ хайрлаа.

5 Бидэнэй дурдаһан шэнэ газар дэлхэйе захиржа байхаар Бурхан Эльгээмэлнүүдые табяагүй юм. 6 Харин Нангин Бэшэгэй нэгэ газарта: «Хүн гээшэ юун бэ, яагаад Тэрэниие Ши һананабши? Хүнэй хүбүүн юун бэ, яагаад Ши Тэрэниие анхарнабши? 7 Ойро зуура Тэрэниие Ши Эльгээмэлнүүдһээ доогуур табяаш, алдар солоор ба нэрэ хүндөөр титимлээш. 8 Ула доронь бүгэдые оруулааш», – гэжэ бэшээтэй байдаг.

Бурхан «ула доронь бүгэдые оруулаа» гэхэдээ, хүнэй мэдэлдэ хамаг юумэ үгөө гэһэн удхатай. Тиихэдэ бидэ хүнэй бүхы юумэ мэдэлдээ оруулаад байһыень үшөөл харанагүйбди. 9 Харин ойро зуура Эльгээмэлнүүдһээ доогуур табигдаад, Бурханай үршөөл хайраар бүхы хүнүүдэй түлөө үхэһэн Иисүүсые бидэ харанабди. Үхэлые дабажа гараад, алдар солодо ба нэрэ түрэдэ Тэрэнэй хүртэһые бидэ мүнөө харанабди. 10 Бурхан бүхы юумэ бүтээгөө, бүхы юумэн Тэрэнэй тула оршодог. Тэрэ олон үхибүүдые алдар солодоо хүртөөхэ һанаатай байгаа. Тиимэһээ хүнүүдые абаралгада Хүтэлэгшэ Иисүүсые Бурхан зоболон дабуулаад, эрхим түгэс болгоо.

11 Арюудхагша ба арюудхагдаһан бүхы хүнүүд нэгэ Эсэгэтэй. Тиимэһээ Иисүүс тэдэниие аха дүүнэрни гэжэ нэрлэхэеэ эшэдэггүй. 12 Иисүүс: «Би аха дүүнэртээ Танай нэрые хэлэхэб, сугларагшадай дунда Таниие магтахаб», – гэжэ Бурханда хэлээ.

13 Тэрэ үшөө: «Би Тэрээндэ этигэнэб, Тэрээндэл найданаб», «Бурханай Намда даалгаһан үхибүүдтэй Би мүнөө эндэ байнаб», – гэжэ хэлээ.

14 Үхибүүдэй махабад бэе ба шуһанһаа бүридэһэн хадань Иисүүс Өөрөө тэдэнтэйл адли хүн болоо. Үхэлые эрхэ мэдэлдээ абаад байһан шолмосые Өөрынгөө үхэлөөр хүсэгүй болгохын тула, 15 үхэлһөө айжа бүхы наһаараа барлагууд байһан хүнүүдые сүлөөлхын тула Тэрэ тиимэ юумэ бүтээгээ. 16 Эзэн үнэндөө Эльгээмэлнүүдые дэмжэнэ бэшэ, харин Абраһаамай удамые дэмжэнэ. 17 Найдабаритай ба үршөөл хайратай Ахамад Санаарта болоод, бүхы хүнүүдэй нүгэлнүүдыень хүлисүүлхын тула Бурханда алба хэжэ байхадаа, Өөрынгөө аха дүүнэртэй адли болохо ёһотой байгаа. 18 Тэрэ Өөрөө туршуулжа, зоболон эдлэһэн ушарһаа мүнөө туршалгада ороһон хүнүүдтэ туһалха аргатай юм.