‏ Isaiah 19

Бурхан Египедые хэһээнэ

1Энэ болбол Египет тушаа зүн.

Эзэн хурдан үүлэ хүлэглэн, Египет руу ерэжэ ябана.
Египедэй шүтөөнүүд Тэрэнэй урда шэшэржэ,
Египедэй зон айжа-һүрдэжэ байна.

2Эзэн иигэжэ айладхана:
«Египедэй зониие өөһэд өөһэдтэйнь мүргэлдүүлэн,
урда урдаһаань тухирхаб.
Тэдэ аха дүүгэйнгөө урдаһаа, хүршынгөө урдаһаа,
хотонь хотын урдаһаа
хаанта засаг барихын тула хоорондоо дайлалдаха.
3Би Египедэй зоной түсэбүүдые һалгаахаб,
һүр һүлдыень доройтуулхаб.
Тэдэ шүтөөнүүдтэ, үхэһэн зоной һүнэһэ дуудагшадта,
үзэл үзөөшэдтэ хандаха.
4Би Египедэй зониие хэрзэгы шэрүүн эзэндэ,
дошхон хаанай мэдэлдэ үгэхэб.
Энэ болбол Би, Түмэн Сэрэгтэ Эзэн, айладхана мүн!»

5Далайн уһан хатажа,
Нил мүрэнэй уһан шэргэхэ.
6Гол мүрэнүүд үмхэй муухай үнэр гарган,
Египедэй һубагууд нариихан боло болоһоор шэргэхэ.
Хулһан, зэгсэнүүд хатаха.
7Нил мүрэнэй эрьеэр таригдаһан ургамал хатажа,
хиидэжэ һалаха.
8Загаһашад уйлалдан, шангаар бархиралдаха.
Тэдэнэй губшуурнуудта юуншье баригдахагүй.
9Маалинга бүд нэхэгшэд аргагүйдэхэ,
юуб гэхэдэ, гол мүрэнэй хатахада,
маалинга ургамал ургахаяа болихо.
10Бүд нэхэгшэд тодхорто орохо,
хүлһэншэ ажалтан уруу дуруунууд болохо.

11Нээрээ, Цооһан хотын ударидагшад тэнэг!
Фараоной эгээл мэргэн ухаатай гэдэг зон тэнэг зүбшэлнүүдые үгэнэ.
«Сэсэн мэргэшүүлэй уг удам,
эртэ урдын хаашуулай ухаа халан абаһан зон гээшэбди»
гэжэ фараондо яажа хэлэжэ шадахабта?!
12Тэрэ сэсэн мэргэн зүбшэгшэдтнай хаанаб?
Байгаа һаа, Түмэн Сэрэгтэ Эзэнэй
Египет тушаа юу түсэблэһые хэлэжэ үгэг лэ.
13Цооһанай ударидагшад ухаагүй болоо,
Ноодой ударидагшад өөһэдыгөө мэхэлнэ!
Обогуудайнь түшэг зон Египедые буруу замда оруулба.
14Буруу зүбшэл үгэхыень Эзэн тэдэниие баадхаба.
Тиихэдэнь тэдэ Египедые бүхы юумэ буруу хүүлэнэ.
Египет хадаа һогтуу хүнэй
бөөлжэһэндөө худхалдан найгалзадагтал гуйбана.
15Иигэжэ хэншье –
баян, үгытэйшье, засаг баряаша, юрын хүншье
Египедтэ ямаршье туһа хэжэ шадахагүй.

Египедэйхид Эзэндэ мүргэдэг болохо

16Египедэй зон эмэ зондол адли аймхай болохо. Түмэн Сэрэгтэ Эзэнэй тэдэниие хэһээхэеэ гараа һунгахые харахадаа, тэдэ айн шэшэржэ байха. 17Иудын газар дайда Египедэй зондо айха зүйл болохо. Иудын хан түрэ тушаа Түмэн Сэрэгтэ Эзэнэй тогтооһон шиидхэбэриие һанаха бүридөө тэдэ шэшэрэлдэн айхал.

18Тэрэ үе сагай ерэхэдэ, Египедэй табан хото соо зон еврей хэлэн дээрэ дуугаралдадаг болохо, Түмэн Сэрэгтэ Эзэниие дурдан тангаригладаг байха. Эдэ хотонуудай нэгэн «Наранай хото» гээд нэрлэгдэдэг болохо.

19Тэрэ сагай тохёолдоходо, Египедэй орон нютагта Эзэндэ үргэлэй шэрээ баригдаха, Египедэй хилэнүүдээр Эзэндэ шулуун бахананууд бодхоогдохо. 20Энэнь Египедэй орон нютагта Түмэн Сэрэгтэ Эзэнэй байһанай гэршэ тэмдэг болохо.

Тэндэ зон дарлагдажа эхилхэдээ, абархыень Эзэн Бурханиие дуудаха. Тиихэдэнь Тэрэ абархыень хэн нэгэниие эльгээхэ. 21Эзэн Өөрыгөө Египедтэ мэдүүлэн харуулжа, тэдэ Бурханиие мэдэдэг боложо, зальбаржа, малаар үргэл, мүн талха таряанай үргэл үргэжэ, шахаа тангаригуудые үгэжэ, саашадаа бэелүүлдэг байха. 22Эзэн Египедэй зониие хэһээхэ, хэһээгээшье хадаа эдэгээхэ. Тэдэнэй Өөртэнь хандахада, Эзэн гуйлтыень дуулажа, эдэгээхэл.

23Тэрэ сагай ерэхэдэ, Египедһээ Ассири хүрэтэр дардам харгы бии боложо, Ассириин зон Египет руу, Египедэй улад Ассири руу ябадаг болохо, тэдэ хамтадаа Эзэндэ мүргэдэг байхал.

24Тэрэ сагай ерэхэдэ, Израиль Египет ба Ассиритэй хамтаржа, бүхы дэлхэй дотор эдэ орон нютагуудта юрөөл шэнгэхэл. 25Түмэн Сэрэгтэ Эзэн тэдэниие юрөөжэ, «Минии арад түмэн болохо Египет, Минии бүтээгшэ Ассири, Минии шэлэгдэмэл арад зон Израиль, Би таанадые юрөөнэб!» гэжэ айладхал буулгаха.