‏ Isaiah 28

Хойто хаан түрэдэ һэргылэлтэ

1Эпрааимай һогтуу зоной бахархадаг гүрлөө сэсэг,
Эпрааимай хагдаржа байгаа сэсэг, шэмэг, солонь,
үзэмэй дараһан архида диилдэһэн зоной ажаһуудаг
баян нюруу газар дээгүүр дүүлиһэн сэсэг
гай тодхорто орохо!
2Үзөөрэйгты, шуурган мүндэр, сүйд хэдэг хара һалхин мэтэ,
үерлэһэн уһанай хүсэтэ урасхал мэтэ
шадалтай, хүсэтэй нэгэн Эзэндэ бии.
Тэрэ газардан хаяха,
3Эпрааимай һогтуу зоной бардамладаг гүрлөө сэсэгые
ула доогуураа гэшхэхэ!
4Эпрааимай хагдаржа байгаа сэсэг, шэмэг, солонь,
баян нюруу газар дээгүүр дүүлиһэн сэсэгтэй юун болохоб гэхэдэ,
сагһаа урид эдеэшэһэн инжиртэл адли юумэн болохо:
тэрэниие хэн үзэн харанаб, тэрэ дары таһалан залгиха!

5Амиды үлэһэн Өөрын зондо
Түмэн Сэрэгтэ Эзэнэй үзэсхэлэнтэ титимдэл адли
болохо саг дүтэлжэ байна.
6Шүүгшэдтэ зүб шударга байха сэдьхэл,
хотын бартаануудые дайсадһаа хамгаалжа байгаашадта
шэн зориг Тэрэ үршөөхэ.

Иудын хан түрын һогтуу лүндэншэд ба Исай

7Лүндэншэд, санаартадшье хүрэтэрөө үзэмэй дараһан архиһаа найгажа,
шара айрагһаа алмайржа байна.
Бурханай эльгээһэн үзэгдэлые лүндэншэ
ойлгожо шадахаар бэшэ һогтуу,
хэрэгүүдые шиидхэжэ шадахаар бэшээр санаартад һогтуу.
8Тиигээд бүхы шэрээнүүдынь хуу бөөлжэһэн болонхой,
сэбэр ямаршье газар үгы.

9Иимэ хүн хэндэ эрдэм заажа шадахаб,
хэндэ мэдээ ойлгуулхаб?!
Хүхэнһөө һаял һалаһан багашуулда гү?!
10Тэрэ дабтаад һаланагүй:
«Заабари, заабари, дүрим, дүрим,
тэндэ нэгэ бага, эндэ нэгэ бага…».
11Үгыень дуулахагүй һаань,
танигдахагүй хэлэнүүд дээрэ шулганаһан хариин зоноор,
Эзэн энэ арадта һургаал заабари дамжуулхал.
12Та бүгэдэндэ амархые Тэрэ дурадхаа бэлэй,
харин таанад үгыень дуулахаяа арсаат.
13Тиимэһээл Эзэнэй үгэнүүд таанадта
«заабари, заабари, дүрим, дүрим,
тэндэ нэгэ бага, эндэ нэгэ бага…» болохо.
Тиимэһээл таанад алхахадаа, бүдэржэ унахат,
шархатан, урьхада орожо баригдахат.

Сионой һуури табигдаха

14Эндэ, Иерусалимда, арад зониие ударидажа байгааша
бардам зантай удамаршад, Эзэнэй айладхал шагныта!
15Үхэл хаталтай хэлсээ хэнхэйбди,
үхэлэй оронтой үгэеэ ойлголсонхойбди гэжэ һайрхан дуугарнат.
Гай тодхор таанадые зайлан гараха,
худал хуурмаг, мэхэ гохо таанадые аршалха гээд һананат.

16Харин Эзэн Бурхан иигэжэ айладхана:
«Бата найдамтай, мантан һууриин шулуу, эрдэни шулуу,
хатуу шулуу Сион дээрэ мүнөө Би табинаб.
Бата этигэлтэй нэгэн айхагүй.
17Һууриин шулууе хэмжэхэ шугам хадаа шударга ёһо болохо,
тэрээниие тодоруулан харуулһан зурлаа хадаа үнэн зүб болохол.
Танай худал хуурмагай хорохо газар
шуурган мүндэртэ үгы хэгдэхэ,
уһан үер аюулгүй байдалыетнай таһалдуулха.
18Үхэл хаталтай хэһэн хэлсээнтнай,
үхэлэй оронтой байгуулһан гэрээтнай мүн бэшэ болохо.
Гай тодхорой дайран үнгэрхэдэ, таанад гэшхэгдэн һалахат!
19Энэ хадаа таанадые дахин-дахин дайран байха.
Үглөө бүри, үдэр һүнигүй тэрэ дайран үнгэрхэ.
Тэрээн тушаа дуулаһан хүн бүхэн айн-һүрдэн байхал!»

20Орон богони, һунажа хэбтэхын аргагүй;
хүнжэл бага, бэеэ хушахын арагагүй.
21Эзэн Пэрациим уула дээрэ болон Гибэһооной нюрууда
уурлан хэһэн үйлэ хэрэгүүдээ, гайхалтай хэрэгүүдээ, хэхэеэ байна.
Тэрэ Өөрынгөө ажал хэрэг, гайхамшагта ажалаа, хэхэ.
22Минии һэргылхэдэ, наада бү баригты!
Тиигээ һаа, таанад тэрьедэжэ шадахагүйт.
Түмэн Сэрэгтэ Эзэнэй бүхы орон нютаг
хюдан һалгааха гэһэн түсэб тушаа би дуулаһан байнаб!

Бурханай гүн сэсэн ухаан

23Минии хэлэхые шагнагты, дуулгаһыем анхарагты.
24Ургаса тариха үе сагай ерэхэдэ,
таряашан гансахан лэ газараа хахалжа, борнойлжо байдаггүй.
25Газарай хүрьһэ элдүүрилһэнэй удаа
тэрэ укроп болон тмин мэтэ ургамалай үрэ таридаг.
Тэрэ шэниисэ болон ешмээн жэгдээр һуулгадаг.
Таряалангай захаар тад ондоо орооһо тэрэ тарина.
26Ажалаа яагаад хэхэеэ тэрэ мэдэнэ.
Юуб гэхэдэ, Бурхан тэрэниие һургаа бшуу.
27Укроп болон тминэй үрэ сохин хадахын тула
тэдэ хэзээдэшье хүндэ лантуу хэрэглэдэггүй,
хүнгэхэн һабаануудаар сохидог.
28Талхан болгохын тула
үрэ таряае буталжа үйрүүлхэ хэрэгтэй.
Тиимэһээ тэдэ дүмүүхэнээр орооһо үйрүүлдэг.
Орооһо гамтайгаар бутарган, мори тэргэ ябуулдаг.
29Эдэ бүгэдэ шадабари Түмэн Сэрэгтэ Эзэнһээ олгогдонхой.
Тэрэнэй зүбшэл гайхамшагтай, мэргэн ухааниинь агууехэ юм!