‏ Isaiah 34

Эзэн дайсадаа хэһээхэ

1Бүхы үндэһэ яһатад! Сугларан дүтэлжэ, шагныта!
Бүхы газар дэлхэй, дээрэнь амидарагшад бултадаа соносохо болтогой!
2Эзэн бүхы үндэһэ яһатанда,
тэдэнэй бүхы сэрэгтэ уурлаад байна.
Тэдэниие хосорхо гээд Тэрэ шиидхээ.
3Алуулһан бэенүүдынь хүдөөлүүлэгдэнгүй,
үмхэй үнэр гаргажа хэбтэхэ.
Тэдэнэй шуһанда хада ууланууд нэбтэрэн нэбшэн байха.

4Наран, һара, мүшэд үмхирэн хуушарха,
огторгойшье хуйламал ном мэтэ хуйлагдан хуряагдаха,
үзэмэй модоной, инжир модоной набша мэтээр одо мүшэд доошоо унаха.

5Эзэнэй һэлмэ огторгойдо хэрэг бүтээгээд,
мүнөө шүүбэрилхэеэ Эдоом руу буужа байна,
хюдаха гэжэ Эзэнэй шиидэһэн арад зон дээрэ буухаяа байна.
6Үргэлэй хурьга ямаанай шуһа өөхэндэ адли шуһа өөхөөр
Эзэнэй һэлмэ дууһан хушагдаатай байха.
Эзэн иимэ үргэл, иимэ хюдалга Боцраада,
Эдоомой орон нютагта хэхэеэ түсэблэнэ.
7Һарлагууд, бухануудтал адли зон алдалан газарта унаха,
газар шуһаар нэбшэжэ, тооһо шорой өөхэнтэй худхалдан ялаганажа байха.
8Эзэнэй Сион абарха, дайсадһаа үһөө абаха саг энэл гээшэ.
9Эдоомой голнууд дабирхай боложо,
хүрьһэтэ газарынь шатажа байһан хүхэр болон хубилха.
Иигэжэ энэ орон нютаг шатажа байһан дабирхайдал адли болохо.
10Энэ үдэршье, һүнишье унтархагүй,
утааниинь хэтэ мүнхэдөө дээшээ һуунагтан байха.
Энэ орон нютаг үеһөө үедэ эзэгүйрэн,
хэншье хэзээдэшье тэрээгүүр ябахагүй.
11Турлаагууд, шара шубууд, уулинууд, хирээнүүд
Эдоомой газар дайда эзэлхэ.
Эзэн энэ газарые ямаршье хэбэргүй, хооһон болгохо.
12Хаан шэрээ эзэлмээр хүн үгы болохо,
мүртэй ударидагшад тэндэ байхагүй.
13Ордонгуудаарнь, бүхэлэгдэһэн хотонуудаарнь
үүргэнэ, халаахай ургажа, сүүбэн шонын, шара шубуудай байра тэрэ болохо.
14Мануулнууд ба сүүбэн шононууд тиишээ ерэхэ,
һаглагар тэхын дүрсэтэй аймшагтай амитад бэе бэеэ дуудан байха,
һүниин эмэ мангас амарха газараа бэдэрэн, тиишээ ерэдэг байха.
15Тэндэ далита могой үүрээ заһажа,
үндэгөө даража, аршалан-хамгаалан байха.
Элеэнүүд тэндэ сугларха.
16Эзэн Бурханай ном олоод уншагты.
Эдэ амитад хододоо суг байха гээд тэндэ бэшээтэй.
Эзэн энээн тушаа захирһан гээшэ.
17Эзэн Өөрөө газар уһа тэдэнэй хоорондо хубаагаа,
тиимэһээ тэдэ энэ газарые хэтэ мүнхэдөө эзэмдэн,
үеын үедэ тэндэ оршохо, ажамидарха болоно.