‏ Isaiah 23

Тиир тушаа мэдээсэл

1Тиир тушаа зүн. Шангаар уйлалдыт, хүсэтэ онгосоор
Таршиишһээ бусажа байгааша зон!
Танай бусадаг Тиир хото үгы хэгдээ,
орохо гэр байранууд һандарал болонхой!
Киттиимэй нютагһаа тамаран бусахадаа
иимэ һураг суу таанад дуулаат.
2Та бүгэдэ, далайн эрьеын улад зон, сурхирса уйлалдыт!
Далайгаар тамарагша Сидооной наймаашад
таанадые баяжуулдаг бэлэйл.
3Агууехэ уһан далайгаар Шихоорой орооһон,
Нилэй эрьеын ургаса, элдэб үндэһэ яһатанһаа
худалдан абаһан зүйл иишээ асарагдадаг бэлэйл.
4Сидоон, эшхэбтэр бузар байдалда ороош!
Далай ба тэнгисэй ехэ уудам таанадһаа арсана:
«Бидэ ямаршье үхи хүүгэдые түрөөгүйбди,
хүбүү, басага хүмүүжүүлэн ехэ болгоошьегүйбди».

5Тиирэй һандарһан тушаа дуулахадаа,
Египедэй улад зон шэшэрэлдэн сошохол.

6Далайн эрьеын арад зон, шангаар уйлалдыт!
Таршииш руу нүүжэ ошогты!
7Эртэ урдын сагта байгуулагдаһан,
баяртай дуу шуугаар дүүрэһэн таанадай хото энэ гээшэ гү?
Холын холо оронуудта, хари газарта мүнөө амидархат,
түгэншэлэн тэнэн ажаһуухат.

8Наймаашадынь ударидагшад, худалдаашадынь дэлхэйгээр мэдээжэ зон.
Хаашуулые хан шэрээдэ заларуулагша
энэ Тиир хотын урдаһаа хэн энээниие түсэблөө гээшэб?
9Бүхы гоо үзэсхэлэнгыень, бардам бахархалыень
доромжолхын тула Түмэн Сэрэгтэ Эзэн энээниие түсэблэн хээ юм.

10Таршиишэй уһан онгосонууд, өөрын орон нютаг руу ябагты!
Таанадай амардаг буудал үгы болонхой.

11Эзэн гараа далай дээгүүр һунгажа,
хаан түрэнүүдые доһолгобо.
Ханаһаанай хэрэмүүд һандараг гэжэ
Тэрэ зарлиг буулгаба.
12«Сидооной хотонууд, жаргаха-сэнгэхэ сагтнай һалаа!
Таанад дарагдаат! Зонтнай Киттиим руушье зориходоо,
тэндэ амгалан тайбан ажаһуухагүй», – гэжэ Эзэн айладхаба.

13Вавилооншуудай газар дайда харагты – энэ арад түмэн тэндэ бэшэ үгы. Ассири газар дайдыень сүл губиин зэрлиг амитадай байра болгобо. Тэдэ бүһэлэлтын самхагуудые бодхожо, ордон гэрнүүдыень һандаргааба, хумхаа тооһон болгобо.

14Таршииш руу тэнгис далайгаар тамарагша зон,
шангаар уйлалдыт!
Танай ерэдэг хэрэм хото һалаа-һандараа!

15Нэгэ хаанай хааншалалгын сагай хугасаа соо – далан жэлэй туршада Тиир хото тухай мартаха. Далан жэлэй үнгэрһэнэй удаа янхан эхэнэр тушаа дууладаг дуундал адли зүйл Тиртэй тохёолдохо:

16«Хэндэшье хэрэггүй, мартагдаһан янхан аа,
өөр тухайгаа һануулхын тула
ятагаа баряад, хотоор ябажа,
һайса наадажа, дахин-дахин дуу дуулан ябыш!»

17Далан жэлэй үнгэрһэнэй удаа Тиир хотодо дахин наймаа эрхилхыень Эзэн зүбшөөхэ. Тиигээд тэрэ бүхы дэлхэй дүүрэн наймаагаа дурадхан суурхахал. 18Худалдаа наймаагаар олоһон олзонь Эзэнэй болохо. Тиир хото тэрэ олзоёо нөөсэлжэ-хадагалжа байхагүй. Эзэндэ һүгэдэн зальбардаг зон тэрэ мүнгөөрнь һайн хоол, һайхан хубсаһа өөһэдтөө худалдан абадаг байхал.