Isa 15 | BxrBBL2024 | STEP | Энэ болбол Моһааб тушаа зүгнэлгэ. Һүниин туршада дээрмэдүүлээд, Аар-Моһааб аниргүй болоо. Һүниин туршада дээрмэдүүлээд, Киир-Моһааб анираа хатаа.

‏ Isaiah 15

Моһааб үгы хэгдэхэ

1 Энэ болбол Моһааб тушаа зүгнэлгэ.

Һүниин туршада дээрмэдүүлээд, Аар-Моһааб аниргүй болоо.
Һүниин туршада дээрмэдүүлээд, Киир-Моһааб анираа хатаа.
2 Дибоон хотын зон гашуудан уйлаһаар
мүргэлэй газарнууд өөдэ гарана.
Моһаабай улад зон Нэбоо болон Мэдэбаа тушаа сурхирса уйлана.
Гашуудалай тэмдэг – хүн бүхэнэйнь толгой, һахал хюһагданхай.
3 Үйлсэнүүдээр зон гашуудалай таар хубсаһа үмдэнхэй ябана.
Гэрэй хушалтанууд дээрэ болон хотын талмайнуудаар
хүн бүхэн сурхирса уйлана, нулимса унагаана.
4 Хэшбоон болон Элэалээ хотонуудай ажаһуугшад
шангаар уйлалдажа,
абяаниинь Яаһац хүрэтэр дуулдана.
Моһаабай сэрэг һалганана, сэдьхэлынь шэшэрнэ.
5 Моһааб тушаа зүрхэ сэдьхэлни уйлана.
Моһаабай зон Цооһар болон Эглаат-Шэлишияа руу гүйлдэнэ.
Лүхиит руу үгсэхэдөө, уйлалдан гарана,
гай тухайгаа шангаар бархиралдан, Хоронааһим руу ошоно.
6 Нимриим шэргэшоо, ногоон шарлаа, хатаа,
ногоорһон юуншье үгы болоо.
7 Зон нөөсэлһэн баялигтаяа хамта тэрьедэхэ гэжэ
нюруу газар Аравиимаар хүндэлэн гаран ябана.
8 Моһаабай бүхы хилэнүүдээр шашхаан-хашхараан!
Эглааим болон Бээр-Элиим хотонуудташье
эдэ бүгэдэ дуулдана.
9 Димооной уһан шуһаар дүүрэн.
Бурхан тэрээндэ үшөөшье гай тодхор татаха түсэбтэй:
амиды үлэһэн моһаабууд руу,
энэ орон нютагта амиды үлэгшэ зон руу
арсалангуудые эльгэхэ!