Isaiah 18
Бурхан Эфиопиие хэһээнэ
1Ай даа, Эфиопиин голнуудай саада тээдалинуудай абяагаар дүүрэһэн орон нютагта
гай тодхор болохонь!
2Хулһан онгосонуудаар элшэнэр эльгээгдэнэ.
Хурдан элшэнэр, үндэр нюргатай,
мэлигэр арһатай арад руу шамдыт!
Тэрэ арадһаа бүхы зон айдаг.
Хүсэтэй, шанга арад зон бүгэдые диилэдэг,
орон нютагынь гол мүрэнүүдээр хубаагданхай байдаг лэ.
3Юртэмсын улад зон, газар дэлхэй дээрэ ажаһуугша бүгэдэ зон!
Гүбээнүүд дээрэ дохёо тэмдэг туг үргэгдэхэ, харахат!
Бүреэгэй дуу шагнахат!
4Эзэн намда иигэжэ айладхаа:
«Ургаса хуряалгын халуун үдэр зэрэлгээ хараһандал,
үдэрэй ааяма халуунай үедэ наранай ялардагтал эли тодоор
Би юу боложо байгаашые Өөрын байраһаа
һанаа амар хаража байхаб».
5Үзэмэй жэмэс хуряахын урда тээ,
сэсэглэжэ дүүрээд, үзэмэй модоной эдеэшээд байхада,
дайсан Эфиопиие һалгааха.
Үзэм жэмэсэй мүшэр тайраһандал, Эзэн тэдэниие хюдаха.
6Алуулһан зонойнь бэенүүд уулын мяхаша шубуудай,
зэрлиг арьяатанай хүнэһэн болохо.
Зундаа шубууд тэдэниие тоншохо, үбэлдөө ан гүрөөл зулгаан эдихэ.
7Үндэр нюргатай, мэлигэр арһатай,
холо ойрые айлгаһан энэ арад түмэнһөө,
гол мүрэнөөр хубаарилагдаһан энэ орон нютагай хүсэтэй шанга зонһоо
Түмэн Сэрэгтэ Эзэнэй бэлэг абаха саг ойртоо.
Түмэн Сэрэгтэ Эзэндэ мүргэхэ газарта –
Сион уулада тэрэ бэлэг барюулагдахал.
Copyright information for
BxrBBL2024