‏ Isaiah 21

Далайн эрьедэхи элһэн сүл губи тухай зүн

1Далайн эрьедэхи элһэн сүл губи тухай зүн.

Урда зүгэй газараар бурьялагша
хуй һалхин мэтэ дайсан
элһэн сүл губиһаа, аймшагтай газарһаа ерэжэ байна.

2Аймшагтай үзэгдэл намда харагдаа:
урбагша урбана, дээрмэшэн дээрмэдэнэ!
«Элаам, добтоло! Миди, бүһэлэ!
Бүхы ёолохо ушарнуудые Би болюулхаб».

3Хэбэл руум хадхаба.
Түрэжэ байгша эхэнэртэл,
зобожо, үбдэжэ байнаб.
Гай зоболонһоо боложо юушье дууланагүйб,
айһандаа юушье харанагүйб!
 4Һүр һүлдэмни доройтоо,
айһандаа шэшэржэ байнаб.
Урдандаа дуратай боро хараамни
намайе айлгадаг, һүрдүүлдэг болоол.

5Шэрээ бэлдэжэ, хибэсүүдые дэбдин, эдижэ, уужа байна…
Ударидагшад, бодогты!
Бамбайнуудаа бэлдэн тоһоор түрхигты!
 6Эзэн намда иигэжэ айладхаба:
«Яба, харуул таби,
хараһанаа мэдээсэжэ байг!
 7Хоёр-хоёроор мори хүллэһэн дайшалхы тэргэнүүдые,
элжэгэ болон тэмээ унаһан зониие харахадаа,
тэрэ һэргэг байг, һэргэг байг!»
 8Манааша хашхарба:
«Өө, Эзэн! Би бүхэлиин үдэр харуулай самхаг дээрэ зогсоноб,
һүни бүри манаанда үлэжэ мананаб.
 9Харагты! Хоёр хоёроор хүллэһэн моритой
дайшалхы тэргэнүүд ерэжэ ябана!»
Нэгэниинь «Вавилоон унаа, унаа!
Тэрэнэй онгонууд бутархай юумэд газарта хэбтэнэ!» гэжэ дуугарна.
 10Таряанай тоог дээрэ сохигдоһон таряан мэтэ арад зомни!
Түмэн Сэрэгтэ Израилиин Эзэн Бурханһаа дуулаһанаа
мүнөө таанадта дуулганаб.

11Думаа тухай зүн.

Сэһиирһээ нэгэ хүн намайе дуудана:
«Манааша, һүниин хэды саг бэ?
Манааша, һүниин хэды саг бэ?»
 12Манааша харюусана:
«Үглөө боложо байна, гэбэшье һүни хүсэд дууһаагүй!
Та дахин асуухаяа һанабал, асуугаарайт.
Дахин ерээрэйт».

13Араав тухай зүн.

Дэдаанай ашаан хамбышад!
Таанад Араавай үрэжэлгүй газарта хонохо ёһотой болонот.
 14Ангаһан зондо уһа үгыт!
Тэмаагай газарай улад зон!
Гай тодхорһоо зугадагшадта эдеэ асарыт!
 15Юуб гэбэл, тэдэ һэлмэһээ, далайһан һэлмэһээ,
татаһан һурша номһоо,
дайнай аюулһаа зугадан тэрьедээ бшуу.

16Эзэн намда иигэжэ айладаа: «Хүлһэншэдые ажалда абахадаа тоолодогтол нэгэ жэл тоолоходо, Кэдаарай нэрэ хүндэ буураха. 17Кэдаарай баатар харбаашадһаа үсөөхэниинь лэ амиды үлэхэ».

Иигэжэ Израилиин Эзэн Бурхан айладаа юм.
Copyright information for BxrBBL2024