Isa 16 | BxrBBL2024 | STEP | Сээла хотоһоо элһэн сүл губяар Иерусалим руу, захирагшадань бэлэг болгон хурьгадые эльгээгты.

‏ Isaiah 16

Моһаабай зоной гай гасалан

1 Сээла хотоһоо элһэн сүл губяар Иерусалим руу,
захирагшадань бэлэг болгон хурьгадые эльгээгты.
2 Арнооной гарамай дэргэдэ Моһаабай эхэнэрнүүд
уурхайһаа хаюулаад, даляа сохин,
хөөрсэгэнэжэ байһан шубуудтал адли байха.
3 Тэдэ Иудын улад зондо иигэжэ хэлэнэ:
Зүбшэл бидэндэ үгыт, шиидыт.
Үдэрэй халуунда һүүдэр үгэдэг модондол маанадые аршалан,
амархыемнай зүбшөөгыт.
Аюулһаа тэрьедэгшэдые халхалыт,
түгэншэлэн ябагшадые дайсадта барижа бү үгыт.
4 Моһаабай дүрбэгшэ зониие байлгыт,
дээрмэшэдһээ халхалыт!

Дарлагшад үгы болохо, сүйд һандарал болихо,
энэ орон нютагта дайсад үгы болохо.
5 Тиихэдэнь хан шэрээ үнэн сэхээр бата болохо,
тэрээн дээрэ, Давидай майхан соо үнэн зүб шүүгшэ заларха.
Тэрэ үнэн зүбые баримталан хэрэгүүдые үйлэдэхэ,
зүб шударгаар хэрэгүүдые шиидхэхэ.
6 Иудын зон хэлэнэ:
Моһаабай зоной бардам зантайень мэдэхэбди.
Ехэрхүү зантайень, аашатайень дуулаһан байнабди.
Тэдэнэй һайрхадагынь хооһон, худал хуурмаг.

7 Тиимэһээ Моһаабай зон уйлалдаха.
Киир-Харээсэдэй үзэмтэй һайхан лепёошхонуудые һанажа,
зобон, уйлыт!
8 Хэшбооной болон Сибмаагай үзэмэй модоной сэсэрлигүүд хатаа.
Хариин удамаршад энэ сэсэрлигэй үгэһэн үзэмэй дараһан архи һайса ууһан байха.
Язээр хото хүрэтэр, саашаа зүүн тээшээ элһэн сүл губяар,
баруулжаа Дабһата далайн нүгөө эрье хүрэтэр
энэ сэсэрлигэй мүшэрнүүд таран надхадаг бэлэйл.
9 Тиимэ ушарһаа би Язээрэй түлөө уйлаһандал,
Сибмаагай үзэм тушаа гашуудан уйланаб.
Улад зониие баясуулагша жэмэс суглуулха үе сагай үгы болоһондонь
би Хэшбоон ба Элэалээ гэгшэнүүд тушаа нулимсаа адханаб.
10 Үрэжэлтэ газар дайдада хэншье баясан хүхинэгүй,
үзэмэй модоной сэсэрлигүүд соо хэншье дуу дууланагүй,
шангаар хашхаран баярланагүй.
Үзэм шахаха болигдоо. Баяртай дуу шууяан таһалдаа.
11 Моһааб тушаа уйдхар гашуудал досоомни байна,
зүрхэ сэдьхэлни Киир-Хээрэс тушаа ёолон-үбдэн байна.

12 Моһаабай улад зоной эсэтэрээ обоонуудта гаража ерэн,
шүтөөнүүдтээ зальбарбашье, тэрэнь ямаршье туһа болохогүй.

13 Иигэжэ Эзэн Моһааб тушаа урид айладхаһан байна. 14 Мүнөө хадаа Эзэн иигэжэ айладхана:

– Ажалда зониие хүлһэлэн абахадаа он жэлнүүдые тоолодогтол, гурбан жэлые тоолоходо, Моһаабай һүр жабхалан һуларан һүнэхэ. Олон зонһоонь оройдоол нэгэ хэдынь амиды мэндэ үлэхэ. Тэдэньшье ахир, хүсэгүй байхал.