‏ Isaiah 32

Үнэн сэхэ хаан

1Үнэн зүбөөр зонхилогшо хаан,
шударга зүбөөр хэрэгүүдые шиидхэгшэ ударидагшад бии болохо.
2Эдэ удамаршадай хүн бүхэниинь һалхинһаа хорохо газар,
шуурганһаа халхалха халхабша мэтэ,
хуурай газараар урдагша уһанай һубаг,
ангаһан-хатаһан газарта үндэр хабсагайн һүүдэр мэтэ болохо.
3Зоной хэрэгүүдтэ тэдэ нюдэ балай, шэхэ дүлии мэтээр хандахагүй.
4Яарадаг зоной ухаан номгорхо,
һанаһанаа ойлгуулжа шададаггүйшүүл эли тодоор хэлэдэг болохо.
5Муу хүниие хэншье боди сагаан сэдьхэлтэй гэхэгүй,
этэгээдые хэншье сэхэ хүн гээд нэрлэхэгүй.
6Муу хүн удхагүй юумэ дуугардаг, муу юумэ хэхэеэ һанажа байдаг.
Тэрэ үлэсхэлэн хооһон хүнһөө эдеэ хоол буляан абажа,
ангаһан хүнһөө унда буляажа,
Эзэниие доромжолон хэлэдэг, муу юумэ хэдэг.
7Тэнэг хүнэй ажаябуулганьшье муу муухай.
Тэрэ хорото муу арга мэхэнүүдые зохёожо,
үгытэй зониие худал хуурмаг үгэнүүдээр хүрмэжэ хосорооно,
хуулита эрхэ түлөөлгэнүүдынь үгэнэгүй.
8Харин боди сагаан сэдьхэлтэн зүб шударга хэрэг ябуулдаг,
үнэн зүбэй түлөө хододоо тэмсэдэг.

Байдал һэргэхэ

9Ямаршье юумэндэ һанаагаа зобонгүй,
һэли-дэлихэн хүнгэн ажаһуудаг эхэнэрнүүд, минии хэлэхые шагнагты.
10Ерэхэ жэлдэ таанад зобохо-тулихат.
Юуб гэхэдэ, суглуулха үзэм ургахагүй.
11Таанад ехэ хүнгэн, сүлөөхэн ажаһуугаат,
харин мүнөө айн шэшэрыта!
Хубсаһаа тайлан нюсэгэлжэ, бэлхүүһээрээ таар орёогты.
12Һандаргагдаһан үрэжэлтэ талмай,
үзэмэй модоной сэсэрлигүүд тушаа гашуудан,
өөһэдынгөө сээжэ сохин байгыт.
13Минии арад түмэнэй газар нютагта
үүргэнэ ба халаахай ургаха.
Зугаа наадаар дүүрэн хото,
баяр жаргалтай зонтой эдэ гэрнүүд һалан һандархал,
тэдээн тушаа гашуудан уйлыта!
14Ордоншье хаягдан, шууяатай хотошье хооһорон мартагдаха,
хэрэм самхагуудынь һандаргагдаха,
малай бэлшээри, хулангуудай хорёо болохо.

15Гэбэшье Бурхан бидэндэ дээрэһээ Һүлдөө дахин эльгээхэ.
Тиихэдэнь зэлүүд хооһон газар үрэжэл шэмэтэй болохо,
таряалангуудаар баян ургаса ургаха.
16Энэ сүл губида үнэн шударга ёһо тогтохо,
үрэжэлтэ таряаланда үнэн зүб оршохо.
17Үнэн зүб хадаа энхэ тайбаниие асарха,
үнэн шударга хадаа амгалан, аюулгүй байдал хэтэдээ үршөөхэ.
18Бурханай арад түмэн һанаа амархан,
энхэ тайбан, аюул гээшые мэдэнгүй гэрнүүдтээ ажамидарха.
19Ой модые мүндэр сохижо, хото һандаргагдабашье,
20ургаса таряагаа уһалха дүүрэн уһатай,
үхэр малаа, элжэгэеэ сүлөөтэй бэлшээхэ аргатай зон
хэды ехэ жаргалтай байхаб даа!