‏ Isaiah 1

1Иудын хаашуул Уззияа, Ётаам, Ахааз ба Хэзэкияагай үе сагта Амооцой хүбүүн Исайда Иудын хан түрэ ба Иерусалим тухай Бурханай үзүүлһэн үзэгдэл гэбэл, энэ.

Өөрын арад зониие Бурхан гэмнэнэ

2Огторгой, соносо, газар дэлхэй, шагна!
Эзэн иигэжэ айладана:
«Тэжээн үндылгэһэн хүүгэдни
урдаһаамни эсэргүүсэн бодобол.
3Сар өөрынгөө эзэниие танидаг,
элжэгэншье хооллодог тэбшэеэ мэдэдэг лэ.
Харин Израиль мэдэдэггүй,
Минии арад түмэн ойлгодоггүй!»
4Ай, халаг, таанад нүгэлтэй арад, гэм зэмэтэйт,
муу зоной үринэр, муухай хүүгэдта!
Эзэниие буруушаажа, Израилиин Нангин Арюуниие орхибот,
Тэрээнһээ буруу харабат.
5Үсэрхэлгэеэ дам үргэлжэлүүлжэл байгаашад,
хаагууртнай үшөө сохимоор бэ?!
Толгойтнай хуу яра шарха,
бүхы зүрхэ сэдьхэлтнай үбшэ хабшан болонхой.
6Толгойһоо эхилээд, хүлэй ула хүрэтэр танай бэедэ
элүүр энхэ газар үгыл.
Шахаагүй, боогоогүй, эм дом түрхеэгүй шарханууд,
шулгархай, яранууд лэ байна.
7Орон нютагтнай хооһороо,
хотонуудтнай дууһан шатаагдаа,
хараһаар байтартнай хариин зон танай газар эзэмдэн,
бүхы юумыетнай залгина, һандаргана.
8Үзэм жэмэсэй сэсэрлигэй хооһон талмай дээрэ
ори гансаараа үлэһэн харууһалагшын урса гэрхэн мэтэ,
ургасын таряалан дээрэ үлэгшэ үбһэн отог мэтэ
Сионой басаган бүһэлэгдэн, ори гансаараа үлэбэл.
9Хэрбээ Түмэн Сэрэгтэ Эзэн маанадта
энэ жаахан үлэгдэл үлөөгөөгүй гээшэ һаань,
бидэ Содомдол адли һүнөөгдэхэ,
Гоморродол адли усадхагдаха байгаабди.
10Иерусалим, удамаршад ба улад зонтнай
Содом болон Гоморрын зондо адлил.
Эзэнэй таанадта буулгаһан айладхал соносогты!
Бурханайнгаа һургаал анхарагты!
11Тэрэ иигэжэ айладхана:
«Танай эды олон үргэл Намда хэрэгтэй бэшэл.
Хусын түгэс шатаалта үргэлдэ,
тарган тобир малай өөхэндэ үни хада саданхайб.
Бухын, хурьга, ямаанай шуһаншье Намда хэрэггүй.
12Намда мүргэхэеэ ерэхэдэтнай,
эдэ бүгэдые асарагты гэжэ хэн гуйнаб?!
Минии нангин үргөөгэй хашаа дэбисхэр
дэбһэжэ ябахыетнай хэн баадхаа юм?!
13Хэрэггүй эдэ бүхы бэлэгүүдээ бэшэ бү асарагты.
Уталгануудтнай Намда жэгшүүритэй муухай.
Шэнэ һара, амаралтын үдэр, шүтэлгын суглаануудыетнай
Би тэсэжэ шадахагүйб,
юуб гэхэдэ, тэдэ булта нүгэлөөртнай бузарлагдаа.
14Таанадай Шэнэ һарын баярнуудые,
мүргэлэй һайндэрнүүдые
Би үзэн яданаб!
Тэдэ Намда дарамта, Би тэдэнһээ эсэнэб.
15Таанадай гуйжа гараа үргэхэдэ, Би харангүй байхаб.
Хэдышье зальбараа хадатнай, Би шагнахагүйб.
Юуб гэхэдэ, гартнай шуһанда зуурагданхай.
16Бэеэ угаагты. Өөһэдыгөө сэбэрлэгты.
Минии хаража байһан муу муухай үйлэ хэрэгүүдээ орхигты.
Мууе үйлэдэхөө болигты.
17Һайн хэрэгүүдые хэжэ һурагты.
Үнэн зүбөөр хэрэг ябуулагты: дарлалта доро байгаашада туһалагты,
үншэн хэнзые аршалагты, бэлбэһэн эхэнэрые үмэглэгты».
18Эзэн иигэжэ айладхана:
«Эбээрээ хэлсэе. Таанадай улайтараа нүгэлөөр бузарлагдаһаншье һаатнай,
Би саһан мэтэ сагаан болотортнай угааха бэлэйб.
Хүрин улаан болотороо нүгэлдэ баригдаһаншье һаатнай,
сагаан нооһон мэтэ болотортнай угаан сэбэрлэхэ һэм.
19Минии үгэ дуулабал, энэ газарай хамаг һайниие эдлэн эдин байхат.
20Харин Минии урдаһаа эсэргүүсэн бодобол,
таанад һэлмээр сабшагдан хосорхот».
Эзэнэй аман иигэжэ айладхана.

Нүгэлтэй хото

21Хэзээ нэгэтэ үнэн сэхэ байһан ниислэл хото
янхан эхэнэртэл мэтэ яагаад болоо гээшэб?!
Нэгэ үедэ тэндэ үнэн шударга хэрэгүүд ябуулагдадаг,
үнэн зүб оршодог бэлэйл,
теэд мүнөө гансал алууршад үлэнхэй.
22Иерусалим, хэзээ нэгэтэ мүнгэн мэтэ толоржо байһанаа
мүнөө жэбэр болоош.
Урдандаа үзэмэй дараһан архи мэтэ аад,
мүнөө гансал хара уһандал адли болобош.
23Ударидагшадтнай гэмтэд, хулгайшадай нүхэд,
бэлэг, эдилгэ абаашад.
Тэдэ үншэдые хамгаалдаггүй,
бэлбэһэн эхэнэрнүүдэй хэрэг шагнадаггүй.

24Тиимэһээ Түмэн Сэрэгтэ Эзэн, Израилиин Хүсэтэ Бурхан, иигэжэ айладхана: «Одоо даа, эсэргүүшэдээ диилэхэб даа,
дайсадһаа үһөөгөө абахаб даа.
25Таанадай урдаһаа гараа һунгажа,
холисоһоо түмэр сэбэрлэдэг мэтээр таанадые сэбэрлэжэ,
бүхы холисыетнай зайсуулхаб.
26Удамаршадые, зүбшэгшэдыетнай анханай удамаршадтал адли болгоходом,
Иерусалим үнэн зүб, үнэн сэхэ хото гээд нэрлэгдэдэг болохо».
27Үнэн шударга хэрэгүүдээрээ Иерусалим абарагдаха,
гэмшэжэ, гэмээ мэдэрһэн зон үнэн зүб хэрэгүүдээрээ өөһэдтөө абарал буулгаха.
28Буһалгаалагшад, нүгэлтэй зон усадхагдаха,
Эзэниие мартагшад һалаха.
29Сарса мододто мүргэдэг байһанайнгаа түлөө таанад эшэхэт;
нангин һөөгүүдые шэлэһэнэйнгээ түлөө таанад нэрээ гутаахат.
30Набша намаагайнь шарлан унажа, хатажа байһан сарса модондол,
ямаршье уһагүй сэсэрлигтэл адли болохот.
31Хатаһан набша намаагай ошонһоо аһажа-шатажа байһандал,
хүсэ шадалтай зоншье муу муухай хэрэгүүдэйнгээ хэмээр
усадхагдажа эхилхэ, хэншье энэ гай тодхор саража-болюулжа шадахагүй.