‏ Hebrews 7

Христоос хэтэдээ бодото ахамад санаарта

1Мэлхицээдэг болбол Шалээмэй хаан, Дээдэ Бурханай санаарта байгаа. Абраһаамай дүрбэн хаашуулые дараад, дайнһаа бусажа ябахадань, Мэлхицээдэг тэрээнтэй ушаржа, үршөөл хайрадаа хүртөөгөө бэлэй. 2Тиин Абраһаам байһан юумэнэйгээ арбанай нэгэ хубиие Мэлхицээдэгтэ үгөө. Мэлхицээдэгэй нэрынь нэгэ удха болбол «үнэн сэдьхэлэй хаан»; тиихэдэ Шалээмэй хаан байһан хадань тэрэнэй нэрэ үшөө «энхэ тайбанай хаан» гэһэн удхатай. 3Тэрэ эхэ эсэгэгүй, угай бэшэггүй; тэрэнэй түрэһэн гү, али үхэһэн тухай гэршэлгэ байдаггүй. Тэрэ Бурханай Хүбүүндэ тон адли, хэтэдээ санаарта байха.

4Тэрэнэй агууехэ байһые таанар харагты. Манай үбгэ эсэгэ Абраһаам дайнда олзолһон бүхы юумэнэйнгээ арбанай нэгэ хубиие тэрээндэ үгөө. 5Санаартадаар табигдаһан Левиин үри һадаһад Хуулиин ёһоор баһал Абраһаамай үри һадаһад байһан өөрынгөө аха дүүнэрһээ, Израилиин арад түмэнэй олзын арбанай нэгэ хубиие суглуулха эрхэтэй. 6Мэлхицээдэг болбол Левиин үри һадаһан бэшэшье һаа, Абраһаамһаа арбанай нэгэ хубииень абаад, Бурханай найдуулгада хүртэһэн тэрэ Абраһаамые үршөөл хайрадаа хүртөөгөө. 7Үршөөлдөө хүртөөжэ байһан хүнэй үршөөгдэжэ байһан хүнһөө үлүү дээгүүр байһаниинь арсашагүй. 8Эндэ арбанай нэгэ хубиие суглуулжа байдаг санаартад үхэлтэ хүнүүд юм, харин тэндэ арбанай нэгэ хубиие абаһан Мэлхицээдэг амиды гэжэ гэршэлэгдээтэй. 9Абраһаамай арбанай нэгэ хубиие түлэхэдэ, Левийшье (үри һадаһадынь арбанай нэгэ хубиие суглуулдаг) өөрөө баһал түлөөһэ үгэһэн болоно. 10Мэлхицээдэгэй Абраһаамтай уулзахада, Левий үшөө түрөөгүй, харин үбгэ эсэгэ Абраһаамайнгаа досоонь байгаа гэжэ хэлэмээр.

11Израилиин арадта үгтэһэн Хуулиин ёһоор левидүүд санаартан болоо. Хэрбээ левидүүд түгэс түгэлдэр санаартад байбал, Аароной табиһанаар бэшэ, харин Мэлхицээдэгэй заяаһанаар ондоо санаартын гаража ерэхын хэрэг үгы һэн даа. 12Санаарталгын ээлжэлгэ хубилбал, Хуулииншье тогтоолнууд хубилгагдаха ёһотой байдаг. 13Бидэнэй дурдаһан Эзэн ондоо обогой хүн байгаа, тиин обогойнь нэгэшье хүн санаартын алба гүйсэдхээгүй. 14Эзэн болбол Иудын обогой гэжэ һайн мэдээжэ. Санаартад тухай асуудал хүндэхэдөө, Моисей энэ обог тухай юушье хэлээгүй.

15Мэлхицээдэгтэл адли ондоо санаартын бии болоһониинь эндэһээ бүри элеэр харагдана. 16Тэрэ Хуулиин ёһоор гү, али тогтоолоор бэшэ, харин дууһашагүй амидаралай хүсөөр санаарта болоо. 17«Мэлхицээдэгтэ адли Ши хэтын хэтэдэ санаарта байхаш», – гэжэ Нангин Бэшэг соо хэлэгдэнэ. 18Хуушан тогтоол бирагүй, аша туһагүй байһан дээрэһээ мүнөө хүсэгүй болгогдонхой. 19Моисейн Хуули ямаршье юумые эрхим түгэс болгоогүй. Тиимэһээ маанадай Бурханда ойртохын тула мүнөө бүри һайн найдуулга үгтэнэ.

20Тиихэдэ үшөө Бурханай тангариг үгтөө. Ондоо хүнүүдэй санаарта болоходо, Бурхан тиимэ тангариг үгөөгүй һэн. 21Харин Иисүүс болбол Бурханай Тэрээндэ үгэһэн тангаригай ёһоор санаарта болоо: «Эзэн „Ши хэтын хэтэдэ санаарта байхаш“гээд тангариглаа, тиин айладхаһан үгөө бусаажа абахагүй».

22Энэ илгаа Иисүүсые баһал бүри һайн хэлсээнэй найдабари болгоно.

23Ондоошье илгаа: бусад санаартад үхэдэг ушарһаа ехэ олон байгаа. 24Харин Иисүүсэй мүнхэ амидаржа байһан хадань Тэрэнэй санаартын албан баһа мүнхэ юм. 25Тиимэһээ зониие үргэлжэ абаржа байха аргатай Тэрэ санаарта хэтын хэтэдэ амиды байжа, Тэрээгүүр дамжан Бурханда ерэһэн хүнүүдэй түлөө Бурханай урда гуйдаг.

26Үнэндөө Иисүүс маанадтал хэрэгтэй Ахамад Санаарта юм. Тэрэ болбол арюун гэгээн; харата хэрэгүүдые үйлэдөөгүй, нүгэл шэбэлдэ унаагүй; нүгэлтэ зонһоо илгаруулагдаад, тэнгэридэ дэгдүүлэгдээ. 27Ондоо ахамад санаартадтал адли түрүүн өөрынгөө нүгэлнүүдэй түлөө, һүүлдэнь арад зоной нүгэлнүүдэй түлөө үдэр бүхэн үргэл асарха Тэрээндэ хэрэггүй. Тэрэ нэгэтэ, тиихэдэ хэтын хэтэдэ Өөрыгөө үргэл болгон үргөө. 28Моисейн Хуули дутагдалнуудтай хүнүүдые ахамад санаартаар табидаг, харин Хуулиин һүүлдэ үгтэһэн Бурханай тангариг хододоо эрхим түгэс Хүбүүниие ахамад санаартаар табяа.