‏ Isaiah 2

Амгалан тайбан мандаха

1Иудын хан түрэ болон Иерусалим тушаа Амооцой хүбүүн Исайда Бурханай үзүүлэн айладхаһан үгэ гэбэл, энэ.

2Һүүлшын үдэрнүүдтэ иимэ юумэн болохо:
Эзэнэй үргөөгэй оршодог хада
бусад хадануудһаа эгээл үндэр болохо,
толгойнуудһаа эгээл үндэрынь болон тодорхо.
Тэрээн руу бүхы үндэһэтэд урдан хүүехэл.
3Тиигээд олон арадууд ошожо, иигэжэ хэлэхэ:
«Эзэнэй хада руу,
Яковай Бурханай нангин үргөө тээшээ үгсэн ошоё.
Юу хэхыемнай Бурхан һургаха,
зааһан замаарнь ябахабди».
Юуб гэбэл, Хуули Сионһоо гараха,
Эзэнэй үгэ – Иерусалимһаа.
4Үндэһэтэдэй хоорондохи арсалдаае Тэрэ болюулха,
олон арад түмэниие шүүхэ.
Тэдэ һэлмэнүүдээ анзаһанай шүдэн болгон,
жадануудаа хадуур болгон дабтаха.
Үндэһэтэн нүгөө үндэһэтэнэй урдаһаа
һэлмэ бэшэ далайхагүй,
дайнай эрдэм шудалхаяа болихо.
5Яковай үри һадаһад, ерэгты, Эзэнэй гэрэл туяа соо алхалан ябая!

Хүнэй бардамлахань болюулагдаха

6Теэд Та, Эзэн Бурхан,
Өөрынгөө арад түмэн болохо Яковай үри һадаһадые орхёот!
Юуб гэхэдэ, тэдэ зүүн зүгэй заншалтай,
пилиштүүд шэнги үзэлшэ мэдэлшэдтэй болонхой, хариин зонтой холилдоно.
7Тэдэнэй газар нютагта тоолошогүй ехэ алта мүнгэн нөөсэлэгдөө,
морид дүүрэн, гоё һайхан тэргэнүүдынь тоолохын аргагүй олон.
8Газар нютагынь шүтөөнүүдөөр дүүрэнхэй,
өөрын гараар бүтээһэн бүтээлнүүдтээ тэдэ мүргэнэ.

9Хүн бүхэниинь иигэжэ доройтожо, нэрээ гутаана,
Та тэдэниие хүлисэхэгүйт.

10Эзэнэй уур хилэнһээ, һүр жабхаланта хүсэ шадалһаа тэрьедэжэ,
хадын хабшалда шурган гү, али газарта нүхэ малтан хоро!
11Хүнэй бардам харасын үгы болохо,
хүнэй дээрэлхүү зангай номгодохо саг дүтэлжэ байна.
Тэрэ үдэр Эзэн лэ гансаараа үндэр зандаа үлэхэл.
12Энэ хадаа бардам ба дээрэлхүү, биб гэһэн хүн бүхэниие
панхаруутуулха үдэр – Түмэн Сэрэгтэ Эзэнэй үдэр!
13Тэрэ Ливаанай үндэр, өөдөө ербыһэн үнэтэ хуша мододые болон
Башаан газарай бүхы сарса мододые үгы хэхэ.
14Тэрэ бүхы үндэр хада уулануудые,
гүбээнүүдые жэгдэлэн набтар болгохо.
15Ямаршье үндэр самхаг,
яажашье бүхэлэгдэһэн хэрэм хана Тэрэ унагааха.
16Таршиишай ямаршье томо,
гоё һайхан уһанай онгосонуудые Тэрэ шэнгээхэ.
17– 18Хүнэй бардам, дээрэлхүү зан тиихэдэ галхаагдан номгорхо.
Шүтөөнүүд оро һэегүй үгы болохо,
иигэжэ тэрэ үдэр Эзэн гансаараал үндэр зандаа үлэхэ.
19Эзэнэй газар дэлхэйе доһолгохоёо ерэхэдэ,
уур хилэнһээнь, һүр жабхаланта хүсэ шадалһаань тэрьедэхэ гэжэ
зон хадын агынууд руу, газарай габа руу хорохо.

20Тэрэ үдэрэй мандахадань, зон мүргэхэеэ өөһэдтөө хэһэн
алта, мүнгэн шүтөөнүүдөө хаяжа,
мана һохорнууд, һарьһан эрбээхэйнүүд руу шэдэхэ.
21Эзэнэй газар дэлхэйе доһолгохоёо ерэхэдэ,
уур хилэнһээнь, һүр жабхаланта хүсэ шадалһаань тэрьедэхэ гэжэ
зон хабсагайн хабшал руу, хадын агынууд руу хорохо.

22Хүнэй ами наһан – амисхал гээшэ,
үхэхэ табисууртай нэгэндэ найдаһанай дэмы.
Тэрэ юуншье бэшэ бшуу.