Isa 30 | BxrBBL2024 | STEP | Эзэн иигэжэ айладхана: «Үгыем дууладаггүй Иудын хан түрын ударидагшадтай гай гасалан тохёолдохо! Тэдэ Намгүйгөөр зүбшэнэ, хүсэлдэм харша холбоо тогтооно. Иигэжэ тэдэ нүгэл дээрээ нүгэл хэнэ.

‏ Isaiah 30

Египедтэй ямаршье ашагүй хэлсээн

1 Эзэн иигэжэ айладхана:
«Үгыем дууладаггүй Иудын хан түрын ударидагшадтай
гай гасалан тохёолдохо!
Тэдэ Намгүйгөөр зүбшэнэ, хүсэлдэм харша холбоо тогтооно.
Иигэжэ тэдэ нүгэл дээрээ нүгэл хэнэ.
2 Тэдэ Намтай зүбшэнгүй, туһа гуйжа Египет руу ябаа,
Египедэй фараондо найдажа, аршалхыень гуйгаа.
3 Теэд фараондо найдаһаниинь гансал нэрыень хухалха,
Египедэй һүүдэртэ хорохо гэһэниинь нэрынь гутааха.
4 Египедэй хотонууд болохо Цооһанда ударидагшадынь
ба Ханээс руу элшэнэрынь хүрөөшье хадань
5 ямаршье туһагүй, мүн тиихэдэ эшхэбтэр байдалда оруулһан
үндэһэ яһатанһаа тэдэнэр эшэдэг болохо».

6 Урда зүгэй элһэн сүл губиин амитад тушаа
Эзэнэй буулгаһан айладхал энэ:
Арсаланай, хорото могойн, луугай һуурижаһан
аймшагтай орон нютагаар элшэнэр аяншална.
Элжэгэдтээ, тэмээнүүдтээ хүндэ ашаа тээн,
тэдэ ондоо арад зондо бэлэг-сэлэг абаашахаяа һэдэнэ.
Теэд тэрэ арад өөһэдтэнь ямаршье туһа хүргэхэгүй.
7 Египедэй туһа ямаршье ашагүй, хооһон.
Тиимэһээ Би «Аюулгүй Рааһаб ^{▼▼ Рааһаб – домогто ороһон, далайн амитан, муу муухайн һүлдэ, Египедэй һүлдэ тэмдэг.}» гэжэ Египедые нэрлэнэб.

Үгэ дуулахагүй зон

8 Мүнөө яба, шулуун хабтаһан дээрэ тэдээндэ энээниие зура,
хуйламал ном руу эдэ үгэнүүдые бэшэ!
Тэдэ ерээдүй сагта үлэг лэ, хододоо, хэтын хэтэдэ.

9 Юуб гэбэл, тэдэ буһалгаата арад, худалша зон,
Эзэнэй һургаал шагнахаяа арсагшад.
10 Тэдэ үзэлшэдтэ «үзэл бү үзэгты» гэнэ,
мэдэлшэдтэ «мүн болохо юумэ бидэндэ бү харуулагты,
бидэнэй дуулахаяа һанаһан юумэ хэлэгты, аятай юумэ мэргэлэгты.
11 Замһаа зайлагты, харгыһаа хадуурагты,
Израилиин арюун Бурхан тушаа дуулахаа һананагүйбди», –
гэжэ тэдэ хэлэнэ.

12 Тиимэһээ Израилиин арюун Бурхан иигэжэ айладхана:
«Минии айладхал дууланагүйт,
дарлалтада найдажа, мэхэ гоходо түшэглэбэт.
13 Энэ нүгэл хадаа үндэр ханада бии болоһон хэмхэрэл,
гэнтэ, хараа байса хамхаран унаха ханын нүхэн мэтэ таанадта болохо.
14 Шабар һабадал адляар бутаран һалахат.
Аһажа байгаа нүүрһэ удхаха гү,
али уһанай һабаһаа уһа удхаха шабар хэлтэрхэйшье үлэхэгүй».
15 Израилиин нангин Эзэн Бурхан арад түмэндэ иигэжэ хандана:
«Бусагты Намдаа.
Тиигээ һаа, таанад абарагдажа, аюулгүй амгалан ажаһуухат».
Теэд таанад энээнһээ арсанат.
16 Энээнэй орондо таанад дайсадһаа тэрьедэхэеэ,
хурдан морёор гүйлгэхэеэ һананат.
Моримнай хурдан гэжэ һанахадатнай
танһаа хурдан моритой дайсад байхал.
17 Дайсанай нэгэ сэрэгшые харахадаа,
танай мянган сэрэгшэд зугадан тэрьедэхэл.
Табаншье сэрэгшэ таанарые һүрдөөхэ.
Гүбээгэй оройдо ори ганса тугһаа бэшэ ондоо юумэн үлэхэгүй.

18 Гэбэшье Эзэн хүлеэжэ, таанадые хайрлаха.
Тэрэ бодожо, таанадта туһалха.
Юуб гэбэл, Эзэн гээшэ зүб шударга Бурхан,
Тэрээндэ этигэн һүгэдэгшэд жаргал эдлэхэ!

Бурхан Өөрын арад түмэниие үреэхэ

19 Сион дээрэ, Иерусалимда ажаһуугша арад!
Танай нёлбоһод хатаха.
Абарал тушаа гуйхадатнай, Эзэн таанадта туһалха,
таанадые дуулажа, харюу үгэхэ.
20 Эзэн таанадта уйдхарай эдеэ эдюулээшье һаа,
зоболонгой уһаар ундалуулаашье һаа, саашадаа хоргодохогүй,
нюдөөрөө Багшаяа харахат!
21 Харгы замһаа баруун, зүүн зүгүүд руу хадууран байбал,
таанад ара тээһээ Тэрэнэй иимэ абяа дуулахат:
«Харгы – тэндэ. Тэрээгүүр ябагты!»
22 Таанад мүнгөөр хушаатай онгонуудаа,
алтаар бүрхөөтэй хүрэгүүдээ абажа, муухай юумэндэл,
бог шоройдол адляар холо хаяхат: «Зайлагты!»

23 Орооһо тариха бүхэндэтнай Эзэн бороо хура эльгэжэ,
баян ургаса үршөөхэ.
Малтнай һайн бэлшээритэй байха.
24 Танай таряалангуудта ажалладаг сар, элжэгэнүүд
эгээл һайхан эдеэ хоол эдидэг байха.
25 Дайсадые олоор алаһан, хэрэмүүдэйнь унаһан тэрэ агууехэ үдэр
хада уула бүхэнһөө, гүбээ бүхэнһөө уһан урдаха.
26 Һара, нарандал адли ялагар шанга гэрэлтэй болохо,
наран хэмһээ долоо дахин ялагар хурса болохол.
Эзэнэй арад түмэндөө ушаруулһан гай гасалангай дүүрэжэ,
шархануудайнь эдэгэжэ эхилхэдэ, эдэ бүгэдэ тохёолдохо.

Бурхан Ассири хэһээхэ

27 Аяар холоһоо Эзэнэй нэрэ дүтэлжэ байна.
Уур хилэнгынь галаар бадаржа, дүлэнгынь угаа шанга.
Аманиинь хилэнгээр дүүрэнхэй, хэлэниинь үрэбхидэг галдал мэтэ!
28 Амисхалынь ама хаажа байһан үертэл адли,
арадуудые үхэлэй һагшуураар Тэрэ һагшаха.
Тэрэ арадуудай үрүүндэ замһаань хадууруулха хазаар байна.

29 Харин таанад нангин һайндэрэй һүнидэл дуу дуулахат.
Эзэнэй хада руу, Израилиин хабсагай руу
лимбээр хүгжэмлэн ябаашадтал адли
сэдьхэлтнай баясан байха.

30 Эзэн һүрдэмэ шанга хоолойгоор бужаганажа,
гараа һунган сохихо.
Уур хилэнгынь угаа ехэ, үрэбхилдэг галай дүлэн дүлэгэнэхэ.
Шуурган, үер, мүндэр орожо эхилхэ!
31 Эзэнэй дуу шагнахадаа, Ассириин зон һүрдэхэ,
баягаар Эзэндэ сохюулха.
32 Хэнгэрэг, ятагай абяан доро Эзэн тэдэниие
баягаар дахин-дахин сохихо,
хооһоруулма дайн дажараар урдаһаань тулаха!

33 Ассириин хааниие асари ехэ галда шатааха газар
үнинэй бэлдэгдэнхэй. Тэрэ газар гүнзэгы, үргэн.
Тэндэ үндэрөөр ябталаатай түлеэе шатаахын тула
Эзэн гал дүлэ аманһаа гаргаха!