Isaiah 12
Магтаал дуун
1Тэрэ үдэр ши иигэжэ хэлэхэш:«Эзэн, Таниие магтанаб!
Хэды намда уурлаашье һаа, уураа татажа,
минии һанаа амаруулаат.
2Оо, Бурхан – минии абарал!
Тэрээндэ найданаб, юунһээшье айнагүйб.
Юуб гэбэл, Эзэн – минии хүсэн, минии шадал!
Тэрэ – минии абарал!»
3Абаралай булагһаа баяртайгаар уһа удхан байхат!
4Тэрэ үдэр иигэжэ хэлэхэт:
«Эзэниие магтан дуулагты!
Нэрыень дуудагты!
Бүтээһэн хэрэгүүдынь зондо мэдүүлэгты!
Агууехэ байһыень зондо һануулагты!
5Гайхамшагта хэрэгүүдые үйлэдэһэн
Эзэниие магтан дуулагты!
Бүхы дэлхэй энээн тухайнь мэдэг лэ!
6Сионой ажаһуугшад, баясагты, шангаар дуулагты!
Израилиин арюун Бурхан танай дунда агууехэ!»
Copyright information for
BxrBBL2024