Isa 11 | BxrBBL2024 | STEP | Ишайн уг отологдоһон модоной түгсүүл мэтэ, гэбэшье түгсүүлһээ шэнэ эшэ ургаха, түгсүүлһээ шэнэ мүшэр урган гараха.

‏ Isaiah 11

Амгалан тайбан хаан түрэ

1 Ишайн уг отологдоһон модоной түгсүүл мэтэ,
гэбэшье түгсүүлһээ шэнэ эшэ ургаха,
түгсүүлһээ шэнэ мүшэр урган гараха.
2 Эрдэмэй болон Эзэнһээ бэшэрхэ һүр һүлдэ,
ойлголтын болон хүсэнэй һүр һүлдэ,
сэсэн мэргэнэй болон оюун ухаанай һүр һүлдэ,
Эзэнэй һүр һүлдэ Тэрээн дээрэ оршохо.
3 Тэрэ Эзэнһээ бэшэрһэн мэдэрэлээр дүүрэхэ,
миин шагнаһанай гү, али миин обёорһоной ашаар
хэрэгүүдые шүүбэрилжэ байхагүй.
4 Үгытэй ядуу зоной хэрэгүүдые үнэн зүбөөр шиидхэжэ,
бэеэ аршалжа шадахагүй хүнүүдэй эрхэнүүдые хамгаалжа тэрэ байха.
Үгэ хүүрээрээ газарые хюдажа,
эшхэрхэдээ, муу хүниие һалгаажа байха.
5 Тэрэ үнэн зүбөөр бүһэлхэ,
үнэн сэхэ Тэрэнэй бүһэ болохо.

6 Шоно хурьгантай хамта амгалан тайбан амидарха,
ирбэс эшэгэнтэй хамта хэбтэхэ,
тугал залуу арсалантай хамта хоолложо тиихэдэ байхал.
Бишыхан хүбүүн тэдэниие адуулан байха.
7 Үнеэн баабгайтай хамта бэлшэжэ,
тэдэнэй түл хамта амгалан хэбтэжэ,
арсаланшье үхэртэл адли һолоомо эдижэ байхал.
8 Хорото могойн хажуугаар наадагша үхибүүн ямаршьегүй үлэхэ.
9 Бурханай нангин хада дээрэ
ямаршье муу юумэн болохогүй.
Уһан далайе дүүргэдэгтэл, газар дэлхэй хадаа
Эзэн тухай мэдэсээр дүүрэнхэй байха.

Эзэнэй арад һөөргөө бусаха

10 Тэрэ үдэр Ишайн үри һадаһан арадуудта туг болохо,
тэдэ арадууд тэрээн руу эрьехэ,
оршодог газарынь алдар суутай болохо.
11 Тэрэ үдэр Эзэн хоёрдохёо гараа һунгажа,
Өөрын арад түмэнэй үлдөөсые бусааха,
Ассириһээ, Египедһээ, Патроосһоо,
Күүшһээ, Элаамһаа, Шинаарһаа, Хамаадһаа болон
далайн аралнуудһаа асарха.
12 Дэлхэйн найман зүгөөр сүлэгдэн тараагдаһан
Израилиин болон Иудын хан түрэнүүдэй улад зониие
дахин суглуулан бусаажа байһан тухайгаа
үндэһэ яһатанда гэршэлэн харуулхын тула
Бурхан дохёо тэмдэг – туг үргэн байха.

13 Эпрааимай хан түрын атаархал болихо,
Иудын хан түрын дайсан мэтэ байхань үгы хэгдэхэ,
тэдэ эбтэй эетэй болохо.
14 Хамта тэдэ баруун зүгтэ пилиштүүдэй гүбээнүүдтэ добтолхо,
зүүн зүгтэ ажаһуугшадые тонохо.
Эдоом болон Моһааб руу гараа һунгаха,
Аммооной зон тэдээнэй мэдэлдэ орохо.

15 Эзэн Египедэй далайн хоолойе хатааха,
Евфрат мүрэн хатаахаяа халуун һалхяар үлеэлгэхэ,
хүнэй шаахайгаа тайлангүй тэрэниие гаталдаг болотор
долоон багахан горхон болгон хубааха.
16 Израилиин зоной Египедэй орон нютагһаа гараһандал адли
Ассиридэ амиды мэндэ үлэһэн Тэрэнэй арад түмэндэ
һөөргөө бусаха ехэ зам харгы нээгдэхэ.