Isa 27 | BxrBBL2024 | STEP | Тэрэ үдэр зугадагша могой Левиатаниие, мушхардаг могой Левиатаниие – далайн абарга лууе Эзэн асари томо, үхэлтэ һэлмээрээ сабшан хюдаха.

‏ Isaiah 27

Эзэн могойе хюдаха

1 Тэрэ үдэр зугадагша могой Левиатаниие,
мушхардаг могой Левиатаниие – далайн абарга лууе
Эзэн асари томо, үхэлтэ һэлмээрээ сабшан хюдаха.

2 Тэрэ үдэр Эзэн иигэжэ айладаха:
«Үзэм жэмэсэй һайхан сэсэрлиг тухай дуу дуулагты!
3 Би тэрэниие харууһалжа, таһалгаряагүй уһалжа байнаб.
Хэншье тэрэниие бү гэмтээг гэһэндээ
Би тэрэниие үдэр, һүнигүй харууһалнаб.
4 Уур хилэн намда үгы. Гэбэшье хадхуур, үүргэнэ ургуулжа,
урдаһаам тулахаар бодоболнь, Би дайлан гарахаб,
тэрэниие дууһан шатаахаб!
5 Минии дали доро орохоёо тэрэ оролдог,
Намтай эбтэй байха тухай хэлсээ баталаг,
мүн даа, Намтай эбтэй эетэй байха тухай хэлсээ баталаг!»

6 Ерэхэ сагта Израилиин улад зон, Яковай үри һадаһад,
модон мэтэ үндэһэлжэ, сэсэглэжэ, үрэ үгэхэ.
Бүхы юртэмсэ тэдэнэй жэмэсээр дүүрээд байхал.

7 Дайсадтаал адляар тэдэ Эзэндэ хэһээгдээ бэшэ.
Алууршадтаал адляар тэдэ Эзэндэ алуулагдаа бэшэ.
8 Эзэн Өөрын арад түмэниие сүлэлгэдэ эльгээжэ хэһээгээ.
Дорно зүгэй халуун һалхяар Тэрэ тэдээн руу үлеэн хаяа.
9 Гэбэшье үргэлэй шэрээнүүдэй шулуунай бутаржа, шохой болоходо,
Ашэраа бурханда һүгэдэлгын зүйлнүүдэй үгы болоходол
Яковай нүгэл арюудхагдаха.
10 Бүхэлэгдэһэн хото һандаран хооһоржо, гэр байранууд орхигдохо,
элһэн сүл губидал тэрэ хаясаанай болохо.
Тэндэ тугал бэлшэжэ, хэбтэжэ, набшаһа намаа зулгааха.

11 Тэрэнэй мүшэрнүүд хатажа хухарха.
Тиихэдэнь эхэнэрнүүд ерэжэ, түлеэн мэтээр шатааха.
Зоной юушье ойлгоогүй һэн тула
Байгуулагшань тэдэниие хайрлахагүй,
Бүтээгшэнь нигүүлэсхы зан гаргахагүй.

12 Тэрэ үдэр Эзэн таряа сохин орооһо илгаһандал, Евфрадһаа Египедэй хилэнүүд хүрэтэр таанадые, Израилиин арад түмэниие, нэгэ нэгээр суглуулха. 13 Тэрэ үдэр ехэ бүреэгэй дуун дуулдажа, Ассири болон Египет руу сүлэгдэгшэ Израилиин зон бусан ерэхэ. Тиигээд тэдэ нангин уула дээрэ, Иерусалимда Эзэндэ мүргэхэ.