Heb 3 | BxrBBL2024 | STEP | Бурханай баһал Өөртөө дуудаһан арюун гэгээн аха дүүнэрни! Баримталжа байһан һүзэгэймнай Ахамад Санаарта болгогдон эльгээгдэһэн Иисүүс тухай һанажа байгты.

‏ Hebrews 3

Иисүүс Моисейһээ дээгүүр юм

1 Бурханай баһал Өөртөө дуудаһан арюун гэгээн аха дүүнэрни! Баримталжа байһан һүзэгэймнай Ахамад Санаарта болгогдон эльгээгдэһэн Иисүүс тухай һанажа байгты. 2 Бурханай гэртэ ажаллахадаа Моисей ямар үнэн сэхэ, шударга байгааб, тон тиигэжэл Иисүүс энэ ажал хэхыень шэлэһэн Бурхандаа үнэн сэхэ байгаа. 3 Гэр бариһан хүн гэрһээ үлүү нэрэ түрэдэ хүртэдэг. Тон тиигэжэл Иисүүсшье Моисейһээ үлүү ехэ алдар солодо хүртэхэ ёһотой. 4 Бүхы гэрнүүдые ямар нэгэн хүн баряа, харин бүхы юумые Бурхан баряа. 5 Моисей Бурханай гэртэ зарасадал адли найдабаритай байхадаа, Бурханай ерээдүйдэ хэлэхэ юумые гэршэлэн хэлэхэ ёһотой байгаа. 6 Харин Христоос тэрээндэ орходоо Бурханай гэртэ байһан Хүбүүндэл адли найдабаритай. Өөһэдынгөө этигэжэ байһан зориг ба найдабари хадагалжа байбал, бидэ Тэрэнэй гэрынь болохобди.

7 – 8 – 9 – 10 – 11 «Үбгэ эсэгэнэртнай сүл губида ябахадаа дүшэн жэл соо Минии хэрэгүүдые хаража байһаншье һаа, Намайе тэндэ шалгаба, туршаба. Тиимэһээ Би тэрэ үеынхидтэ сухалдажа: „Тэдэнэр ходо эндүүржэ ябадаг, харгы замаарни ябадаггүй“, – гэжэ айладааб. Тиимэһээ Би уур сухалдаа „тэдэниие амаруулха гэһэн газартаа хэзээшье оруулхагүйб“гэжэ тангариглааб. Тиимэһээ таанад мүнөөдэр Бурханай дуу дуулахадаа, Бурханай урдаһаа үймөө татаһан үбгэ эсэгэнэртээл адли үсэд зан бү гаргагты», – гэжэ Арюун Һүлдэ хэлэнэ.

12 Аха дүүнэрни, амиды Бурханһаа холодохогүйн тула таанад булта нүгэлгүй, этигэлтэй байхые оролдожо байгты. 13 Таанадай хэн нэгэнэй нүгэлөөр хорхойтуулагдан дошхорхогүйн тула, Нангин Бэшэг соо бэшээтэй «мүнөөдэр» гэдэг үгын маанадта хандажа байхада, та бэе бэеэ үдэр бүхэндэ урмашуулжа байха ёһотойт. 14 Хэрбээ бидэ эхилһэн амидаралаа һүүл болоторнь хатуугаар баримталжа байбал, Христоосто хабаатай болонобди.

15 Нангин Бэшэг соо: «Таанад мүнөөдэр Бурханай дуу дуулахадаа, Бурханай урдаһаа үймөө татаһан үбгэ эсэгэнэртээл адли үсэд зан бү гаргагты», – гэжэ бэшээтэй. 16 Бурханай дуу дуулаһаншье һаа, урдаһаань үймөө татаһан хүнүүд хэд байгааб? Тэдэнэр булта Моисейн хүтэлбэри доро Египедһээ гараһан хүнүүд байгаа. 17 Ямар хүнүүдтэ Бурхан дүшэн жэлэй туршада сухалдажа байгааб? Нүгэлдэ унажа, сүл губида үхэһэн хүнүүдтэ бэшэ аал? 18 «Амаруулха гэһэн орондоо тэдэниие хэзээшье оруулхагүйб», – гэжэ Бурхан тангариглахадаа, хэд тухай хэлээб? Урдаһаань үймөө татаһан хүнүүд тухай айладаа. 19 Этигэл һүзэггүй байһанайнгаа түлөө тэдэ хүнүүдэй Бурханай амаруулха гэһэн орондо орожо шадахагүй байһыень бидэ харабабди.