‏ Isaiah 13

Эзэн Вавилоониие хэһээхэ

1Энэ болбол Вавилоон тухай зүн табилга. Амооцой хүбүүн Исай иимэ үзэл үзэһэн байна.

2Нюсэгэн толгой дээрэ туг бодхоон намилзуулагты!
Сэрэгшэд руу хашхаран захиралта үгэгты!
Омог бардам хотын бартаануудта добтолон орохо тухай
дохёо тэмдэг үгэн, гараараа зангагты!
3Эзэн хадаа Өөрын гэгээнүүдтэ захираа.
Уур хилэнгынь орьёлжо,
илалтануудтань баясадаг баатарнуудаа Тэрэ дуудаа.

4Хада уулануудаар олон зоной хүл үймөөн мэтэ
ехэ шууяан дуулдана.
Энэ болбол хан түрэнүүд хүнхинэнэ,
үндэһэ яһатад хамта сугларна:
Түмэн Сэрэгтэ Эзэн сэрэгээ дайнда дуудана!
5Тэрэ сэрэгынь алас холын орон нютагуудһаа,
тэнгэриин хирхагһаа ерэнэ.
Бүхэли орон нютаг һалгааха гэжэ
Эзэн уур хилэнсэглэн ерэжэ байнал.

6Сурхирса уйлыт! Эзэнэй үдэр дүтэлөө!
Түгэс Хүсэтэһөө усадхал ерэжэ байна!
7Тиимэһээ хүн бүхэнэй гарынь һуларжа,
зүрхэниинь айһандаа шэшэрнэ.
8Тэдэ айжа, гар-хүлынь таталдажа, үбдэжэ эхилхэ.
Тэдэ түрэжэ байһан эхэнэртэл зобохо.
Бэе бэеэ айжа хараха,
нюурынь эшэһэндээ улайха.
9Аймшагтай уур хилэнгээр бадарһан
Эзэнэй хилэнсэгтэ үдэр дүтэлжэ байна.
Газар хооһон, ханха зайдан болгохо.
Нүгэлтэй зонииень усадхаха!
10Хаб харанхы болохо, тэнгэриин одод гэрэлтэхэгүй,
нараншье мандахаяа болихо, һарашье харагдахагүй.

11Эзэн иигэжэ айладхана:
«Муу муухайнь түлөө Би энэ газар дэлхэйе хэһээхэб,
муу зондо гэм зэмэйнь түлөө хэһээлтэ амасуулхаб!
Бардам, ехэрхүү һанаатай зоной хамарые сохихоб,
Хэрзэгы дошхон зоной бардам зангые болюулхаб!
12Хүнүүдые хомор болгохоб, шэжэр алтанһаа хомор,
Опиирой алтанһаа хомор.
13Огторгойе шэшэрүүлхэб.
Минии, Түмэн Сэрэгтэ Эзэнэй, уур хилэнгээ харуулхада,
газар дэлхэй байраһаа хүдэлэн шэшэрхэ.
14Ангуушанһаа тэрьедэһэн гүрөөһэндэл,
эзэгүй хонидтол адли зон өөрын арад руу эрьежэ,
түрэлхи нютаг руугаа зугадаха.
15Харин хэн нэгэн баригдаа һаа, жадаар хадхуулан үхэхэ,
олзологдоһон хэн нэгэн һэлмээр сабшагдаха.
16Хараһаар байтарынь нарай үхи хүүгэдынь үхэтэрөө сохюулха,
гэр байрануудынь тоногдохо,
һамгадынь хүсөөр эдлүүлэгдэхэ.

17Үзөөрэйгты, Би мүнгэ тоодоггүй, алта сэгнэдэггүй
Мидиин улад зониие дуудахаб.
18Тэдэ һурша номоороо залуу зониие хюдаха,
нялхануудыешье хайрлахагүй,
хүүгэдые хайрлаха гэжэ тэдээндэ үгы».

19Содом болон Гоморрые һалгааһандал,
Бурхан хаан түрэнүүдэй шэмэг,
халдейшүүдэй омогорхол Вавилоониие унагаан һандаргаха.
20Тэндэ хэншье хэзээдэшье оршин һуужа амидархагүй.
Нүүдэл байдалтай арааб хүн хэзээдэшье тэндэ
майхан татажа байхагүй.
Хонишод хонин һүрэгөө тэндэ адуулжа, амаржа байхагүй.
21Тэндэ зэлүүд хооһон газарай зэрлиг ан амитад амидардаг байха,
гэрнүүдынь шара шубуугаар дүүрэшэхэ.
Тэндэ тэмээн хяруулнууд амидарха,
һаглагар тэхэнүүд собхоролдохо.
22Байрануудтань сүүбэн шононууд улилдаха,
гоё һайхан ордонгуудтань зольбо нохойнууд хусалдаха.
Вавилооной һалаха саг ойртожо байна!
Үдэрнүүдынь дүүрээ гэхэдэ болохо.