‏ Isaiah 14

Сүлэлгэһөө бусалга

1Эзэн Яковые хайрлаха, Израилиие дахин шэлэхэ –
израильшуудые орон нютагтань бусааха!
Хариин зоншье тэдэнтэй ниилэжэ,
Яковай үринэртэй хамта ажаһуудаг болохо.
2Орон нютагтаа бусахадань
олохон арадууд Израильда туһалха.
Тиигээд Эзэнэй тэрэ газар нютагта
тэдэ арадууд Израилиин богоолнууд болохо.
Израилиие баряанда барижа байгаашад өөһэдөө баряанда баригдаха,
дарлагшадаа тэдэ өөһэдөө дарлаха болоно.

Вавилооной хааниие үхэлэй орон угтана

3Эзэн зоболон, үймөөн һамуунһаа, хүшэр хүндэ ажалһаа зониие сүлөөлхэ. 4Тэрэнэй эдэ бүгэдые гүйсэдхэхэдэнь, зон Вавилооной хааниие наадалжа, иигэжэ дууладаг болохо:

«Дарлагшын эсэс ерээ!
Уур хилэнгынь түгэсөө!
5Эзэн муу муухай зоной засаг зонхилолтые болюулба!
6Тэдэ угаа хайра гамгүйгөөр арадуудые дарладаг байгаа.
Диилэһэн үндэһэтэдөө эсэхэ сусахые мэдэнгүй
мүрдэн гүрдэн байгаа лэ.
7Мүнөө бүхы газар дэлхэй амарна,
хүн бүхэн баяртайгаар дуу дуулана.
8Кипарис мододшье, Ливаанай хушануудшье
дарлагша хаанай үгы болоходо баярлана.
Тэдэниие отолхо хүн үгы болоо бшуу!»

9Вавилооной хаанай урдаһаа үхэлэй орон хүдэлбэ.
Үхэгшэдые тэрэ һэреэгээ:
дэлхэйн бүхы удамаршадые, шэрээнһээнь бүхы хаашуулые бодхоо.
10Тэдэ бултадаа тэрээндэ хандажа,
мүнөө хүсэгүй болоһон тухайнь,
өөһэдтэнь адли болоһон тухайнь хэлэнэ.
11Ятагай хүгжэмөөр дууряагдан,
үхэлэй орон руу доошоо буулгагдаһан,
хорхойнуудаар хүреэлэгдэһэн тухайнь тэдэ дуулана.

12Үүрэй солбон, үүрэй толоной хүбүүн
ши огторгойһоо унааш!
Урдань арадуудые дарлажа байгша ши
газар руу хаягдан унабаш!
13Дээшээ огторгой руу дэгдэн гаража,
эгээл үндэр мүшэдһөө дээгүүр
өөрынгөө хан шэрээ зохёохо һанаатай байгааш.
Бурхадай суглардаг хойто зүгэй хада уула дээрэ
хаан мэтэ заларан һууха тухайгаа ши һанадаг байгаа бэлэйш.
14Үүлэдэй орой дээрэ гаража,
Дээдэ Бурхандал адли болохоёо һанаһан байгааш.
15Теэд үхэлэй ороной эгээл доодо хуби руунь ши хаягдабаш!
16Үхэһэн зон шамайе хаража гайхаха:
«Дэлхэйе доһолгоһон, хаан түрэнүүдые шэшэрүүлһэн хүн
энэ гээшэ гү?
17Дэлхэйе элһэн сүл губи болгоһон, хотонуудые һандаргааһан,
баряанда абтаһан зониие оройдоошье табидаггүй хүн энэ гээшэ гү?»

18Дэлхэйн хаашуул бултадаа алдарта булашануудтаа хэбтэжэ байна.
19Харин ши ямаршье булашагүйш,
шарлаһан мүшэр мэтэ хаяатайш.
Үхэгшэдэй дунда хэбтэнэш, һэлмээр сабшагдаһан зоной дунда.
Ши шулуун нүхэн руу хаюулбаш.
Хүүршни хүлдэ гэшхэгдэхэ.
20Ши орон нютагаа һандаргааш, өөрынгөө улад зониие алааш.
Тиимэһээ бусад хаашуулдал адляар ши хүдөөлүүлэгдэхэгүйш.
Муу муухай уг унгиһааш хэншье амиды мэндэ үлэхэгүй,
нэрэньшье үлэхэгүй!

21Эсэгынь гэмэй түлөө хүбүүдтэнь саазын табсан бэлдэгты!
Тэдэнэй хэнииньшье орон нютагые зонхилон һуухагүй,
хотонуудаараа дэлхэйе бүрхөөхэгүй!

Вавилоон үгы хэгдэхэ

22Түмэн Сэрэгтэ Эзэн иигэжэ айладхана: «Би Вавилоондо добтолхоб, ехэ һандарал асархаб. Хэнииешье амиды мэндэ үлөөхэгүйб, үхи хүүгэдыешье усадхахаб. Энэ болбол Би, Эзэн, айладхана мүн! 23Вавилоониие заряануудай байра, намаг болгохоб. Бүхы юумэ усадхадаг шүүрээр Вавилоониие хаман гаргахаб. Энэ хадаа Би, Түмэн Сэрэгтэ Эзэн, айладхана мүн!»

Ассириин зон үгы хэгдэхэ

24Түмэн Сэрэгтэ Эзэн иигэжэ тангариг үргөө:
«Үнэхөөр Минии һанаһан хэрэг бэелжэ,
Минии түсэблэһэнэй ёһоор үйлэ бүтэхэ.
25Минии газар дайда Израиль соо
Ассириин зониие хюдан һалгаахаб,
хада ууланууд дээрээ тэдэниие дэбһэн гэшхэхэб.
Өөрынгөө улад зониие Ассириин хүндэ хөөмэгшэһөө сүлөөлхэб,
мөөрһөөнь хүндэ ашаа абан буулгахаб!»
26Энэ болбол бүхэдэлхэйн хуби заяа шиидхэдэг түсэб,
үндэһэтэдые хэһээхын тула тэдээн дээгүүр һунгаатай гар!
27Түмэн Сэрэгтэ Эзэнэй түсэблэһэн юумэндэ
хэн һаалта хэжэ шадахаб?
Гарынь һунгаатай – хэн болюулжа шадахаб?

Пилиштын зон усадхагдаха

28Ахааз хаанай наһа бараһан жэлдэ иимэ зүн айладхагдаһан гээшэ.

29Пилишт орон нютагай улад зон,
таанадые сохижо байһан ташуур хухараа гэжэ бү баярлагты.
Юуб гэхэдэ, нэгэ могойн үхэхэдэ,
үшөө ехэ хорото могой орондонь ерэдэг гээшэл.
Тэрэнэй үндэгэнһөө ниидэдэг гал могой гарахал.
30Эзэн үгытэй ядуу зоноо анхарха,
аюулгүй, садхалан ажаһуулгаха.
Харин таанадые, пилишт зониие,
эдихэ хоолгүй болгон Тэрэ усадхаха,
таанадай хэншье амиды мэндэ үлэхэгүй.
31Уйлыт, бартаанууд! Уляарай, хото!
Пилишт ороной бүхы хотонуудай улад зон, айгты!
Хойто зүгһөө унинха тооһон харагдана –
энэ хадаа дайсанай сэрэг жэгдэ жагсаалаар ерэжэ байна гээшэл.

32«Пилишт орон нютагһаа маанад руу ерэжэ байгааша элшэнэртэ
юун гэжэ харюу үгэхэбибди?»
«Эзэн Сионой үндэһэ һуури табяа,
Тэрэнэй арад түмэнэй зобожо зүдэрһэн зон
тэндэ хоргодохо аргатай болоо гэжэ тэдээндэ хэлэхэбди».