‏ Isaiah 24

Эзэн газар хэһээхэ

1Анхарыт! Эзэн газарые һандарган, тэрэниие хооһоруулха гэжэ байна.
Тэрэ шарайень тад ондоо болгожо,
дээрэнь ажаһуугшадые хаа-хаанагүй тараахань.
2Хүн бүхэндэ тэрэл үйлэ заяан тудаха –
санаарта ба юрэ буса хүндэшье, богоол ба эзэндэшье,
худалдан абагша ба наймаалагшадашье,
мүнгэ зээлеэр абагша ба мүнгэ урьһалагшадашье,
баян, үгытэйшье хүндэшье.
3Газар дэлхэй дууһан хооһорхо, бүхыдөө тонуулаатай юумэн хэбтэхэ.
Ушарынь гэбэл, Эзэн иимэ айладхал буулгаа бшуу.

4Газар зобон мүхэнэ, дэлхэй хатан мүхэнэ,
дэлхэйн удамаршадшье мүхэн байна.
5Зон Бурханай хуули ёһонуудые эбдэжэ,
тогтоолнуудыень хазагайруулжа,
хэтэ мүнхын хэлсээ эбдэн, дэлхэйе бузарлаба.
6Тиимэһээ дэлхэй Бурханай хараалда хүртэжэ,
дээрэнь амидарагша улад зон нүгэлөө эдлэжэ байна.
Газар дээр амидарагшад үгы болоно. Зон үсөөрһөөр үсөөрнэ.

7Үзэм жэмэсэй мүшэр хатажа, үзэмэй дараһан архишье хомор болобо.
Жарган-сэнгэн байгаашад мүнөө болоходо һанаа үнөөндэ абтанхай.
8Хэнгэрэгэй баяртай абяанууд замхаа,
баясан байгаашадай дуунууд таһалдаа,
хүхюутэй ятаг дуугүй болоо.
9Зон үзэмэй дараһан архи уухаа, дуу дуулахаа болинхой.
Шара айрагай амтан гашуун болонхойл!
10Хото һандаржа хооһоронхой,
гэрнүүд шэбхэдээтэй, орохын аргагүй.
11Үзэмэй дараһан архи дэлгүүрээр бэдэрээд, оложо ядахадаа,
зон бархиралдана. Бүхы баяр баясхалан таһалдаа,
ямаршье зугаа наадан газар дэлхэй дээр үгы болоо.
12Хото угаа һандараа, бартаануудынь унаад эбдэрээ.

13Олива хуряагаад, үзэм суглуулаад байха үедэ
хооһон хогоосон, нэгэ хэдыл жэмэс үлөөд байгша.
Тон тиимэ байдал дэлхэйн бүхы арадуудта үзэгдэхэ.

14Амиды мэндэ үлөөшэд баярлан хөөрэн байха.
Баруун зүгтэ байгаашад Эзэнэй һүр жабхалангые магтан дуулаха.
15Дорно зүгэйхид, Эзэндэ алдар соло дуудагты!
Далайн эрьеэр ажаһуугшад, Израилиин Эзэн Бурханай нэрые алдаршуулагты!
16Дэлхэйн алас холоһоо
«Зүб Шударга ябадалтайда алдар соло!» гэһэн
магтаал дуу соносонобди.
Теэд минии досоо ехэ муу байна.
Би иигэжэ байжа шадахагүйб!
Урбагшад урбаһан зандаа, бүри хэтэрэн урбажа байнал.

17Дэлхэйн хүн бүхэн намайе шагнаг лэ!
Һүрдэмөөр аймшагтай зүйлнүүд, нүхэ, занганууд
таанадые амадан хүлеэнэ.
18Айха һүрдэхэ зүйлһөө тэрьедэгшэд нүхэн руу унаха,
нүхэнһөө абиран гарагшад зангада орохо.
Огторгойн сонхонууд нээгдэбэ! Дэлхэйн һууринууд доһолбо!
19Газар бутаран эбдэрбэ, доһолбо, ехээр гантан хахарба.
20Газар дэлхэй архинша мэтэ гуйбалзан найгана,
үхибүүнэй үлгыдэл һэнжэлзэнэ.
Нүгэл хилэн дээрэнь улам хүндэ боложо байна,
тиимэһээ газар унажа, дахин хэзээдэшье бодохогүй!

21Огторгойн сэрэг, газарай хаашуулые Эзэнэй хэһээхэ сагынь тэрэ үдэр!
22Нүхэн соо тэдэ хаашуул суглуулагдажа, шорондо хаюулагдаха.
Тиигээд олон хоногой удаа тэдэ зарга шүүхэдэ орохо.
23Түмэн Сэрэгтэ Эзэнэй Сион хада уулаһаа
Иерусалимые зонхилон-захиран хаан шэрээ эзэлжэ залархада,
һүр жабхалангынь арадай удамаршадай урда
угаа ехээр яларжа-толоржо,
һара, наранай гэрэл тэрэниие диилэжэ шадахагүй.