‏ Isaiah 26

Эзэн Өөрын арадта илалта туйлуулха

1Иудын хан түрын газар дайдада иимэ дуу дууладаг болохо саг дүтэлжэ байна:

«Манай хото хүсэтэй!
Бурхан Өөрөө хана хэрэмынь болон хамгаалжа байна!
2Хотын бартаануудые нээгыт!
Бурхандаа үнэн сэхэ,
зүб шударга үндэһэтэн орог лэ!
3Бурхан, Тандаа этигэдэг,
хатуу зоригтой зондо
Та тэгшэ энхэ тайбан байдал үршөөнэт.
4Хэтэ мүнхэдөө Эзэндэ этигэн байгыт.
Юуб гэхэдэ, мүнхэ хабсагай бол Эзэн, Эзэн!
5Дээрэлхүү, бардам зантайшуул
Тэрээндэ хамараа сохюулаа,
тэдэнэй ажаһуудаг хүсэ ехэтэй хотые
Тэрэ һандаргаа.
Ханануудыень унагаажа,
тооһо шоройтой худхаа.
6Дарлагдажа байгаашад мүнөө болоходо
өөһэдөө эдэ бүгэдые дэбһэжэ,
ула дороо гэшхэнэ».

7Зүб шударга зоной харгы тэгшэ –
Та замыень дардам һайн болгонот.
8Тиимэ, Танай тогтоолнуудай замаар ябанабди,
Эзэн, Тандаа найданабди!
Танай нэрэ дуудаха гээшэ сэдьхэлэймнай хүсэл мүн.
9Һүниндөө минии сэдьхэл Тан руу тэгүүлдэг,
үглөөнһөөшье эхилээд, Таниие бэдэрнэм.
Газарта Танай шүүхэ сагай ерэхэдэ,
дэлхэйн зон зүб ябадалда һурана.
10Нүгэлтэй зондо энэрэл хайраяа Танай үзүүлдэгшье хада,
тэдэ зүб ябадалда һурахагүй.
Зүб шударга зоной газарта
тэдэ буруу юумэ үйлэдэн лэ байха,
Танай һүр жабхалангые мэдэрхэгүй.

11Эзэн! Та гараа далайгаад байнат,
харин тэдэ энээниие харанагүй.
Танай арад түмэнөө халхалан байхые үзэхэдөө
тэдэ эшхэбтэр байдалда орохо!
Тэдээндэ бэлдээтэй гал дүлэн дайсадыетнай үрэбхихэ!
12Эзэн, Та бидэндэ һайн байдал үршөөгыт!
Манай хэһэн бүхы хэрэгүүд Танай ашаар бүтэнэ.
13Эзэн Бурхамнай! Хэзээдэшьеб Танһаа ондоо эзэд
бидэниие зонхилдог байгаашье хадань
мүнөө бидэ гансал Таниие магтан дууланабди!

14Мүнөө тэдэ эзэд үхэнхэй,
дахин амидырха бэшэ.
Тэдэнэй һүнэһэншье дахин эрьехэгүй.
Ушарынь гэхэдэ, Та тэдэниие хэһээн һалгаагаат.
Хэншье тэдээн тушаа һанахагүй.

15Эзэмнай, Та арад түмэниие олошоруулаат,
ороной газар дэбисхэр үргэдхөөт.
Иигэжэ Өөрыгөө алдаршуулаат.
16Өөһэдынгөө арад түмэниие Танай хэһээхэдэ,
бидэ зобон-тулин, Эзэн, Тандаал зальбараа бэлэйбди.
17Эхэнэрэй үхибүү түрэхэдөө зобон хашхардагтал,
бидэ зобон хашхаран байгаа бэлэйлди, Эзэмнай!
18Үбдэн-зобон байгаабди,
гэбэшье юушье түрэжэ шадаагүйбди.
Газар дэлхэйгээ сүлөөлжэ шадаагүйбди,
юушье хээгүйбди.

19Үхэһэн зомнай дахин амидырха!
Хумхаа тооһон бологшод һэргэн бодожо,
баяртай дуулалдаха.
Газар дайдые шүүдэрэй һэргээдэгтэл,
Эзэн нүгшэһэн зониие амидыруулха!

Эзэнэй арад түмэн нютагаа бусаха

20Минии арад түмэн, гэртээ орожо, үүдэеэ хаагты.
Эзэнэй уур хилэнгэй үнгэртэр түр зуура бэеэ нюугаад байгты.
21Гэм хэһэнэйнь түлөө дэлхэйн зониие хэһээхэеэ
Эзэн Өөрынгөө огторгойн ордонһоо гаража байна.
Дэлхэй дээрэ нюусаар хүниие алаһан ушарнууд
эли тодо боложо, дахин далдалагдахагүй.